ບໍລິສັດ Nvidia ຜູ້ຜະລິດຊິບອັນດັບໜຶ່ງຂອງໂລກ ໄດ້ສ້າງສະຖິຕິໃໝ່ໃນປະຫວັດສາດຕະຫຼາດຫຸ້ນໂລກ ດ້ວຍການຂຶ້ນເປັນບໍລິສັດທຳອິດທີ່ມີມູນຄ່າຕະຫຼາດເກີນ 4 ລ້ານລ້ານໂດລາ ຫຼັງຈາກລາຄາຫຸ້ນຂຶ້ນຫຼາຍກວ່າ 2% ໃນວັນພຸດທີ່ຜ່ານມາ

Nvidia ໄດ້ກາຍເປັນບໍລິສັດທີ່ມີມູນຄ່າສູງທີ່ສຸດໃນໂລກ ໂດຍແຊງໜ້າ Microsoft ແລະ Apple ໂດຍການເຕີບໂຕຢ່າງວ່ອງໄວນັບຕັ້ງແຕ່ຕົ້ນປີນີ້ເພີ່ມຂຶ້ນອີກຫຼາຍກວ່າ 22% ມາຈາກຄວາມຕ້ອງການຊິບ AI ທີ່ເພີ່ມຂຶ້ນຢ່າງໄວ ແລະຫຼັງຈາກການເປີດໂຕ ChatGPT ໃນປາຍປີ 2022 ຫຸ້ນ Nvidia ໄດ້ເພີ່ມຂຶ້ນຫຼາຍກວ່າ 15 ເທົ່ານັບຈາກ 5 ປີກ່ອນ

ເຖິງແມ່ນຈະມີຄວາມກົດດັນຈາກຂໍ້ຈຳກັດທາງການຄ້າລະຫວ່າງອາເມລິກາກັບຈີນ ເຖິງແມ່ນໃນເດືອນທີ່ຜ່ານມາ Nvidia ໄດ້ເປີດເຜີຍວ່າ ມາດຕະການຫ້າມສົ່ງອອກຊິບ H20 ໄປຈີນຈະເຮັດໃຫ້ບໍລິສັດສູນເສຍລາຍໄດ້ເຖິງ 8 ພັນລ້ານໂດລາ

ເຊິ່ງເຮັດໃຫ້ CEO Jensen Huang ຍອມຮັບວ່າ “ຕະຫຼາດມູນຄ່າ 5 ໝື່ນລ້ານໂດລາຂອງຈີນຖືກປິດສຳລັບບໍລິສັດອາເມລິກາ” ແຕ່ກໍ່ບໍ່ສາມາດຢຸດຄວາມຮ້ອນແຮງຂອງກະແສຫຸ້ນໂຄງສ້າງພື້ນຖານ AI ໄດ້ເລີຍ

ຄວາມສຳເລັດຄັ້ງນີ້ໄດ້ເນັ້ນໃຫ້ເຫັນບົດບາດຜູ້ນຳຂອງ Nvidia ໃນຖານະເປັນພື້ນຖານຂອງຜູ້ຂັບເຄື່ອນເທກໂນໂລຢີ AI ທົ່ວໂລກ ບວກກັບກະແສຄວາມຕ້ອງການຊິບປະມວນຜົນເພື່ອໃຊ້ງານ Generative AI ທີ່ເຕີບໂຕແບບກ້າວກະໂດດ

ສະແດງຄຳຄິດເຫັນ