ທີມນັກກິລາເທັນນິດທີມຊາດລາວ ຈໍານວນ 4 ຄົນ ແລະ ຄູຝຶກ 1 ຄົນ ຈະເຂົ້າຮ່ວມແຂ່ງຂັນເທັນນິດປະເພດທີມຍິງ ຊີງແຊ້ມໂລກ ກຸ່ມ 3 ຫຼື ລາຍການ ບິລີ ຈີນ ຄິງ ຄັບ 2025 (Billie Jean King Cup 2025 by Gainbridge ASIA/OCEANIA group 3) ຈະຈັດຂຶ້ນ ລະຫວ່າງວັນທີ 16-21 ມີຖຸນາ 2025 ທີ່ປະເທດຈໍແດນ

 

 

ການແຂ່ງຂັນລາຍການນີ້, ຢູ່ກຸ່ມ 3 ມີທັງໝົດ 20 ປະເທດ ຮ່ວມແຂ່ງຂັນທີ່ 2 ປະເທດ ຄື: ປະເທດສີລັງກາ ແລະ ປະເທດຈໍແດນ, ສໍາລັບ ທີມນັກກິລາລາວ ຢູ່ຮ່ວມກັບ ຫວຽດນາມ, ກວມ, ມາເກົາ, ເມົາດິບ, ບຣູໄນ, ຊາອຸດິອາຣາເບຍ, ພູຕານ, ບາເຣນ ແລະ ຈໍແດນ (ເຈົ້າພາບ)

 

ການແຂ່ງຂັນເທັນນິດປະເພດທີມຍິງ ຊີງແຊ້ມໂລກ ຄັ້ງນີ້ ມີທັງໝົດ 4 ກຸ່ມ, ສໍາລັບ ກຸ່ມ 1 ແລະ ກຸ່ມ 2 ແມ່ນຢືນລໍຖ້າໃນການແຂ່ງຂັນລະດັບສູງສຸດ, ສ່ວນ ກຸ່ມ 3 ທີ່ 20 ຊາດ ແລະ ມີນັກກິລາລາວ ຮ່ວມຢູ່ນຳ ຊຶ່ງກຸ່ມນີ້ ຫາກນັກກິລາຊາດໃດຊະນະຄະແນນຫຼາຍທີ່ສຸດ ອັນດັບທີ 1 ແລະ ອັນດັບທີ 2 ຂອງກຸ່ມ ຈະຖືກເລື່ອນຂຶ້ນໄປແຂ່ງຂັນໃນກຸ່ມ 1 ແລະ ກຸ່ມ 2, ຂະນະທີ່ ກຸ່ມ 4 ກໍຈະຕ້ອງແຂ່ງຂັນເພື່ອຍາດໂຄຕ້າ ໄປແຂ່ງຂັນໃນກຸ່ມ 3 ຕາມລຳດັບ

 

 

ມື້ວັນທີ 10 ມິຖຸນາ 2025 ຜ່ານມານີ້ ທີ່ນະຄອນຫຼວງວຽງຈັນ, ທາງບໍລິສັດ ຫວັງ ອິນເວັສເມັນ ຈໍາກັດ (Wang Investment Sole Co., LTD) ໄດ້ມອບເງິນ ຈໍານວນ 4.000 ໂດລາສະຫະລັດ ຫຼື ປະມານ 85 ລ້ານກວ່າກີບ ເພື່ອສະໜັບສະໜູນໃຫ້ແກ່ທີມນັກກິລາເທັນນິດທີມຊາດລາວ ກຽມເຂົ້າຮ່ວມແຂ່ງຂັນເທັນນິດລາຍການນີ້, ຕາງໜ້າກ່າວມອບໂດຍທ່ານ ນາງ ຢ້າວຢ້າວ (YaoYao) ຮອງປະທານ ບໍລິສັດ ຫວັງ ອິນເວັສເມັນ ຈໍາກັດ ແລະ ຕາງໜ້າກ່າວຮັບໂດຍທ່ານ ດາວວອນ ພະຈັນທະວົງ ປະທານສະຫະພັນເທັນນິດແຫ່ງຊາດລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ

ສະແດງຄຳຄິດເຫັນ