ມີຜູ້ເສຍຊີວິດ 7 ຄົນ ຈາກເຫດການເຮລິຄອບເຕີປະສົບອຸບັດຕິເຫດຕົກໃນປ່າ ໃນລັດອຸດຕະຣາຄັນ ຂອງອິນເດຍ ເຊິ່ງນັບເປັນອຸບັດຕິເຫດທາງເຮລິຄອບເຕີຄັ້ງທີ 5 ຢູ່ເສັ້ນທາງດັ່ງກ່າວ ໃນຮອບບໍ່ເຖິງ 2 ເດືອນ

ເຮລິຄອບເຕີໄດ້ພາຜູ້ໂດຍສານເດີນທາງຈາກວັດເກດາຣະນາດ ໄປຫາເມືອງກຸບຕະກາສີໃນລັດອຸດຕະຣາຄັນ ປະສົບອຸບັດຕິເຫດຕົກໃນປ່າ ໂດຍຜູ້ເສຍຊີວິດທັງ 7 ຄົນຈາກອຸບັດຕິເຫດເຮລິຄອບເຕີຂອງບໍລິສັດອາຣຽນ ເອເວຍຊັນ ຮວມທັງນັກບິນດ້ວຍ ລະຫວ່າງການເດີນທາງ 10 ນາທີ

ຕາມຄຳຖະແລງການຂອງສຳນັກງານພັດທະນາການບິນພົນລະເຮືອນອຸດຕະຣາຄັນ ເຫດການດັ່ງກ່າວເກີດຂຶ້ນໃນຊ່ວງເຊົ້າຕົ້ນ ເວລາ 05:20 ໂມງ ວັນທີ (15 ມີຖຸນາ) ຕາມເວລາທ້ອງຖິ່ນ ມີຜູ້ໂດຍສານ 7 ຄົນ ປະກອບດ້ວຍ ຜູ້ສະແວງບຸນ 6 ຄົນ ເປັນຜູ້ໃຫຍ່ 5 ຄົນ ແລະເດັກອາຍຸ 23 ເດືອນ 1 ຄົນ ແລະ ນັກບິນ 1 ຄົນ ໂດຍຜູ້ໂດຍສານທັງໝົດຖືກໄຟໄໝ້ເສຍຊີວິດ ຂະນະທີ່ເຮລິຄອບເຕີກຳລັງເດີນທາງກັບຫລັງຈາກຢ້ຽມຊົມວັດເກດາຣະນາດ ສະພາບອາກາດໄດ້ຮ້າຍລົງ ນັກບິນພະຍາຍາມນຳເຮລິຄອບເຕີບິນຈາກຮຸບເຂົາ ແຕ່ປະສົບເຫດຕົກກ່ອນ ໂດຍຜູ້ໂດຍສານມາຈາກລັດອຸດຕະຣາຄັນ ລັດອຸດຕະຣະປະເທດ ລັດມະຫາຣາສະຕະຣະ ແລະລັດກຸຊະລາດ

ຊາວບ້ານເຊິ່ງອອກໄປຫາອາຫານສຳລັບງົວ ສັງເກດເຫັນເຮລິຄອບເຕີທີ່ຕົກ ແລະ ແຈ້ງໃຫ້ເຈົ້າໜ້າທີ່ຮັບຮູ້ ທີມຈາກກອງກຳລັງຕອບສະໜອງໄພພິບັດແຫ່ງຊາດ (NDRF) ແລະ ກອງກຳລັງຕອບສະໜອງໄພພິບັດຂອງລັດ (SDRF) ເດີນທາງມາເຖິງຈຸດເກີດເຫດເວລາ 07:00 ໂມງ ຈາກນັ້ນພວກເຂົາກໍ່ເລີ່ມເດີນທາງໄປຫາຈຸດເກີດເຫດ ແລະ ເລີ່ມປະຕິບັດການກູ້ໄພໃນເວລາ 08:55 ໂມງ ຈົນເຖິງຂະນະນີ້ສາມາດກູ້ຮ່າງຜູ້ເສຍຊີວິດໄດ້ 2 ຄົນ ແລະ ເນື່ອງຈາກການລະບຸຕົວຕົນຂອງສົບເຮັດໄດ້ຍາກ ຈຶ່ງຕ້ອງກວດດີເອັນເອກ່ອນສົ່ງມອບສົບໃຫ້ກັບຄອບຄົວ

ດ້ານສຳນັກງານສືບສວນອຸບັດຕິເຫດເຄື່ອງບິນຕົກ (AAIB) ຈະທຳການສອບສວນເຫດການເຄື່ອງບິນຕົກຄັ້ງນີ້

ນີ້ເປັນອຸບັດຕິເຫດຄັ້ງທີ 5 ນັບຕັ້ງແຕ່ວັດເກດາຣະນາດໃນເທືອກເຂົາຫິມາໄລ ເປີດທຳການເມື່ອວັນທີ 2 ພຶດສະພາ ສົ່ງຜົນໃຫ້ມີຜູ້ເສຍຊີວິດ 13 ຄົນ. ກ່ອນໜ້ານີ້ ເມື່ອວັນທີ 7 ມີຖຸນາ ເຮລິຄອບເຕີລຳຫນຶ່ງເຊິ່ງກຳລັງມຸ່ງໜ້າໄປເມືອງເກດາຣະນາດ ຕ້ອງລົງຈອດຢູ່ທາງຫລວງໃນລັດອຸດຕະຣາຄັນ ຫຼັງປະສົບເຫດຂັດຂ້ອງທາງເທັກນິກຂະນະຂຶ້ນບິນ ໂດຍເຮລິຄອບເຕີໄດ້ເຂົ້າໃກ້ຕົວອາຄານຢ່າງອັນຕະລາຍ ແລະ ໃບພັດຫ້າງຂອງເຮລິຄອບເຕີກໍ່ຕົກລົງໄປທັບລົດທີ່ຈອດຢູ່ ຜູ້ສະແວງບຸນທັງ 5 ຄົນທີ່ຢູ່ເທິງເຄື່ອງສາມາດອອກມາໄດ້ຢ່າງປອດໄພ ສ່ວນນັກບິນໄດ້ຮັບບາດເຈັບເລັກນ້ອຍ

ເຫດການນີ້ຍັງເກີດຂຶ້ນຫລັງເຄື່ອງບິນໂດຍສານໂບອິ້ງ 787 ດຣີມໄລເນີຂອງສາຍການບິນແອຣ໌ອິນເດຍ ຕົກທີ່ເມືອງອາຫ໌ເມດາບາດ ເມື່ອວັນທີ 12 ມີຖຸນາ ມີຜູ້ໂດຍສານ ແລະ ລູກເຮືອຢູ່ເທິງເຄື່ອງບິນເສຍຊີວິດເກືອບທັງລຳ 241 ຄົນ ແລະ ມີຜູ້ໂດຍສານລອດຊີວິດພຽງຄົນດຽວ ນອກຈາກນີ້ ຍັງມີຜູ້ເສຍຊີວິດຢູ່ພື້ນລຸ່ມຈາກການທີ່ເຄື່ອງບິນຕົກໃສ່ອາຄານຫໍພັກຂອງວິທະຍາໄລແພດ ເຈົ້າໜ້າທີ່ກູ້ໄພໃນທີ່ເກີດເຫດໄດ້ກູ້ສົບໄດ້ແລ້ວ 270 ຄົນ.

ສະແດງຄຳຄິດເຫັນ