ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ເນື່ອງໃນໂອກາດ ວັນປ່ອຍປາ ແລະ ອະນຸລັກສັດນໍ້າ-ສັດປ່າ ແຫ່ງຊາດ 13 ກໍລະກົດ 2025 ທີ່ຈະມາເຖິງນີ້, ເມືອງສາມັກຄີໄຊ ແຂວງອັດຕະປື ໄດ້ກະກຽມລູກປາ 63 ພັນໂຕ ເພື່ອປ່ອຍຄືນສູ່ທຳມະຊາດ ຕາມລໍານໍ້າເຊກອງ ຈຸດທ່າຜາໄຊ ໂດຍພິທີຈະຈັດຂຶ້ນຢ່າງເປັນທາງການ ໃນວັນທີ 15 ກໍລະກົດນີ້, ເຊິ່ງປາທີ່ຈະປ່ອຍມີ: ປາປາກ, ປາກິນຫຍ້າ, ປານິນ ແລະ ປາໃນ.

ທ່ານ ນາງ ລັດສະໃໝ ຄໍາພິລາວົງ ຫົວໜ້າຫ້ອງການກະສິກຳ ແລະ ປ່າໄມ້ ເມືອງສາມັກຄີໄຊ ໄດ້ໃຫ້ສຳພາດ ໃນວັນທີ 8 ກໍລະກົດ 2025 ວ່າ: ເນື່ອງໃນໂອກາດ ວັນປ່ອຍປາ ແລະ ອະນຸລັກສັດນໍ້າ-ສັດປ່າ ແຫ່ງຊາດ ໃນປີນີ້ ໃຫ້ເປັນຂະບວນການຟົດຟື້ນ ແລະ ມີເນື້ອໃນສໍາຄັນ ຮຽກຮ້ອງມາຍັງທຸກພາກສ່ວນສັງຄົມ ທົ່ວເມືອງສາມັກຄີໄຊ ຈົ່ງພ້ອມກັນປົກປັກຮັກສາຊັບໃນດິນສິນໃນນໍ້າ ເວົ້າລວມ ເວົ້າສະເພາະ ກໍຄື ສັດນໍ້າ ແລະ ສັດປ່າ ຂອງພວກເຮົາໃຫ້ມີຈໍານວນເພີ່ມຂຶ້ນ ຮອດເຊັ່ນລູກເຊັ່ນຫລານໃນອະນາຄົດ ແລະ ໃຫ້ຍືນຍົງຕະຫລອດໄປ ແລະ ຮຽກຮ້ອງມາຍັງທຸກພາກສ່ວນໃນທົ່ວສັງຄົມ ຈົ່ງພ້ອມກັນສະໜັບສະໜູນ ໂດຍສະເພາະທຶນຮອນ ຫລື ວັດຖຸປັດໄຈ ເຂົ້າຮ່ວມໃນວັນດັ່ງກ່າວ ຢ່າງເປັນຂະບວນຟົດຟື້ນ ແລະ ໃຫ້ຖືເອົາ ວັນປ່ອຍປາ ແລະ ວັນອະນຸລັກສັດນໍ້າ-ສັດປ່າ ແຫ່ງຊາດ ຄັ້ງນີ້ ເປັນປາງບຸນໜຶ່ງ ທີ່ໄດ້ປ່ອຍ 1 ຊີວິດ ເພື່ອເຮັດໃຫ້ຫລາຍຊີວິດ ໄດ້ມີຄວາມສົມບູນຂຶ້ນ.

ທ່ານ ນາງ ລັດສະໃໝ ຄໍາພິລາວົງ ໃຫ້ຮູ້ອີກວ່າ: ປັດຈຸບັນ ທົ່ວເມືອງສາມັກຄີໄຊ ມີ 11 ວັງສະຫງວນ ໄວ້ເປັນບ່ອນອະນຸລັກສັດນໍ້າ, ກວມເອົາ 10 ບ້ານ ມີເນື້ອທີ່ຫລາຍກວ່າ 88 ເຮັກຕາ ແລະ ມີແຜນການຈະສ້າງຕື່ມອີກໃຫ້ໄດ້ 2 ວັງສະຫງວນ ທັງນີ້ກໍເພື່ອສ້າງໄວ້ ເປັນບ່ອນອະນຸລັກ ແລະ ຂະຫຍາຍພັນສັດນໍ້າ ໃຫ້ຫລາຍຂຶ້ນໃນອະນາຄົດ.

ຂ່າວ: ວັດທະນາ

ສະແດງຄຳຄິດເຫັນ