ການພັດທະນາ Windows ຂອງ Microsoft ນັ້ນ ມັກຈະມາພ້ອມກັບຄວາມສາມາດໃໝ່ໆ ຢູ່ສະເໝີ ຊຶ່ງຫຼາຍຢ່າງນັ້ນກໍເປັນທີ່ໜ້າປະທັບໃຈສຳລັບຜູ້ໃຊ້ງານ ຫຼາຍຢ່າງສ້າງຄວາມລຳຄານ ແລະບາງຢ່າງກໍສາມາດເຮັດໃຫ້ຜູ້ໃຊ້ງານຫຼາຍລາຍສົງໄສວ່າເວລາໃຊ້ງານຈິງນັ້ນຈະເປັນແນວໃດ

ຈາກລາຍງານໂດຍເວັບໄຊທ໌ Bleeping Computer ໄດ້ກ່າວເຖິງການທີ່ Microsoft ເປີດຕົວລະບົບອັບເດດຮູບແບບໃໝ່ທີ່ Microsoft ກ່າວວ່າເປັນແພລດຟອມທີ່ຈະລວມຂໍ້ມູນຂອງທຸກສິ່ງທຸກຢ່າງທີ່ຢູ່ໃນລະບົບ Windows ຕັ້ງແຕ່ລະບົບປະຕິບັດການ, ແອັບພລິເຄຊັນຕ່າງໆ, ລວມທັງຮາດແວທີ່ຕິດຕັ້ງຢູ່ໃນເຄື່ອງໃຫ້ສາມາດອັບເດດໃໝ່ໄດ້ໂດຍຜ່ານແຕ່ຊ່ອງທາງດຽວ ເພື່ອໃຫ້ເຄື່ອງນັ້ນຢູ່ໃນສະພາບທີ່ເອີ້ນວ່າ “ອັບເດດແບບຍົກເຄື່ອງ” ໂດຍ Microsoft ພຽງແຕ່ລະບຸວ່າ ລະບົບດັ່ງກ່າວຄື “Update Orchestration Platform” ຊຶ່ງເປັນແພລດຟອມທີ່ຖືກສ້າງໂດຍຢູ່ເທິງພື້ນຖານຂອງລະບົບ Windows Update

Microsoft ໄດ້ໃຫ້ຄຳອະທິບາຍໄວ້ສຳລັບຜູ້ໃຊ້ງານທີ່ເປັນສະມາຊິກທີມພັດທະນາຜະລິດຕະພັນ IT ແລະນັກພັດທະນາຕ່າງໆ ວ່າ ສາມາດເຂົ້າຮ່ວມ (Onboard) ລະບົບໃໝ່ນີ້ໄດ້ຜ່ານທາງ Windows Runtime (WinRT) APIs ຫຼືຜ່ານທາງການໃຊ້ງານຄຳສັ່ງ PowerShell ຫຼັງຈາກທີ່ໄດ້ເຂົ້າຮ່ວມຮັບຊົມການນຳສະເໜີແບບສ່ວນຕົວ (Private Preview) ຈາກ Microsoft ໂດຍສາມາດເຂົ້າຮ່ວມໄດ້ພຽງສົ່ງອີເມວໄປຍັງ unifiedorchestrator@service.microsoft.com

ຫຼັງຈາກທີ່ຜູ້ໃຊ້ງານທີ່ເປັນທີມພັດທະນາໄດ້ເຂົ້າຮ່ວມເປັນສ່ວນໜຶ່ງຂອງໂຄງການໃນຖານະຜູ້ແຈກຈ່າຍອັບເດດ (Update Provider) ເພື່ອເຂົ້າຮ່ວມເປັນສ່ວນໜຶ່ງໃນການທົດລອງໃຊ້ງານເພື່ອເຂົ້າໃຈລະບົບແລ້ວ ເຄື່ອງມືສະແກນຂອງໂຄງການຈະສະແກນຫາອັບເດດທີ່ຍັງຄ້າງຢູ່ (Pending Updates) ເປັນປະຈຳ ຈາກນັ້ນ Orchestrator ຈະດາວໂຫຼດອັບເດດດັ່ງກ່າວເພື່ອອັບເດດໃນໄລຍະທີ່ຖືກທົດສອບແລ້ວວ່າ ຈະສາມາດອັບເດດໄດ້ດີທີ່ສຸດໂດຍທີ່ບໍ່ເປືອງຊັບພະຍາກອນຂອງລະບົບ (Optimal Time) ໂດຍພິຈາລະນານຳກິດຈະກຳຂອງຜູ້ໃຊ້ງານ, ລະດັບພະລັງງານທີ່ໃຊ້ໃນເຄື່ອງ, ແລະລະດັບການໃຊ້ງານເຄືອຂ່າຍ

ດ້ວຍລະບົບໃໝ່ນີ້ ລະບົບຈະເຂົ້າມາອຳນວຍຄວາມສະດວກໃນການອັບເດດແບບຮອບດ້ານ ບໍ່ວ່າຈະເປັນ ການຈັດການໃນການບູດເຄື່ອງໃໝ່ຫຼັງອັບເດດ (Restart), ການເຕືອນເຖິງເສັ້ນຕາຍໃນການອັບເດດ, ລວມໄປເຖິງການຕັ້ງເວລາອັບເດດໃໝ່ຢ່າງອັດຕະໂນມັດ ຖ້າອັບເດດລົ້ມເຫຼວໂດຍທີ່ຜູ້ດູແລລະບົບບໍ່ຈຳເປັນຕ້ອງເຂົ້າມາຈັດການເອງ ເປັນຕົ້ນ

ໂດຍການປ່ຽນແປງໃນຄັ້ງນີ້ Microsoft ລະບຸວ່າ ຈະຊ່ວຍໃຫ້ຜູ້ທີ່ຕ້ອງຮັບຜິດຊອບດ້ານການອັບເດດລະບົບສາມາດເຮັດວຽກໄດ້ງ່າຍກວ່າເດີມຂຶ້ນມາ ເນື່ອງຈາກແຕ່ເດີມນັ້ນການເຮັດວຽກອັບເດດລະບົບທີ່ກ່ຽວຂ້ອງກັບລະບົບນິເວດຂອງ Windows (Windows Ecosystem) ນັ້ນເປັນວຽກທີ່ຂ້ອນຂ້າງສັບສົນ ງ່າຍຕໍ່ການຕົກຫຼົ່ນ ຊຶ່ງ Microsoft ເອງຄາດຫວັງວ່າລະບົບການອັບເດດແບບລວມສູນຢ່າງຄົບຖ້ວນນີ້ຈະເຂົ້າມາຊ່ວຍອຳນວຍຄວາມສະດວກໃຫ້ກັບຜູ້ດູແລລະບົບ

ສຳລັບຫົວໜ້ວຍງານໃດທີ່ສົນໃຈໃນລະບົບການອັບເດດແບບຄົບຖ້ວນນີ້ ຂໍໃຫ້ຕິດຕາມຂ່າວຢ່າງໃກ້ຊິດ ຫຼືອາດສອບຖາມກັບ Microsoft ໂດຍກົງ ເນື່ອງຈາກຍັງບໍ່ມີການປະກາດຢ່າງເປັນທາງການເຖິງການປ່ອຍໃຊ້ງານໃຫ້ກັບລູກຄ້າທົ່ວໄປໃນເວລານີ້ແຕ່ຢ່າງໃດ

ຂ່າວຈາກ:https://www.bleepingcomputer.com/news/microsoft/microsoft-wants-windows-to-update-all-software-on-your-pc/

ສະແດງຄຳຄິດເຫັນ