ຂປລ. ໃນວັນທີ 5 ພຶດສະພາ 2023 ນີ້, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແລະ ທ່ານ ພົຕ ວັນທອງ ກອງມະນີ ຮອງລັດຖະມົນຕີ ກະຊວງ ປກສ ພ້ອມດ້ວຍພາກສ່ວນກ່ຽວຂ້ອງ ໄດ້ລົງຕິດຕາມກວດກາ ຮູບປັ້ນຫລໍ່ ປະທານ ໄກສອນ ພົມວິຫານ ທີ່ຈະນຳເອົາໄປປະດິດສະຖານ ຢູ່ວິທະຍາຄານການເມືອງປ້ອງກັນຄວາມສະຫງົບ ທີ່ໂຮງປັ້ນຫລໍ່ປະຕິມະກໍາລ້ານຊ້າງ.

ໂອກາດນີ້, ທ່ານ ບຸນສະໜອງ ສີຫາລາດ ຄະນະອໍານວຍການໂຮງປັ້ນຫລໍ່ປະຕິມະກໍາລ້ານຊ້າງ, ທັງເປັນຜູ້ຮັບຜິດຊອບຮູບປັ້ນຫລໍ່ ປະທານ ໄກສອນ ພົມວິຫານ ໄດ້ລາຍງານວ່າ: ໂຄງການສ້າງຮູບປັ້ນຫລໍ່ປະທານ ໄກສອນ ພົມວິຫານ ໄດ້ເລີ່ມລົງມືຈັດຕັ້ງປະຕິບັດແຕ່ວັນທີ 15 ມີນາ ເປັນຕົ້ນມາ, ເຊິ່ງເບື້ອງຕົ້ນໄດ້ຂຶ້ນປູນປະຫລັດ, ຂຶ້ນໂຄງຮ່າງຮູບປັ້ນດ້ວຍດິນໜຽວສໍາເລັດແລ້ວ ກໍໄດ້ໃຫ້ການນໍາມາ

ກວດກາ ໃນວັນທີ 27 ມີນາ ແລະ ໄດ້ຮັບຄໍາແນະນໍາ ຈຶ່ງໄດ້ມາປັບປຸງແກ້ໄຂແບບທີ່ມີຄວາມສູງ 7,5 ແມັດ, ມາຮອດປັດຈຸບັນ ຄະນະກວດກາກໍໄດ້ເຫັນດີໃຫ້ກ໋ອບປີ້ແບບ ເຊິ່ງໄດ້ນໍາເຜິ້ງມາກ໋ອບປີ້ໃສ່ແບບມີຢູ່ 6 ສ່ວນຄື: ສ່ວນສຽນ, ສ່ວນເອິກ, ສ່ວນຂາ, ສ່ວນຕີນ, ສ່ວນແຂນ ແມ່ນສໍາເລັດແລ້ວ ແລະ ອີກສ່ວນໜຶ່ງ ແມ່ນສ່ວນມືທີ່ກໍາລັງຈະປັ້ນ, ເມື່ອປັ້ນເຜິ້ງໃສ່ແບບກ໋ອບປີ້ແລ້ວ ແມ່ນຈະໄດ້ຫລໍ່ໃສ່ແບບໃຫ້ສໍາເລັດ ຄາດວ່າໃນເດືອນມິຖຸນາ ຈະປະກອບໃຫ້ສໍາເລັດ.

ສໍາລັບຮູບປັ້ນຫລໍ່ ປະທານ ໄກສອນ ພົມວິຫານ ແມ່ນຫລໍ່ດ້ວຍທອງສໍາລິດ ມີຄວາມສູງ 7,5 ແມັດ, ຄວາມກວ້າງໜ້າເອິກປະມານ 1,98 ແມັດ, ຄວາມກວ້າງດ້ານຫລັງ 1,44 ແມັດ, ການປັ້ນ

ຫລໍ່ຄັ້ງນີ້ ແມ່ນໃຊ້ວິຊາການທີ່ຈົບຈາກຂະແໜງວິຈິດສິນ ທີ່ມີພອນສະຫວັນທາງດ້ານສີໄມ້ລາຍມື ແລະ ຊ່າງທີ່ມີຄວາມຊໍານານໃນການປັ້ນຫລໍ່ ຄາດວ່າໃນທ້າຍເດືອນມິຖຸນາ 2023 ຈະໃຫ້ສໍາເລັດ, ພາຍຫລັງສໍາເລັດແລ້ວ ຈະໄດ້ນໍາຮູບປັ້ນຫລໍ່ ປະທານ ໄກສອນ ພົມວິຫານ ໄປປະດິດສະຖານ ໄວ້ທີ່ວິທະຍາຄານການເມືອງປ້ອງກັນຄວາມສະຫງົບ.
ຂ່າວ: ສຸກສະຫວັດ
ຂໍ້ມູນ: ພິສຸດາ

ສະແດງຄຳຄິດເຫັນ