ແຂວງຄໍາມ່ວນ ຄາດ​ຄະ​ເນຜົນຜະລິດເຂົ້ານາປີ 351.604 ໂຕນ ໃນ​ລະ​ດູ​ການ​ຜະ​ລິດ ປີນີ້.

ປະ​ຈຸ​ບັນ ຊາວ​ກະ​ສິ​ກອນ ເລີ່ມ​ລົງ​ມື​ປູກ​ເຂົ້າ​ນາ​ປີ. ທົ່ວແຂວງ ມີເນື້ອທີ່ແຜນການປູກເຂົ້ານາລວມທັງໝົດ 92.791 ເຮັກຕາ ແລະ ຄາດຄະເນແນວປູກ 5.567 ໂຕນ.

ເມື່ອສົມທຽບແຜນການປູກເຂົ້ານາປີ ຂອງປີນີ້ ໃສ່ກັບປີຜ່ານມາເຫັນວ່າ ເນື້ອທີ່ເພີ່ມຂຶ້ນ 1.519 ເຮັກຕາ. ສາເຫດ ທີ່ພາໃຫ້ເນື້ອທີ່ນາປີ ເພີ່ມຂຶ້ນຍ້ອນວ່າຊາວນາ ໃນແຕ່ລະເມືອງ ໄດ້ມີການບຸກເບີກເນື້ອທີ່ເພີ່ມຕື່ມ.

ຜ່ານການຈັດຕັ້ງປະຕິບັດຕົວຈິງມາຮອດປະຈຸບັນ ສາມາດປູກເຂົ້າ ໄດ້ 40.586 ເຮັກຕາ ຫຼື ເທົ່າກັບ 43,74 % ຂອງເນື້ອທີ່ແຜນການທັງໝົດ. ໃນນັ້ນ ນາຫວ່ານ ປະຕິບັດໄດ້ 26.047 ເຮັກຕາ ເທົ່າກັບ 28,07 %, ນາດໍາປະຕິບັດໄດ້ 14.540 ເຮັກຕາ ເທົ່າກັບ 15,67 % .

ສ່ວນການຕົກກ້າ ມາຮອດປະຈຸບັນ ແມ່ນໝົດແນວເຂົ້າປູກໄປແລ້ວ 4.965 ໂຕນ ຫຼື ເທົ່າກັບ 89,19 % ຂອງແນວປູກທັງໝົດ. ສໍາລັບເມືອງທີ່ມີເນື້ອທີ່ແຜນການປູກເຂົ້ານາປີຫຼາຍ ແມ່ນປະກອບມີ: ເມືອງໜອງບົກ , ເມືອງທ່າແຂກ , ເມືອງມະຫາໄຊ , ເມືອງໄຊບົວທອງ , ເມືອງຫີນບູນ,ເມືອງຍົມມະລາດ ແລະ ເມືອງເຊບັ້ງໄຟ ຕາມລໍາດັບ.

ການປູກເຂົ້າ ຂອງຊາວນາໃນແຕ່ລະເຂດ ຂອງແຂວງຄໍາມ່ວນ ສ່ວນຫຼາຍແມ່ນສຸ່ມໃສ່ນາຫວ່ານ ເນື່ອງຈາກວ່າມີຂໍ້ດີຫຼາຍຢ່າງ ເປັນຕົ້ນແມ່ນປະຢັດແຮງງານ,ປະຢັດຕົ້ນທຶນການຜະລິດ ແລະ ປະຢັດເວລາ. ສໍາລັບການປູກເຂົ້າເນີນສູງ ສໍາເລັດໃນເນື້ອທີ່ 288 ເຮັກຕາ.

ນອກ​ຈາກນັ້ນ ແຂວງກໍ່​ຍັງ​ວາງ​ແຜນປູກພືດເພື່ອເປັນສະບຽງອາຫານ ໃນ​ເນື້ອ​ທີ່ 61.189 ເຮັກຕາ, ຄາດຄະເນຜົນຜະລິດ 228.856 ໂຕນ ແລະ ແຜນການປູກພືດເພື່ອເປັນສິນຄ້າ 31.602 ເຮັກຕາ , ຄາດຄະເນຜົນຜະລິດ 122.748 ໂຕນ .

ສະແດງຄຳຄິດເຫັນ