ທ່ານນາຍຍົກລັດຖະມົນຕີນາເຣນທາ ໂມດີ ຂອງອິນເດຍ ເປັນປະທານເປີດໃຊ້ງານຂົວທາງລົດໄຟສູງທີ່ສຸດໃນໂລກທີ່ແຄ້ນແຄັດເມຍເມື່ອວັນສຸກທີ່ຜ່ານມາ ຫຼັງທຸ່ມງົບໃນການກໍ່ສ້າງເຖິງ 5.9 ພັນລ້ານບາດ

ຂົວແຫ່ງນີ້ຄືຂົວເຊນາບ ສ້າງພາດຜ່ານຫຸບເຂົາໃນແຄັດເມຍ ໂດຍມີຄວາມສູງຈາກແມ່ນ້ຳເຊນາບເຖິງ 359 ແມັດ ສູງກວ່າຍອດຫໍ Eiffel ກວ່າ 29 ແມັດ ນັບເປັນໂຄງການວິສະວະກຳຂະໜາດໃຫຍ່ທີ່ໃຊ້ເວລາສ້າງດົນຫຼາຍທົດສະວັດ ແລະ ມີມູນຄ່າກວ່າ 160 ລ້ານໂດລາສະຫະລັດ ຫຼື ປະມານ 5.9 ພັນລ້ານບາດ ໂດຍມີຄວາມຍາວຂົວລວມກວ່າ 1,315 ແມັດ

ຂົວເຊນາບເປັນສ່ວນໜຶ່ງຂອງໂຄງການເຊື່ອມຕໍ່ທາງລົດໄຟສາຍທຳອິດລະຫວ່າງແຄັດເມຍກັບສ່ວນອື່ນຂອງອິນເດຍ ເຊິ່ງຖືເປັນກ້າວສຳຄັນຂອງລັດຖະບານພາຍໃຕ້ການນຳຂອງພັກຖາຣະຕິຍະຊົນຕະ ທີ່ຜັກດັນໃຫ້ພູມິພາກມຸດສະລິມສ່ວນໃຫຍ່ແຫ່ງນີ້ມີຄວາມເປັນຫນຶ່ງດຽວກັບປະເທດຫຼາຍຂຶ້ນ

ນອກຈາກຂົວເຊນາບ ທ່ານນາຍຍົກລັດຖະມົນຕີໂມດີຍັງໄດ້ເປີດຕົວໂຄງການເສັ້ນທາງລົດໄຟເຊື່ອມເມືອງອຸທັມປູ-ສີນາການ-ບາຣາມຸນລາ ໃນແຄັດເມຍ ເຊິ່ງເປັນທາງລົດໄຟທີ່ເຊື່ອມເມືອງສຳຄັນໃນແຄັດເມຍກັບອິນເດຍແຜ່ນດິນໃຫຍ່

ການເປີດຂົວຄັ້ງນີ້ເກີດຂຶ້ນບໍ່ດົນຫຼັງຈາກເຫດການສັງຫານໝູ່ໃນໝູ່ນັກທ່ອງທ່ຽວໃນແຄັດເມຍຊ່ວງເດືອນເມສາ ເຊິ່ງເຮັດໃຫ້ເກີດການປະທະທາງທະຫານໄລຍະສັ້ນລະຫວ່າງອິນເດຍກັບປາກິສະຖານ ໂດຍມີການຍິງຂີປະນາວຸດ ໂດນ ແລະ ປືນໃຫຍ່ຕອບໂຕ້ກັນຕະຫຼອດ 4 ມື້ ອິນເດຍກ່າວຫາວ່າປາກິສະຖານຢູ່ເບື້ອງຫຼັງ ແຕ່ປາກິສຖານປະຕິເສດຂໍ້ກ່າວຫາ

ແຄັດເມຍເປັນພື້ນທີ່ພິພາດລະຫວ່າງອິນເດຍ ປາກິສະຖານ ແລະ ຈີນ ເຊິ່ງຕ່າງອ້າງສິດໃນດິນແດນບາງສ່ວນ ເຮັດໃຫ້ພູມິພາກນີ້ເປັນໜຶ່ງໃນພື້ນທີ່ທີ່ມີການວາງກຳລັງທາງທະຫານໜາແໜ້ນທີ່ສຸດໃນໂລກ

ຕັ້ງແຕ່ປີ 2014 ທີ່ໂມດີເຂົ້າຮັບຕຳແໜ່ງ ລັດຖະບານຂອງອຶນເດຍໄດ້ເລັ່ງພັດທະນາໂຄງສ້າງພື້ນຖານຢ່າງຕໍ່ເນື່ອງ ໂດຍສະເພາະຖະໜົນ ແລະ ລົດໄຟໃນພື້ນທີ່ຫ່າງໄກ ເຊັ່ນໂຄງການຂົວເຊນາບ ເຊິ່ງຖືກເບິ່ງວ່າເປັນເຄື່ອງມືເຊິງສັນຍາລັກໃນການສ້າງຄວາມເປັນໜຶ່ງດຽວຂອງຊາດ ແລະ ເສີມອິດທິພົນທາງການເມືອງໃນພູມິພາກທີ່ມີຄວາມອ່ອນໄຫວ

ໃນປີ 2019 ອິນເດຍໄດ້ຍົກເລີກບົດບັນຍັດລັດຖະທຳມະນູນມາດຕາ 370 ທີ່ເຄີຍໃຫ້ແຄັດເມຍສາມາດອອກກົດໝາຍຂອງຕົນເອງໄດ້ ສົ່ງຜົນໃຫ້ລັດຈັມມູ ແລະ ແຄັດເມຍຖືກແບ່ງອອກເປັນສອງດິນແດນປົກຄອງໂດຍລັດຖະບານກາງໂດຍກົງ ເຊິ່ງລັດຖະບານໂມດີກ່າວວ່າເພື່ອເປັນການສ້າງສະຖຽນລະພາບ ຫຼຸດການສໍ້ລາດບັງຫຼວງ ແລະ ກະຕຸ້ນເສດຖະກິດ

ເຖິງແມ່ນວ່າໂຄງການໂຄງສ້າງພື້ນຖານເຫຼົ່ານີ້ຈະຖືກຍົກຍ້ອງວ່າເປັນຄວາມສຳເລັດຄັ້ງໃຫຍ່ ແຕ່ກໍເຜີນກັບສຽງວິຈານ ໂດຍສະເພາະຈາກນັກອະນຸລັກສິ່ງແວດລ້ອມທີ່ເຕືອນວ່າ ການກໍ່ສ້າງຂະໜາດໃຫຍ່ໃນເທືອກເຂົາຫິມາໄລອາດເຮັດລາຍພູມິປະເທດທີ່ເປາະບາງເຊິ່ງໄດ້ຮັບຜົນກະທົບຈາກວິກິດການພູມິອາກາດຢູ່ແລ້ວ

ໜຶ່ງໃນໂຄງການທີ່ຖືກວິຈານຢ່າງໜັກແມ່ນທາງຫຼວງ ທີ່ລັດອຸດຕະລາຂັນ ເຊິ່ງໃນເດືອນພະຈິກ 2023 ອຸໂມງທີ່ຢູ່ລະຫວ່າງກໍ່ສ້າງພັງທະລົ່ມ ເຮັດໃຫ້ຄົນງານຫຼາຍສິບຄົນຕິດຢູ່ທາງໃນດົນຫຼາຍມື້ໂດຍແທບບໍ່ມີນ້ຳ ແລະ ອົກຊີເຈນ

ກ່ອນໜ້ານັ້ນໃນເດືອນສິງຫາປີດຽວກັນ ຍັງເກີດເຫດຂົວຫັກທະລົ່ມຂະນະກໍ່ສ້າງທີ່ລັດມິໂຊລຳ ເຮັດໃຫ້ມີຜູ້ເສຍຊີວິດກວ່າ 10 ຄົນ ແລະ ໃນເດືອນມິຖຸນາ ຂົວຄອນກີດຂະໜາດ 4 ເລນທີ່ກຳລັງສ້າງຂ້າມແມ່ນ້ຳຄົງຄາທີ່ລັດພິຫານກໍທະລົ່ມລົງອີກຮອບ ຫຼັງຈາກທະລົ່ມມາເມື່ອປີກ່ອນນີ້

ຢ່າງໃດກໍຕາມ ຂົວເຊນາບຍັງຄົງຖືກຍົກຍ້ອງວ່າເປັນອີກໜຶ່ງໄຊຊະນະເຊິງສັນຍາລັກຂອງລັດຖະບານອິນເດຍທີ່ມຸ່ງໝັ້ນພັດທະນາປະເທດສູ່ການເປັນປະເທດພັດທະນາແລ້ວພາຍໃນປີ 2047.

ສະແດງຄຳຄິດເຫັນ