ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ໃນລະຫວ່າງວັນທີ 28-29 ມິຖຸນາ 2025, ທ່ານ ນາງ ຈັນທະຄອນ ບົວລະພັນ ຮອງລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ ພ້ອມດ້ວຍຄະນະ ເຄື່ອນໄຫວ ຕິດຕາມ, ຊຸກຍູ້ວຽກງານຢູ່ເມືອງຍົມມະລາດ, ເມືອງທ່າແຂກ ແລະ ເມືອງໜອງບົກ ແຂວງຄໍາມ່ວນ ໂດຍການຕ້ອນຮັບຂອງຄະນະນໍາພະແນກກະສິກໍາ ແລະ ສິ່ງແວດລ້ອມແຂວງ.

ການລົງຊຸກຍູ້ວຽກງານ ໃນຄັ້ງນີ້, ຄະນະດັ່ງກ່າວ ໄດ້ລົງຕິດຕາມເບິ່ງພື້ນຖານການຜະລິດ ຂອງປະຊາຊົນ ແລະ ໂຄງລ່າງດ້ານຊົນລະປະທານ ໂດຍສະເພາະ ລະບົບນໍ້າໄຫລເຂົ້າເອງປ່ອງທີ 1, ປ່ອງທີ 3 ແລະ ປ່ອງທີ 4 ຢູ່ເມືອງຍົມມະລາດ ເຊິ່ງມີຄວາມສາມາດຫົດເນື້ອທີ່ການຜະລິດໄດ້ເຖິງ 9.700 ເຮັກຕາ. ໃນນັ້ນປະຕູນໍ້າປ່ອງທີ 1 ສາມາດຫົດເນື້ອທີ່ການຜະລິດໄດ້ 3.300 ເຮັກຕາ, ປະຕູນໍ້າປ່ອງທີ 3 ສາມາດຫົດເນື້ອທີ່ການຜະລິດໄດ້ 2.700 ເຮັກຕາ ແລະ ປະຕູນໍ້າປ່ອງທີ 4 ສາມາດຫົດເນື້ອທີ່ການຜະລິດໄດ້ 3.700 ເຮັກຕາ. ພ້ອມທັງລົງຕິດຕາມເບິ່ງການພັດທະນາເນື້ອທີ່ສໍາປະທານ ຂອງບໍລິສັດ ນຳເຂົ້າ-ສົ່ງອອກ ຄໍາມ່ວນ ທີ່ໄດ້ລົງທຶນດ້ານການປູກຝັງ ແລະ ລ້ຽງສັດ.

ພ້ອມນີ້, ຍັງໄດ້ລົງຕິດຕາມກວດກາ ຄວາມຄືບໜ້າຂອງການກໍ່ສ້າງກັນຕະຝັ່ງເຈື່ອນຢູ່ວັດພະທາດສີໂຄດຕະບອງ ແລະ ຕິດຕາມເບິ່ງການກໍ່ສ້າງໂຮງງານຜະລິດປຸ໋ຍ ຢູ່ບ້ານໃໝ່ໂພສີຂອງບໍລິສັດ DM ກຣຸບ ເຊິ່ງປັດຈຸບັນແມ່ນຢູ່ໃນໄລຍະຂອງການກໍ່ສ້າງ ຢູ່ເມືອງທ່າແຂກ, ນອກນີ້, ຄະນະດັ່ງກ່າວ, ລົງຕິດຕາມຊຸກຍູ້ ແລະ ຊີ້ນໍາຮາກຖານການຜະລິດກະສິກໍາ ຂອງປະຊາຊົນ ບ້ານດອນປາແດກ, ຕິດຕາມເບິ່ງບັນດາພື້ນຖານໂຄງລ່າງດ້ານຊົນລະປະທານ ໃນການກະກຽມຄວາມພ້ອມຮັບມືກັບໄພພິບັດໃນໄລຍະລະດູຝົນ ເພື່ອສະເໜີງົບປະມານ ເຂົ້າໃນການຟື້ນຟູສ້ອມແປງໂຄງລ່າງພື້ນຖານ ລະບົບຕ້ານແລ້ງ-ຕ້ານຖ້ວມ ແລະ ຕິດຕາມເບິ່ງໂຄງການລ້ຽງກຸ້ງ ໃນນາເຂົ້າຢູ່ບ້ານຊຽງຫວາງທ່າ ເມືອງໜອງບົກຕື່ມອີກ

ຂ່າວ-ພາບ: ແດງສະຫວັດ ແສນພານິດ

ສະແດງຄຳຄິດເຫັນ