ພໍເຖິງເດືອນ 5-8 ຂອງທຸກໆປີ ແມ່ນລະດູການທີ່ໝາກນັດໃຫ້ຜົນຜະລິດແກ່ຊາວສວນ ກໍຄືສັງຄົມໄດ້ບໍລິໂພກຢ່າງເຕັມສ່ວນ, ໝາກນັດມີຫຼາຍສາຍພັນ ແຕ່ໃນບົດນີ້ຈະເວົ້າເຖິງໝາກນັດສາຍພັນນໍ້າເຜິ້ງ ທີ່ຊາວສວນຂອງບ້ານຜາເມືອງປູກໄວ້ເພື່ອບໍລິໂພກພາຍໃນຄອບຄົວ ແລະ ຂາຍສົ່ງອອກ ໃຫ້ລູກຄ້າທົ່ວໄປໄດ້ບໍລິໂພກເຊັ່ນກັນ

ທ່ານນາງ ອໍາໄພພອນ ປັດຈຸບັນຢູ່ບ້ານຜາເມືອງ ເມືອງບໍລິຄັນ ແຂວງບໍລິຄໍາໄຊ ໄດ້ນໍາຜົນຜະລິດພືດກະສິກໍາມາວາງສະແດງ ແລະ ຂາຍ ໃນງານກະສິກໍາ ລາວ-ເກົາຫຼີ (Laos-Korea Agro Fair) ທີ່ສູນການຄ້າ ລາວ-ໄອເຕັກຕຶກເກົ່າ ນະຄອນຫຼວງວຽງຈັນ ເມື່ອບໍ່ດົນຜ່ານມານີ້. ພາຍໃນງານນອກຈາກນໍາໝາກນັດສົດມາວາງຂາຍແລ້ວ, ຍັງມີກວນໝາກນັດ, ເຫຼົ້າຂາວທີ່ຜະລິດຈາກເຂົ້າໄກ່ນ້ອຍ, ສົ້ມໝູ, ນໍ້າອ້ອຍກ້ອນ, ໜັງເຄັມ, ຜ້າກັນເປື້ອນຊົນເຜົ່າ. ສິນຄ້າທີ່ນໍາມາຂາຍ ລາຄາເລີ່ມແຕ່ 10 ພັນກີບ ແລະ ລາຄາ 120 ພັນກີບແມ່ນຜ້າກັນເປື້ອນຊົນເຜົ່າ ແລະ ຜະລິດຕະພັນອື່ນ

ທ່ານນາງ ອໍາໄພພອນ ກ່າວຕື່ມວ່າ: ດີໃຈຫຼາຍ ທີ່ໄດ້ນໍາເອົາຜະລິດຕະພັນ ຂອງບ້ານຜາເມືອງມາວາງສະແດງ ແລະ ຂາຍໃນງານ Laos-Korea Agro Fair ທີ່ສູນການຄ້າລາວ-ໄອເຕັກຕຶກເກົ່າ ນະຄອນຫຼວງວຽງຈັນ. ການນໍາເອົາສິນຄ້າມາຄັ້ງນີ້ ເປັນຄັ້ງທໍາອິດ ຈຶ່ງຂໍຂອບໃຈນໍາໂຄງການທີ່ໄດ້ໃຫ້ທຶນ ແລະ ສະໜັບສະໜູນໃນການແນະນໍາຄວາມຮູ້ດ້ານວິຊາການ ຊ່ວຍປະຊາຊົນພາຍໃນບ້ານ ໂດຍສະເພາະກຸ່ມປູກຝັງ-ລ້ຽງສັດ ໃຫ້ມີການພັດທະນາໄປໃນທາງທີ່ດີ, ສ້າງໃຫ້ກຸ່ມມີຄວາມເຕີບໃຫຍ່, ເຂັ້ມແຂງເປັນກ້າວໆ, ເຫັນໄດ້ເຖິງຄວາມແຕກຕ່າງຈາກໃນເມື່ອກ່ອນ ຊີວິດການເປັນຢູ່ຂອງປະຊາຊົນ ເວົ້າລວມ, ເວົ້າສະເພາະ ພາຍໃນກຸ່ມມີຊີວິດນັບມື້ດີຂຶ້ນ ຍ້ອນມີລາຍຮັບຈາກຜົນຜະລິດກະສິກໍາ ປູກຫຼາຍໆ ເຫຼືອກິນ ແລະ ສົ່ງອອກຂາຍທີ່ຕະຫຼາດພາຍໃນບ້ານ ແລະ ສົ່ງໃຫ້ແມ່ຄ້າ, ພໍ່ຄ້າມາຮັບເກັບຊື້ຢູ່ສວນ. ຖ້າເປັນໄປໄດ້ ເມື່ອສິ້ນສຸດໂຄງການຢາກໃຫ້ອົງການກອຍກ້າ ເຂົ້າໄປຊ່ວຍສະໜັບສະໜູນຕື່ມ ແລະ ຢາກນໍາເອົາຜົນຜະລິດອອກວາງຈໍາໜ່າຍທີ່ສູນການຄ້າໄອເຕັກຕື່ມອີກ ເພາະວ່າສິນຄ້າທີ່ນໍາມາຂາຍ ລ້ວນແລ້ວແຕ່ແມ່ນຜົນທີ່ໄດ້ຈາກແຮງງານຂອງປະຊາຊົນ ກໍຄື ກຸ່ມຜະລິດພາຍໃນບ້ານ ທັງເປັນການປັບປຸງຊີວິດການເປັນຢູ່ ຂອງປະຊາຊົນພາຍໃນບ້ານຜາເມືອງນັບມື້ດີຂຶ້ນເລື້ອຍໆ

ໝາກນັດຫວານ ສາຍພັນນໍ້າເຜິ້ງ ປູກຢູ່ເຂດພູສູງຂອງບ້ານຜາເມືອງ ເກັບຜົນຜະລິດໄດ້ພຽງ 1 ເທື່ອ ຕໍ່ປີ ເລີ່ມເກັບລະຫວ່າງເດືອນ 5-8 ເທົ່ານັ້ນ ເນື້ອທີ່ປູກ ປະມານ 18 ເຮັກຕາ ຊຶ່ງການເກັບກໍາພຽງແຕ່ 10 ຄອບຄົວ, ການປູກໝາກນັດ ເປັນພຽງອາຊີບເສີມຂອງປະຊາຊົນ, ອາຊີບຫຼັກ ແມ່ນເຮັດນາ-ສວນ ປູກເຂົ້າ, ປູກຢາງພາລາ

ຜົນຜະລິດຈາກໝາກນັດ ນອກຈາກຂາຍເປັນໜ່ວຍແລ້ວ ຍັງນໍາເອົາມາແປຮູບ ດ້ວຍການເຮັດກວນ ເພື່ອເກັບຮັກສາເອົາໄວ້ບໍລິໂພກຍາມໝົດລະດູການ, ປັດຈຸບັນໝາກນັດ ລາຄາຂາຍຍ່ອຍ 1 ໜ່ວຍໃຫຍ່ 20 ພັນກີບ, ລາຍຮັບທີ່ໄດ້ຈາກການຂາຍ ແມ່ນໄດ້ນໍາໄປຝາກທີ່ທະນາຄານ, ສ່ວນໜຶ່ງແມ່ນນໍາມາໝູນໃຊ້ໃຫ້ກັບສະມາຊິກພາຍໃນຄອບຄົວ, ສົ່ງລູກເຂົ້າຮຽນ, ປັບປຸງໃຫ້ຊີວິດການເປັນຢູ່ພາຍໃນຄອບຄົວໃຫ້ດີຂຶ້ນເປັນກ້າວໆ. ຖ້າຫາກວ່າທ່ານໃດມີຄວາມສົນໃຈຢາກສັ່ງຈອງຜະລິດຕະພັນກະສິກໍາ ຂອງບ້ານຜາເມືອງ ກໍຕິດຕໍ່ໄດ້ທີ່ເບີ: 020 96594929

ໃນແຜນຕໍ່ໜ້າ ຈະສືບຕໍ່ເອົາໃຈໃສ່ ຂອດການຜະລິດ-ປຸງແຕ່ງຜົນກະສິກໍາໃຫ້ຫຼາຍ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງສັງຄົມ ກໍຄືຜູ້ບໍລິໂພກ

ສະແດງຄຳຄິດເຫັນ