ນັບແຕ່ທາງລົດໄຟລາວ-ຈີນ ເປີດດຳເນີນງານເປັນຕົ້ນມາ, ການຂົນສົ່ງສິນຄ້າໄດ້ເຕີບໂຕຢ່າງແຂງແຮງ, ສະເພາະປີ 2025 ມາຮອດວັນທີ 28 ມິຖຸນາ ປະລິມານການຂົນສົ່ງສິນຄ້າຜ່ານທາງລົດໄຟລາວ-ຈີນ ບັນລຸເຖິງ 3,000,000 ໂຕນ, ເພີ່ມຂຶ້ນ 8.8% ເມື່ອທຽບໃສ່ໄລຍະດຽວກັນຂອງປີຜ່ານມາ, ກາຍເປັນຊ່ອງທາງຂົນສົ່ງຫຼັກທີ່ມີປະສິດທິພາບໃນການສົ່ງອອກສິນຄ້າຂອງລາວ ແລະ ປະເທດອ້ອມຂ້າງ.

ເພື່ອເປັນການກະຕຸ້ນການສົ່ງອອກ, ປະກອບສ່ວນເຂົ້າໃນການສ້າງສາພັດທະນາເສດຖະກິດຂອງລາວ, ພ້ອມຍົກລະດັບການຂົນສົ່ງສິນຄ້າທາງລົດໄຟໃຫ້ມີປະສິດທິພາບສູງກວ່າເກົ່າ, ໃນໄລຍະຜ່ານມາ ທາງລົດໄຟລາວ-ຈີນ ໄດ້ໃຫ້ບຸລິມະສິດພິເສດໃນການຂົນສົ່ງສິນຄ້າຂອງລາວ ເປັນຕົ້ນແມ່ນສິນຄ້າກະສິກຳ ໂດຍຖືຫຼັກການ “ ໃຫ້ບຸລິມະສິດໃນການອະນຸມັດ ແລະ ໃຫ້ບຸລິມະສິດໃນການຂົນສົ່ງກ່ອນ ”. ບໍ່ວ່າປະລິມານຈະໜ້ອຍ ຫຼື ຫຼາຍ, ທາງລົດໄຟລາວ-ຈີນ ແມ່ນສະໜັບສະໜູນເຕັມທີ່ ພ້ອມກັນນີ້, ຍັງໄດ້ປັບປຸງການຈັດຕັ້ງ, ເພີ່ມຈຳນວນຖ້ຽວລົດໄຟ, ເພີ່ມຈຳນວນຕູ້ຄອນເທັນເນີ, ປັບນ້ຳໜັກບັນຈຸຈາກ 2500 ໂຕນຕໍ່ຂະບວນມາເປັນ 2800 ໂຕນຕໍ່ຂະບວນ, ລົງພື້ນທີ່ຕົວຈິງສຳຫຼວດຄວາມຕ້ອງການຂອງຜູ້ປະກອບການ ແລະ ຈັດກອງປະຊຸມສຳມະນາປຶກສາຫາລືກັບຜູ້ປະກອບການ, ພ້ອມສົມທົບເຈົ້າຫນ້າທີ່ດ່ານລາວ-ຈີນ ສ້າງກົນໄກປະສານງານ ເພື່ອຫຼຸດຂັ້ນຕອນ ແລະ ໄລຍະເວລາໃນການແຈ້ງພາສີ, ຮັບປະກັນໃຫ້ສິນຄ້າຂອງລາວໂດຍສະເພາະສິນຄ້າກະສິກຳທີ່ເກັບຮັກສາໄວ້ໄດ້ບໍ່ດົນ ສາມາດສົ່ງອອກຜ່ານທາງລົດໄຟລາວ-ຈີນ ໄດ້ຢ່າງທັນເວລາ.

ນອກຈາກນີ້, ທາງລົດໄຟລາວ-ຈີນ ຍັງໄດ້ຕັ້ງຫນ້າປະສານສົມທົບພາກສ່ວນລົດໄຟທີ່ກ່ຽວຂ້ອງຂອງປະເທດຈີນ, ໄທ ແລະ ມາເລເຊຍ ເພື່ອຊຸກຍູ້ໃຫ້ມີການເປີດຂະບວນລົດໄຟຂົນສົ່ງສິນຄ້າຂ້າມແດນຈີນ-ລາວ-ໄທ-ມາເລເຊຍ, ແນໃສ່ໃຫ້ສິນຄ້າຈາກປະເທດໃນອາຊຽນສາມາດສົ່ງອອກດ້ວຍລະບົບການຂົນສົ່ງຂ້າມແດນຜ່ານທາງລົດລາວ-ຈີນ ໄດ້ຢ່າງມີປະສິດທິພາບ, ສ້າງ ສປປ ລາວ ກໍຄືທາງລົດໄຟລາວ-ຈີນ ໃຫ້ກາຍເປັນເສັ້ນທາງເຊື່ອມໂຍງເຊື່ອມຈອດຢ່າງແທ້ຈິງ.

ຕາມຂໍ້ມູນໃຫ້ຮູ້ວ່າ, ສິນຄ້າຕົ້ນຕໍທີ່ລາວສົ່ງອອກໄປຈີນ ມີສິນຄ້າປະເພດໝາກໄມ້, ມັນຕົ້ນ, ຢາງພາລາ, ແຮ່ທາດ ແລະ ອຶ່ນໆ. ສິນຄ້າທີ່ມາຈາກປະເທດອ້ອມຂ້າງທີ່ສົ່ງອອກໄປ ສປ ຈີນ ແລະ ປະເທດອື່ນໆ ຜ່ານທາງລົດໄຟລາວ-ຈີນ ຫຼັກໆແມ່ນໝາກໄມ້ເຂດຮ້ອນ. ປະເພດສິນຄ້າທີ່ຂົນສົ່ງຜ່ານທາງລົດໄຟລາວ-ຈີນ ໄດ້ເພີ່ມຂຶ້ນຢ່າງຕໍ່ເນື່ອງ ຈາກເບື້ອງຕົ້ນພຽງ 10 ກວ່າຊະນິດມາເປັນ 3,000 ກວ່າຊະນິດໃນປັດຈຸບັນ.

ສະແດງຄຳຄິດເຫັນ