ຄະນະກຳມະການປະເມີນມາດຕະຖານເມືອງທ່ອງທ່ຽວສະອາດອາຊຽນ​ ຂັ້ນແຂວງ​ ແລະ​ ຂັ້ນເມືອງ​ ນໍາໂດຍພະແນກ​ຖະແຫຼງຂ່າວ, ວັດທະນະທໍາ​ ແລະ​ ທ່ອງທ່ຽວ​ ແຂວງຈໍາປາສັກ​ ພ້ອມດ້ວຍພາກສ່ວນກ່ຽວຂ້ອງ ໄດ້ເຄື່ອນໄຫວປະເມີນ​ເບື້ອງຕົ້ນ​ ເມືອງຈໍາປາສັກ​ ເປັນເມືອງມາດຕະຖານເມືອງທ່ອງທ່ຽວສະອາດອາຊຽນ ເພື່ອຊຸກຍູ້ກຳນົດເປົ້າໝາຍ​ ແລະ​ ເງື່ອນໄຂ ສະເໜີຄັດເລືອກ​  ສະໝັກເຂົ້າຮ່ວມໃນການຮັບລາງວັນມາດຕະຖານເມືອງທ່ອງທ່ຽວສະອາດອາຊຽນປະຈໍາປີ 2026, ໃນວັນທີ​ 10 ມີຖຸນາ​ 2025 ຜ່ານມານີ້

ການເຄື່ອນໄຫວປະເມີນ​ຄັ້ງນີ້​ ໄດ້ຕິດຕາມກວດກາເບິ່ງ​ຈຸດສໍາຄັນຕ່າງໆ ທີ່ເປັນສະຖານທີ່ບໍລິການ, ສະຖານທີ່ສາທາລະນະ ທີ່ເປັນຈຸດກ່ຽວພັນກັບການທ່ອງທ່ຽວ ທີ່ມີນັກທ່ອງທ່ຽວ ຫຼື ມວນຊົນເຂົ້າມາໃຊ້ບໍລິການ ເຊັ່ນ: ຕະຫຼາດດອນຕະລາດ, ສວນສາທາລະນະວັດສີສຸມັງ, ສະຖານທີ່ທ່ອງທ່ຽວວັດພູຈໍາປາສັກ, ຮ້ານຂາຍເຄື່ອງຜະລິດຕະພັນຫັດຖະກໍາ,​ ຮ້ານເຄື່ອງປັ້ນດິນເຜົາ,​ ສະຖານທີ່ທ່ອງທ່ຽວວັດເມືອງກາງ​, ຮ້ານຫັດຖະກຳໄມ້ປ່ອງ ແລະ​ ອື່ນໆ

ການເຄື່ອນໄຫວປະເມີນແຕ່ລະຈຸດ​ ກໍໄດ້ຮັບຟັງ ການລາຍງານຈາກຜູ້ຮັບຜິດຊອບສະຖານທີ່​ ກ່ຽວກັບການຮັກສາຄວາມສະອາດ ໃຫ້ເປັນພື້ນທີ່ສີຂຽວ, ພ້ອມນັ້ນ​ ຄະນະກໍາມະການທີ່ເຂົ້າຮ່ວມການປະເມີນ ກໍໄດ້ມີຄໍາແນະນໍາໃຫ້ຜູ້ປະກອບການ ກໍຄືຜູ້ຮັບຜິດຊອບສະຖານທີ່​ ເອົາໃຈໃສ່ຈັດຕັ້ງປະຕິບັດຕາມມາດຕະຖານເມືອງທ່ອງທ່ຽວສະອາດອາຊຽນ ເພື່ອເປັນພື້ນຖານເຮັດໃຫ້ເມືອງຈໍາປາສັກ​ ໄດ້ຮັບລາງວັນເມືອງທ່ອງທ່ຽວສະອາດອາຊຽນ ໃນອະນາຄົດອັນໃກ້ນີ້

ສໍາລັບ ເນື້ອໃນການປະເມີນມາດຕະຖານເມືອງທ່ອງທ່ຽວສະອາດອາຊຽນ: ການຄຸ້ມຄອງສິ່ງແວດລ້ອມ, ຄວາມສະອາດ, ການກຳຈັດສິ່ງເສດເຫຼືອ, ການປູກຈິດສໍານຶກການຮັກສາສິ່ງແວດລ້ອມ ແລະ ຄວາມສະອາດພື້ນທີ່ສີຂຽວ, ຄວາມປອດໄພດ້ານສຸຂະພາບ, ຄວາມປອດໄພ ແລະ ຄວາມສະຫງົບໃນເມືອງ, ໂຄງລ່າງພື້ນຖານ ແລະ ສິ່ງອໍານວຍຄວາມສະດວກດ້ານການທ່ອງທ່ຽວ

ສະແດງຄຳຄິດເຫັນ