Bitcoin ສ້າງສະຖິຕິໃໝ່ອີກເທື່ອໜຶ່ງ ທະຍານຂຶ້ນໄປແຕະລະດັບສູງສຸດເປັນປະຫວັດການທີ່ 121,000 ໂດລາສະຫະລັດ (ປະມານ 3,900,000 ບາດ) ໃນຊ່ວງເຊົ້າວັນຈັນ

ຄາດວ່າແຮງໜູນ Bitcoin ຄັ້ງນີ້ອາດມາຈາກຄວາມຕ້ອງການລົງທຶນທີ່ເພີ່ມຂຶ້ນ ພາຍໃຕ້ສະພາວະເສດຖະກິດສະຫະລັດທີ່ກໍາລັງເຕີບໂຕຢ່າງແຂງແກ່ນ ແລະ ອັດຕາເງິນເຟີ້ທີ່ຍັງຖືກຄວບຄຸມໄດ້ດີ

ບໍລິສັດວິເຄາະການລົງທຶນທີ່ມີຊື່ສຽງ QCP Capital ລະບຸວ່າ ການຂຶ້ນຂອງ Bitcoin ຄັ້ງນີ້ມາຈາກປັດໄຈສໍາຄັນ 2 ດ້ານ ໄດ້ແກ່: ການຂຶ້ນພາສີສຸນລະກາຂອງລັດຖະບານສະຫະລັດ ໃນຍຸກປະທານາທິບໍດີ Donald Trump ທີ່ຜັກດັນໃຫ້ມີການນໍາເຂົ້າສິນຄ້າ ແລະ ຜະລິດສິນຄ້າລ່ວງໜ້າຫຼາຍຂຶ້ນ ແລະ ການທີ່ລັດຖະບານສະຫະລັດຍັງສາມາດອັດເງິນຈໍານວນມະຫາສານເຂົ້າສູ່ເສດຖະກິດ ຜ່ານການຈ່າຍດອກເບຍຈາກພັນທະບັດລັດຖະບານທີ່ຢູ່ໃນລະດັບສູງ

ນອກຈາກນີ້ ຕະຫຼາດຍັງໄດ້ແຮງໜູນຈາກຄວາມຄາດຫວັງວ່າ ທະນາຄານກາງສະຫະລັດ (Fed) ຈະປັບຫຼຸດອັດຕາດອກເບຍໃນໄວໆນີ້ ສົ່ງຜົນໃຫ້ນັກລົງທຶນຫັນມາລົງທຶນໃນຊັບສິນທີ່ມີຄວາມສ່ຽງຫຼາຍຂຶ້ນຢ່າງ Bitcoin ຊຶ່ງຖືກເບິ່ງວ່າເປັນຊັບສິນປ້ອງກັນເງິນເຟີ້ທີ່ສໍາຄັນອີກໂຕໜຶ່ງ

ຫຼ້າສຸດ Bitcoin ຂຶ້ນເປັນຊັບສິນທີ່ມີມູນຄ່າຫຼາຍທີ່ສຸດອັນດັບທີ່ 5 ຂອງໂລກ ໂດຍມີມູນຄ່າຢູ່ທີ່ 2.417 ລ້ານລ້ານໂດລາສະຫະລັດ ແຊງໜ້າມູນຄ່າບໍລິສັດຍັກໃຫຍ່ດ້ານ e-commerce ຢ່າງ Amazon ເປັນທີ່ຮຽບຮ້ອຍ

Jeff Mei ປະທານເຈົ້າໜ້າທີ່ຝ່າຍປະຕິບັດການຂອງຕະຫຼາດແລກປ່ຽນ cryptocurrency BTSE ກ່າວວ່າ ຄວາມຕ້ອງການຂອງນັກລົງທຶນສະຖາບັນທີ່ເນັ້ນການລົງທຶນໄລຍະຍາວເປັນຕົວຜັກດັນໃຫ້ລາຄາ Bitcoin ພຸ່ງສູງຂຶ້ນຢ່າງຕໍ່ເນື່ອງ ແລະ ຄາດວ່າຈະໄປເຖິງລະດັບ 125,000 ໂດລາສະຫະລັດ ໃນອີກ 1-2 ເດືອນຂ້າງໜ້າ

ທັງນີ້ ສະພາຜູ້ແທນລາດຊະດອນສະຫະລັດ ກໍາລັງເລີ່ມພິຈາລະນາກົດໝາຍໃໝ່ຫຼາຍສະບັບກ່ຽວກັບ cryptocurrency ໃນວັນຈັນນີ້ ເພື່ອສ້າງກອບກົດໝາຍທີ່ຈະແຈ້ງໃຫ້ກັບອຸດສາຫະກໍາຊັບສິນດິຈິຕອນ ໂດຍມີປະທານາທິບໍດີ Donald Trump ສະໜັບສະໜູນຢ່າງເຕັມທີ່ ເນື່ອງຈາກທ່ານເປັນຜູ້ນໍາທີ່ປະກາດຕົວຢ່າງຈະແຈ້ງວ່າເປັນຜູ້ສະໜັບສະໜູນ cryptocurrency ແລະ ກ່ຽວຂ້ອງກັບໂຄງການຕ່າງໆ ດ້ານຊັບສິນດິຈິຕອນດ້ວຍ

ຂ່າວຈາກ:  cnbc decrypt

ສະແດງຄຳຄິດເຫັນ