ຊາອຸດິ ອາຣາເບຍ ກະກຽມປົດລັອກເຫຼົ້າໃນປີ 2026 ຫຼັງຈາກບັງຄັບໃຊ້ນະໂຍບາຍຫ້າມມາດົນກວ່າ 73 ປີ ເພື່ອກະຕຸ້ນເສດຖະກິດ ພ້ອມນັກທ່ອງທ່ຽວທົ່ວໂລກ

ຊາອຸດິ ອາຣາເບຍ ກະກຽມຍົກເລີກຂໍ້ຫ້າມການຂາຍ ແລະ ການບໍລິໂພກເຄື່ອງດື່ມແອວກໍຮໍໃນປີ 2026 ຫຼັງຈາກບັງຄັບໃຊ້ນະໂຍບາຍຫ້າມມາດົນກວ່າ 73 ປີ. ການປ່ຽນແປງທີ່ສຳຄັນຄັ້ງນີ້ຈະເກີດຂຶ້ນພາຍໃຕ້ລະບົບໃບອະນຸຍາດທີ່ເຂັ້ມງວດ, ຈຳກັດໃຫ້ພຽງແຕ່ໃນເຂດທ່ອງທ່ຽວ, ໂຮງແຮມລະດັບຫ້າດາວ, ຣີສອດ, ແລະ ເຂດທາງການທູດເທົ່ານັ້ນ.

ພາຍໃຕ້ລະບຽບການໃໝ່, ເຄື່ອງດື່ມແອວກໍຮໍທີ່ມີປະລິມານບໍ່ເກີນ 20% ເຊັ່ນ: ເບຍ, ວາຍ, ແລະ ໄຊເດີ ຈະສາມາດຈຳໜ່າຍໄດ້ໃນສະຖານທີ່ທີ່ກຳນົດ, ໃນຂະນະທີ່ເຫຼົ້າແຮງຍັງຖືກຫ້າມຈຳໜ່າຍຕໍ່ໄປ. ນອກຈາກນັ້ນ, ພະນັກງານທີ່ໃຫ້ບໍລິການຈະຕ້ອງຜ່ານການອົບຮົມ ແລະ ໄດ້ຮັບໃບອະນຸຍາດຕາມຂໍ້ບັງຄັບຂອງລັດ ເພື່ອໃຫ້ແນ່ໃຈວ່າການບໍລິໂພກເປັນໄປຢ່າງມີຄວາມຮັບຜິດຊອບ.

ທັງໝົດນີ້ເປັນສ່ວນໜຶ່ງຂອງຄວາມພະຍາຍາມໃນການກະຕຸ້ນການທ່ອງທ່ຽວລະຫວ່າງປະເທດ ແລະ ກະກຽມພ້ອມສຳລັບງານລະດັບໂລກຄັ້ງໃຫຍ່ທີ່ຈະຈັດຂຶ້ນ. ເປົ້າໝາຍແມ່ນ ການປ່ຽນຜ່ານເສດຖະກິດຊາອຸດິ ອາຣາເບຍ, ຫຼຸດການພຶ່ງພານ້ຳມັນ, ແລະ ສົ່ງເສີມພາກການທ່ອງທ່ຽວ, ຄວາມບັນເທີງ, ແລະ ການລົງທຶນລະຫວ່າງປະເທດ.

ການຜ່ອນຄາຍຂໍ້ຈຳກັດກ່ຽວກັບແອວກໍຮໍມີຂຶ້ນໃນໄລຍະທີ່ຊາອຸດິ ອາຣາເບຍ ກະກຽມເປັນເຈົ້າພາບງານລະດັບໂລກ ເຊັ່ນ: ງານ World Expo 2030 ແລະ ຟຸດບອນໂລກ 2034. ຄາດວ່າຈະຊ່ວຍສ້າງວຽກເຮັດງານທຳ, ດຶງດູດແບຣນໂຮງແຮມລະດັບໂລກ, ແລະ ກະຕຸ້ນການເຕີບໃຫຍ່ຂອງອຸດສາຫະກຳທ່ອງທ່ຽວ. ໃນຂະນະດຽວກັນກໍຍັງໃຫ້ຄວາມສຳຄັນກັບການຮັກສາຄຸນຄ່າທາງສາສະໜາ ແລະ ວັດທະນະທຳອິດສະລາມ.

ສະແດງຄຳຄິດເຫັນ