ເຖິງແມ່ນເກມຈະຈົບໄປແລ້ວ ແຕ່ເລື່ອງຍັງບໍ່ທັນຈົບ ຫລຸຍສ໌ ເອັນຣິເກ້ ຄູຝຶກເປແອສເຊ ອາດຈະຖືກຟີຟ່າແບນຈາກກິດຈະກໍາລູກຫນັງທັງໝົດ ຫຼັງຕົບໜ້າຊູເອາ ເປໂດຣ ກາງສະໜາມ

ວັນທີ 15 ກໍລະກົດ 2568 ຫລຸຍສ໌ ເອັນຣິເກ້ ຜູ້ຈັດການທີມປາຣີສ ແຊງ-ແຊມັງ ອາດຈະຕ້ອງປະເຊີນກັບໂທດແບນທັງໝົດຈາກການເຮັດໜ້າທີ່ດ້ານບານເຕະ ຫຼັງຖືກຈັບພາບຂະນະຕົບໜ້າ ຊູເອາ ເປໂດຣ ກອງໜ້າເຊລຊີ ໃນສຶກຊິງແຊ້ມສະໂມສອນໂລກ

ເຫດການດັ່ງກ່າວເກີດຂຶ້ນຫຼັງເກມຮອບຊິງຊະນະເລີດ ທີ່ເປແອສເຊແພ້ເຊລຊີໄປ 0-3 ໂດຍເອັນຣິເກ້ເກີດອາລົມຮ້ອນຫຼັງເກມ ກ່ອນຈະເຂົ້າໄປມີປາກສຽງກັບເປໂດຣ ແລະຕົບເຂົ້າທີ່ຫົວຂອງແຂ້ງບຣາຊິນ ເຮັດໃຫ້ນັກເຕະແລະທີມງານກວ່າ 20 ຄົນຈາກທັງສອງຝ່າຍຕ້ອງເຂົ້າມາຢຸດຍັບ

ຂະນະນີ້ ຟີຟ່າກຽມເປີດການສອບສວນຢ່າງເປັນທາງການ ເຖິງແມ່ນຈະບໍ່ສາມາດລົງໂທດດ້ວຍການຫ້າມຄຸມທີມໃນແມັດການແຂ່ງຂັນທັນທີ ເພາະເປແອສເຊຈະບໍ່ມີໂປຼແກຼມໃນທົວນາເມັນຂອງຟີຟ່າຈົນກວ່າຈະຮອດອິນເຕີຄອນຕີເນັນຕັນ ຄັບເດືອນທັນວາ ແຕ່ມີແນວໂນ້ມສູງວ່າ ຟີຟ່າຈະໃຊ້ມາດຕະການ “ແບນຕາມໄລຍະເວລາ” ເຊັ່ນດຽວກັບກໍລະນີຂອງ ຫລຸຍສ໌ ຊົວເຣຊ ທີ່ເຄີຍຖືກຫ້າມເຮັດກິດຈະກໍາກ່ຽວກັບບານເຕະເປັນເວລາ 4 ເດືອນ ຫຼັງເຫດການກັດ ຈໍໂຈ້ ຄີເອນລິນີ ໃນບານເຕະໂລກ 2014

ຜູ້ຕັດສິນລະດັບອາວຸໂສຂອງສະເປນ ເອັດດູອາໂດ ກອນຊາເລຊ ໃຫ້ຄວາມເຫັນວ່າ “ບໍ່ວ່າຈະຊື່ຫຍັງ ຖ້າຄຸນໄປຕົບໜ້າຄູ່ແຂ່ງ ມັນຖືເປັນເລື່ອງທີ່ບໍ່ສາມາດຍອມຮັບໄດ້ ເຖິງແມ່ນໃບແດງແລະໃບເຫຼືອງໃນລາຍການນີ້ຈະບໍ່ສົ່ງຜົນຕໍ່ການແຂ່ງຂັນອື່ນ ແຕ່ຟີຟ່າຍັງສາມາດລົງໂທດຕາມຊ່ວງເວລາໄດ້”

ສ່ວນກໍລະນີໃບແດງຂອງ ຊູເອາ ເນເວສ ທີ່ດຶງຜົມ ມາກ ກູກູເຣນຢ່າ ຊ່ວງທ້າຍເກມນັ້ນ ຄາດວ່າຈະບໍ່ຖືກລົງໂທດເພີ່ມເຕີມ ເນື່ອງຈາກຟີຟ່າລະບຸໄວ້ຊັດເຈນວ່າໂທດແບນຈາກໃບແດງໃນລາຍການນີ້ຈະບໍ່ຖືກສົ່ງຕໍ່ໄປຍັງທົວນາເມັນອື່ນ

ຫລຸຍສ໌ ເອັນຣິເກ້ ພະຍາຍາມຫຼຸດຄວາມຮຸນແຮງຂອງເຫດການ ໂດຍກ່າວຫຼັງເກມວ່າ “ຕອນທ້າຍມີສະຖານະການທີ່ຄວນຫຼີກເວັ້ນໄດ້ ຜົມພະຍາຍາມແຍກນັກເຕະອອກເພື່ອບໍ່ໃຫ້ບານປາຍ ທຸກຄົນເຄັ່ງຕຶງກັນໝົດ ບໍ່ແມ່ນວິທີທີ່ດີໃນການຈົບເກມເລີຍ”

ຟີຟ່າຍັງບໍ່ໄດ້ປະກາດຢ່າງເປັນທາງການວ່າຈະມີບົດລົງໂທດຕໍ່ເອັນຣິເກ້ຫຼືຜູ້ກ່ຽວຂ້ອງລາຍອື່ນຫຼືບໍ່ ແຕ່ຄາດວ່າລາວອາດຈະຖືກແບນຈາກການຄຸມທີມໃນຊູເປີຄັບ ທີ່ເປແອສເຊມີຄິວພົບ ທ໋ອດແນ່ມ ຮ໋ອດສະເປີ ທີ່ອູດິເນ່ ວັນທີ 14 ສິງຫານີ້

ສະແດງຄຳຄິດເຫັນ