ຕາມບົດລາຍງານຂອງລັດຖະບານໃນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ IX, ໄດ້ລາຍງານຜົນການຈັດຕັ້ງປະຕິບັດວຽກງານປັບປຸງ ຄຸນນະພາບການສຶກສາ ວ່າ: ມີ 12 ຄາດໝາຍທີ່ສາມາດບັນລຸໄດ້ ແລະ ມີ 4 ຄາດໝາຍທີ່ບໍ່ສາມາດບັນລຸໄດ້

 

ສຳລັບ 4 ຄາດໝາຍທີ່ບໍ່ສາມາດບັນລຸໄດ້ ມີດັ່ງນີ້:

 

1. ອັດຕາເຂົ້າຮຽນໃໝ່ລວມ ປ.5 ໄດ້ 95.5%, (ຄາດໝາຍ 97%)

• ອັດຕາປະລະການຮຽນຂອງນັກຮຽນ ຊັ້ນປະຖົມ ໄດ້ 4.6%, (ຄາດໝາຍ 4%)

• ອັດຕາຮຽນຈົບຊັ້ນປະຖົມສຶກສາ ບັນລຸພຽງແຕ່ 93.3%, (ຄາດໝາຍ 94%)

• ອັດຕາເຂົ້າຮຽນໃໝ່ລວມຊັ້ນມັດທະຍົມຕອນຕົ້ນ ມ.4 ບັນລຸພຽງແຕ່ 61.4%, (ຄາດໝາຍ 64%)

 

ສາເຫດທີ່ເຮັດໃຫ້ອັດຕາປະລະການຮຽນສູງ ແລະ ອັດຕາເຂົ້າຮຽນບໍ່ບັນລຸຄາດໝາຍ, ຍ້ອນບັນຫາເສດຖະກິດຄອບຄົວ, ພໍ່ແມ່ຜູ້ປົກຄອງປະສົບບັນຫາທາງການເງິນ, ພວກເຂົາບໍ່ສາມາດຈ່າຍຄ່າຮຽນໃຫ້ລູກຮຽນຕໍ່ໄດ້

 

ນັກຮຽນມັດທະຍົມສ່ວນຫຼາຍໄດ້ອອກໂຮງຮຽນໄປຊ່ວຍວຽກພໍ່ແມ່ ແລະ ຊອກວຽກເຮັດງານທຳ, ເພື່ອຫາເງິນມາລ້ຽງຄອບຄົວ, ເນື່ອງຈາກຄ່າຄອງຊີບແພງ

 

ສຳລັບ 12 ຄາດໝາຍທີ່ບັນລຸໄດ້, ໃນບົດລາຍງານໄດ້ຍົກໃຫ້ເຫັນຄາດໝາຍທີ່ພົ້ນເດັ່ນ:

 

1. ນັກຮຽນ ຈົບຊັ້ນມັດທະຍົມຕອນຕົ້ນ ໄດ້ເຂົ້າຮຽນຕໍ່ໃນສາຍ ອາຊີວະສຶກສາ ແລະ ອົບຮົມວິຊາຊີບ ບັນລຸໄດ້ 5.7% (ຄາດໝາຍ 3%)
2. ອັດຕາເຂົ້າຮຽນຂອງເດັກ ອາຍຸ 5ປີ ເພີ່ມຈາກ 83% ເປັນ 84%
3. ອັດຕາການປະລະການຮຽນ ຊັ້ນ ປ.1 ຫຼຸດລົງຈາກ 6% ເປັນ 5%

 

ລັດຖະບານໄດ້ສຸມໃສ່ວຽກງານປັບປຸງຄຸນນະພາບການສຶກສາໃນທຸກລະດັບໃຫ້ສູງຂຶ້ນ, ພ້ອມທັງສ້າງເງື່ອນໄຂການເຂົ້າເຖິງການສຶກສາ ເພື່ອໃຫ້ມີຄວາມພ້ອມໃນການເຊື່ອມໂຍງກັບພາກພື້ນ ແລະ ສາກົນ ທັງເປັນການຮອງຮັບອຸດສາຫະກໍາໃນຍຸກປັດຈຸບັນ

 

ສະນັ້ນຈຶ່ງເຮັດໃຫ້ບັນດາຄາດໝາຍໃນແຜນພັດທະນາເສດຖະກິດ-ສັງຄົມ ແຫ່ງຊາດ (ຂະແໜງການສຶກສາ ແລະ ກິລາ) ໄດ້ບັນລຸຕາມຄາດໝາຍທີ່ວາງໄວ້

ສະແດງຄຳຄິດເຫັນ