ຂປລ. ໃນວັນທີ 2 ພຶດສະພາ 2023 ທີ່ນະຄອນຫລວງວຽງຈັນ, ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ(ສສກ) ໄດ້ໃຫ້ກຽດມອບໃບຍ້ອງຍໍໃຫ້ແກ່ ທ່ານ ສຈ.ປອ ເຄອີຈິ ໂອກາວະ ຜູ້ຊ່ຽວຊານຈາກມະຫາວິທະຍາໄລ ໂກເບະ ປະເທດຍີ່ປຸ່ນ ທີ່ມີຜົນງານດີເດັ່ນໃນການປະກອບສ່ວນເຫື່ອແຮງ ແລະ ສະຕິປັນຍາ ເຂົ້າໃນການພັດທະນາວຽກງານການສຶກສາ

ແລະ ກິລາ ຢູ່ ສປປ ລາວ, ທັງເປັນການສົ່ງເສີມ, ຍາດແຍ່ງການຮ່ວມມື ແລະ ສະໜັບສະໜູນທາງດ້ານວຽກງານການສຶກສາ ແລະ ພັດທະນາຊັບພະຍາກອນມະນຸດ. ມີຫົວໜ້າກົມ, ຮອງຫົວໜ້າກົມ, ມະຫາວິທະຍາໄລແຫ່ງຊາດ, ຕາງໜ້າຈາກອົງການໄຈກາ, ນັກສຶກສາ ແລະ ຄະນະຮັບຜິດຊອບວຽກງານກ່ຽວຂ້ອງ ເຂົ້າຮ່ວມເປັນສັກຂີພິຍານ.

ໃນໄລຍະຜ່ານມາ, ທ່ານ ສຈ.ປອ ເຄອີຈິ ໂອກາວະ ໄດ້ມີຜົນງານພົ້ນເດັ່ນຫລາຍດ້ານ ເປັນຕົ້ນແມ່ນ ໄດ້ສະໜັບສະໜູນແກ່ພະນັກງານ ກະຊວງສຶກສາທິການ ແລະ ກິລາ ຈໍານວນ 5 ທຶນ ເຂົ້າຮ່ວມຝຶກອົບຮົມກ່ຽວກັບວຽກງານແຜນການ ແລະ ການເງິນ ຢູ່ທີ່ມະຫາວິທະຍາໄລໂກເບະ, ເຊື້ອເຊີນການນໍາຈາກກະຊວງສຶກສາທິການ ແລະ ກິລາ ເຂົ້າຮ່ວມກອງປະຊຸມປຶກສາຫາລື ການຮ່ວມມືຕິດພັນກັບຂະແໜງ ການສຶກສາ ທີ່ມະຫາວິທະຍາໄລໂກເບະ. ນອກຈາກນີ້, ຍັງໄດ້ຊ່ວຍເຫລືອມະຫາວິທະຍາໄລແຫ່ງຊາດ ໂດຍການເປັນຜູ້ຊ່ຽວຊານໃນໂຄງການສ້າງຄວາມເຂັ້ມແຂງ ໃນຂະແໜງການສຶກສາ ແລະ ອື່ນໆ.

ສະແດງຄຳຄິດເຫັນ