ແມນເຊສເຕີ ຢູໄນເຕັດ ເລີ່ມຕົ້ນຕິດຕໍ່ ເອມິເລີຍໂນ່ ມາຕີເນສ ນາຍທວານຂອງ ແອສຕັນ ວິລລາ ດ້ວຍຄວາມຫວັງທີ່ຈະດຶງມາແທນ ອ່ອງເດຣ ໂອນານາ ຫຼັງຈາກມີຂ່າວວ່າຕົວເຂົາເອງສົນໃຈທີ່ຈະຍ້າຍມາເຂົ້າຮ່ວມ “ປີສາດແດງ” ຕາມລາຍງານຈາກສື່ມວນຊົນອາເຈນຕິນາ

ນາຍທວານຫຼັກຂອງ ແມນຍູ ໃນເວລານີ້ແມ່ນ ອ່ອງເດຣ ໂອນານາ ແຕ່ວ່າ ຕົວເຂົາເອງໄດ້ເຮັດໃຫ້ເກີດຄວາມຜິດພາດມາຕະຫຼອດ ຈົນຫຼາຍຝ່າຍຢາກໃຫ້ມີການປ່ຽນແປງໃນຊ່ວງຮ້ອນນີ້ ໃນຂະນະທີ່ ນາຍທວານທີມຊາດອາເຈນຕິນາ ອາຍຸ 32 ປີ ກໍຄືກັບວ່າຈະພ້ອມທີ່ຈະອຳລາ ແອສຕັນ ວິລລາ ເຊັ່ນກັນ

ເລໂອ ປາຣາດິໂຊ່ ນັກຂ່າວຂອງ ອີເອສພີເອັນ ອາເຈນຕິນາ ລາຍງານວ່າ “ການສົນທະນາໄດ້ເລີ່ມແລ້ວ ມີການຕິດຕໍ່ເພື່ອໃຫ້ ມາຕີເນສ ສາມາດມາເຂົ້າຮ່ວມທີມ ແມນເຊສເຕີ ຢູໄນເຕັດ”

“ຈາກທຸກໆຄວາມເປັນໄປໄດ້ທີ່ລາວມີໃນອະນາຄົດອັນໃກ້ນີ້ ແມນເຊສເຕີ ຢູໄນເຕັດ ແມ່ນສິ່ງທີ່ເຮັດໃຫ້ລາວຕື່ນເຕັ້ນຫຼາຍທີ່ສຸດ”

“ສະໂມສອນຕ່າງໆ ກຳລັງນຳໃຊ້ເວລາຂອງພວກເຂົາ ແຕ່ແມ່ນແລ້ວ ຂ້ອຍສາມາດຢືນຢັນໄດ້ວ່າ ການຕິດຕໍ່ລະຫວ່າງ ແມນຍູ ກັບ ມາຕີເນສ ໄດ້ເລີ່ມຂຶ້ນແລ້ວ” ປາຣາດິໂຊ່ ປິດທ້າຍ

ສະແດງຄຳຄິດເຫັນ