ເປີດສັນຈອນ ປົກກະຕິແລ້ວ ຂົວນໍ້າຄານເກົ່າ ນະຄອນ ຫຼວງພະບາງ ພາຍຫຼັງສຳເລັດການສ້ອມແປງ
ເປີດການສັນຈອນຜ່ານຂົວນໍ້າຄານເກົ່າ ນະຄອນ ຫຼວງພະບາງ ພາຍຫຼັງສຳເລັດການສ້ອມແປງ ເປັນສອງໄລຍະ.ນັບແຕ່ກາງເດືອນກຸມພາ 2023 ເປັນຕົ້ນມາ ອົງການປົກຄອງນະຄອນ ຫຼວງພະບາງ ໄດ້ດຳເນີນການສ້ອມແປງຂົວນໍ້າຄານເກົ່າ ຫຼື ຂົວເບເລ ທີ່ເຊື່ອມຕໍ່ລະຫວ່າງ ບ້ານໝື່ນນາ ຫາບ້ານເມືອງງາ ໂດຍມອບໃຫ້ບໍລິສັດພັນທະມິດກໍ່ສ້າງຂົວທາງຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ເຊີ່ງ
ເບື້ອງຕົ້ນໄດ້ສ້ອມແປງທາງຍ່າງທັງ 2 ເບື້ອງກ່ອນ, ພາຍຫຼັງສຳເລັດ ໄດ້ເລີ້ມປິດການສັນຈອນຜ່ານຂົວ ແລະດຳເນີນການສ້ອມແປງພາຍໃນຂົວ ນັບແຕ່ວັນທີ່ 20 ເມສາເປັນຕົ້ນມາ ເຊີ່ງໜ້າວຽກໃນການສ້ອມແປງ ລວມມີ 4 ໜ້າວຽກຫຼັກຄື:
ວຽກຮື້ຖອນ ໄມ້ເກົ່າອອກໝົດສ້ອມແປງ ປ່ຽນຖ່າຍໄມ້ຄືນທັງໝົດ, ຄັດ-ອະນາໄມສີເກົ່າ ແລະທາສີໃໝ່, ຕິດຕັ້ງ ດອກໄຟ ຈຳ ນວນ 6 ຈຸດເພື່ອເພີ້ມຄວາມສະຫວ່າງ, ໂດຍວາງແຜນການສ້ອມແປງໃຫ້ສຳເລັດພາຍໃນ 4 ເດືອນ ແຕ່ການປະຕິບັດຕົວຈີງ ແມ່ນສຳເລັດກ່ອນແຜນການ. ທ່ານ ຈັນສະຫວັດ ບຸນຍົງ ຫົວໜ້າຫ້ອງການໂຍທາທິການ ແລະ ຂົນສົ່ງນະຄອນໄດ້ໃຫ້ສຳພາດວ່າ: ການ
ສ້ອມແປງການສ້ອມ ແປງຂົວນໍ້າຄານເກົ່າ ຫຼື ຂົວເບເລຄັ້ງນີ້ ໄດ້ເປັນການສ້ອມແປງຄັ້ງໃຫຍ່ ໂດຍນຳໃຊ້ງົບປະມານສະໜັບສະໜູນ ການພັດທະ ນາພື້ນຖານໂຄງລ່າງທ້ອງຖີ່ນ ຈາກບໍລິສັດຊໍການຊ່າງ (ເຂື່ອນໄຟຟ້ານ້ຳຂອງ ແຂວງໄຊຍະບູລີ) ມູນຄ້າ 991 ລ້ານກວ່າກີບ, ສະເພາະທາງຍ່າງທັງສອງເບື້ອງ ໄດ້ມີ ການຮື້ໄມ້ອອກທັງໝົດ ແລ້ວເອົາແຜນເຫຼັກປູທາງຍ່າງ ແລະສ້ອມແປງຈຸດທີ່ເປ່ເພ, ສ່ວນ
ພາຍໃນຂົວ ໄດ້ປ່ຽນໄມ້ລະ ນາດ, ໄມ້ແປ້ນແລ່ນ ແລະສ້ອມແປງຈຸດເປ່ເພ ຂອງພື້ນໂຄງເຫຼັກໂຕຂົວໄປພ້ອມ, ທັງໄດ້ມີການທຳຄວາມສະອາດໂຄງຂົວ ແລະທາສີ, ຜ່ານການປະຕິບັດວຽກງານເຫັນວ່າມີຄວາມສະດວກບາງດ້ານ ແຕ່ຍັງມີຂໍ້ຫຍຸ້ງຍາກບາງດ້ານ ເປັນຕົ້ນ ແມ່ນເຮັດໃຫ້ການສັນຈອນບາງເສັ້ນທາງຕິດຄັດ ແລະການສ້ອມແປງຕ້ອງໄດ້ດຳເນີນທັງກາງເວັນ ແລະກາງຄືນ.
ການສ້ອມແປງຂົວນໍ້າຄານເກົ່າ ຫຼື ຂົວເບເລ ທີ່ເຊື່ອມຕໍ່ລະຫວ່າງ ບ້ານໝື່ນນາ ຫາບ້ານເມືອງງາ ປັດຈຸບັນໄດ້ສຳເລັດ ແລະເປີດການສັນຈອນເປັນປົກກະຕິ ນັບແຕ່ຕອນແລງຂອງ ວັນທີ່ 11 ພຶດສະພາ 2023 ພາຍຫຼັງຄະນະກຳມະການຄຸ້ມຄອງການລົງທືນຂັ້ນນະຄອນ ໄດ້ລົງຕິດຕາມກວດກາ ເຊີ່ງຈະນຳໃຊ້ການສັນຈອນສະເພາະລົດຈັກ ລົດຖີບ ແລະຄົນຍ່າງ, ເຊີ່ງຈະຊ່ວຍຫຼຸດຜ່ອນການສັນຈອນ ທີ່ມີຄວາມແອອັດພາຍໃນເທດສະບານ ແລະອຳນວຍຄວາມສະດວກ ໃນການສັນຈອນໄປມາ ຂອງຜູ້ໃຊ້ລົດໃຊ້ຖະໜົນຢູ່ພາຍໃນ ນະຄອນ ຫຼວງພະບາງ ໃຫ້ມີສະດວກ ແລະປອດໄພ.
ທີ່ມາ Lao National Radio
