ບາເຊໂລນາ ເອົາຊະນະ ເອສປັນຍອນ, ຮັບປະກັນຕຳແໜ່ງແຊມລາລີກາ ສະເປນ

ແຊມແລ້ວ!!! “ເຈົ້າບຸນທຸ່ມ” ບາເຊໂລນາ ບຸກມາເອົາຊະນະ ເອສປັນຍອນ ຮັບປະກັນໄດ້ແຊມ ລາລີກາ ສະເປນ ລະດູການ 2024-25.

ການແຂ່ງຂັນກິລາເຕະບານ ລາລີກາ ສະເປນ ລະດູການ 2024-25 ໃນຕອນຄ່ຳຂອງວັນພະຫັດທີ 15 ພຶດສະພາ 2025, ຄູ່ທີ່ໜ້າສົນໃຈ “ນົກແກ້ວ” ເອສປັນຍອນ ເປີດບ້ານຮັບການມາຢ້ຽມຢາມຂອງ “ເຈົ້າບຸນທຸ່ມ” ບາເຊໂລນາ.

ຜົນການແຂ່ງຂັນປະກົດວ່າ ບາເຊໂລນາ ເອົາຊະນະ ເອສປັນຍອນ ໄປ 2-0 ໄດ້ປະຕູຈາກ ລາມີນ ຢາມານ ໃນນາທີທີ 53 ແລະ ເຟີມິນ ໂລເປຊ ໃນນາທີທີ 90+5. ໃນເກມນີ້, ເອສປັນຍອນ ເຫຼືອ 10 ຄົນ ຕັ້ງແຕ່ນາທີທີ 80 ເມື່ອ ເລອັນໂດ ຄາເບເຣຣາ ໄດ້ຮັບໃບແດງ ແລະ ຖືກໄລ່ອອກຈາກສະໜາມ.

ດັ່ງນັ້ນ, ຈາກໄຊຊະນະດັ່ງກ່າວເຮັດໃຫ້ ບາເຊໂລນາ ເກັບໄດ້ເພີ່ມເປັນ 85 ຄະແນນ, ຮັບປະກັນຕຳແໜ່ງແຊມ ລາລີກາ ສະເປນ ລະດູການ 2024-25 ຢ່າງແນ່ນອນແລ້ວ, ເພາະວ່າຄະແນນທິ້ງຫ່າງ ເຣອັນ ມາດຣິດ 7 ຄະແນນ ແລະ ເຫຼືອການແຂ່ງຂັນອີກພຽງ 2 ນັດເທົ່ານັ້ນ.

ສະແດງຄຳຄິດເຫັນ