ຟລິກ ເປີດໃຈ! ເຜີຍເຫດຜົນພາບາຊ່າຄວ້າ 3 ແຊມປ໌ຕັ້ງແຕ່ປີທຳອິດທີ່ຄຸມ

ຮັນຊີ ຟລິກ ຜູ້ຈັດການທີມ ບາເຊໂລນາ ລະບຸວ່າ ບັນຍາກາດແບບຄອບຄົວພາຍໃນທີມເປັນປັດໃຈຫຼັກທີ່ຊ່ວຍໃຫ້ພວກເຂົາເຮັດຜົນງານໄດ້ດີ ໂດຍບອກວ່າຕົນບໍ່ເຄີຍພົບບັນຍາກາດແບບນີ້ເລີຍ.

ຮັນຊີ ຟລິກ ຜູ້ຝຶກສອນ ບາເຊໂລນາ ກ່າວວ່າປັດໃຈຫຼັກທີ່ເຮັດໃຫ້ລະດູການນີ້ທີມຂອງຕົນເຮັດຜົນງານໄດ້ດີເລີດແມ່ນເພາະພວກເຂົາມີຄວາມສຳພັນທີ່ດີໃນທີມຈົນຄືກັບເປັນຄອບຄົວດຽວກັນ.

ກ່ອນທີ່ລະດູການນີ້ຈະເລີ່ມຂຶ້ນນັ້ນ ຫຼາຍຄົນຄາດການວ່າ ເຣອັນ ມາດຣິດ ມີໂອກາດໄດ້ແຊມປ໌ລີກຫຼາຍກວ່າ ບາເຊໂລນາ ເມື່ອພິຈາລະນາເຖິງເລື່ອງທີ່ ຟລິກ ພຶ່ງເຂົ້າມາຄຸມ “ອາຊູລກຣານາ” ເປັນລະດູການທຳອິດ ໃນຂະນະທີ່ “ຣາຊັນຊຸດຂາວ” ກຳລັງຄຶກມາຈາກລະດູການກ່ອນທີ່ໄດ້ທັງແຊມປ໌ລີກກັບ ຢູຟ່າ ແຊມປຽນສ໌ ລີກ ແຕ່ກັບກາຍເປັນວ່າ ບາເຊໂລນາ ເຮັດໄດ້ດີກວ່າຈົນຄວ້າແຊມປ໌ໄປຄອງ.

ຜູ້ຈັດການທີມຊາວເຢັຍລະມັນເປີດເຜີຍວ່າ “ຂ້ອຍພູມໃຈຫຼາຍໆ ທີມຂອງພວກເຮົາເປັນທີມທີ່ດີເລີດ ຂ້ອຍຄິດວ່າທີມນີ້ສາມາດຖືກໃຊ້ເປັນມາດຕະຖານໃຫ້ກັບທຸກສະໂມສອນໄດ້ເລີຍ ເພາະຢູ່ທີ່ນີ້ບໍ່ມີໃຜທີ່ຄິດວ່າຕົນເອງເໜືອກວ່າຄົນອື່ນໃນທີມ ນັ້ນເປັນເລື່ອງທີ່ດີເລີດ.”

“ຢູ່ທີ່ນີ້ພວກເຮົາຄືກັບເປັນຄອບຄົວດຽວກັນ ແລະ ຂ້ອຍມັກບັນຍາກາດແບບນັ້ນຫຼາຍໆ ພວກເຮົາມີບັນຍາກາດຄືກັບເປັນຄອບຄົວດຽວກັນແທ້ໆ ເຊິ່ງນັ້ນຊ່ວຍເຮັດໃຫ້ຂ້ອຍມີຄວາມສຸກແລະເຮັດວຽກດ້ວຍຄວາມຮັກແບບນີ້ໄດ້ ບອກເລີຍວ່າຂ້ອຍບໍ່ເຄີຍມີຄວາມຮູ້ສຶກແບບນີ້ມາກ່ອນເລີຍ.”

“ການຢູ່ກັບ ບາເຊໂລນາ ມັນໝາຍຄວາມວ່າເຈົ້າຈຳເປັນຕ້ອງຄວ້າແຊມປ໌ມາຄອງໃຫ້ໄດ້ ແລະ ການທີ່ພວກເຮົາໄດ້ແຊມປ໌ເຖິງ 3 ລາຍການກໍ່ເປັນສິ່ງທີ່ພິເສດຫຼາຍໆ ແນ່ນອນວ່າມັນເຈັບປວດໜ້ອຍໜຶ່ງຫຼັງຈົບຮອບເຄິ່ງຊະນະເລີດທີ່ເມືອງມິລານ (ຢູຟ່າ ແຊມປຽນສ໌ ລີກ) ແຕ່ຂ້ອຍກໍ່ດີໃຈຫຼາຍໆ ກັບການທີ່ພວກເຮົາໄດ້ແຊມປ໌ເຖິງ 3 ລາຍການ ຂ້ອຍເຊື່ອວ່າສະໂມສອນ, ບັນດານັກເຕະ ແລະ ແຟນບານກໍ່ຄົງມີຄວາມສຸກເຊັ່ນກັນ ຊ່ວງເຄິ່ງຫຼັງຂອງລະດູການພວກເຮົາຫຼິ້ນກັນໄດ້ດີເລີດຢ່າງຍິ່ງ ເພາະພວກເຮົາບໍ່ແພ້ໃນ ລາ ລີກາ ແມ່ນແຕ່ໜຶ່ງເກມດຽວ.”

ສະແດງຄຳຄິດເຫັນ