ວັນທີ 21 ກໍລະກົດ 2025 ທ່ານ ເຫຼັກໄຫຼ ສີວິໄລ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ພ້ອມຄະນະ ໄດ້ລົງຕິດຕາມສະພາບເສັ້ນທາງຫຼວງແຫ່ງຊາດ ເລກທີ 13 ໃຕ້ແຕ່ບ້ານໂຄກສີວິໄລ, ເມືອງໄຊທານີ, ນະຄອນຫຼວງວຽງຈັນຫາ ບ້ານໄຊສະຫວ່າງ, ເມືອງທ່າພະບາດ ແຂວງບໍລິຄໍາໄຊ (ຊ່ວງ ກມ 21 ຫາ ກມ 71), ໄລຍະທາງທັງໝົດ 50 ກິໂລແມັດ ພາຍຫຼັງເຊັນສັນຍາຮັບເໝົາກໍ່ສ້າງ ໃນວັນທີ 12 ມີຖຸນາ 2025.

ການລົງຕິດຕາມຄັ້ງນີ້, ທ່ານລັດຖະມົນຕີ ໄດ້ຊີ້ນໍາບໍລິສັດຮັບເໝົາກໍ່ສ້າງຕ້ອງເອົາໃຈໃສ່ຢ່າງຈິງຈັງ ໃນການສ້ອມແປງ ແລະ ບູລະນະຮັກສາເສັ້ນທາງດັ່ງກ່າວ ໃນໄລຍະລະດູຝົນນີ້ ເພື່ອຮັບປະກັນໃຫ້ສາມາດສັນຈອນໄປມາໄດ້ຢ່າງສະດວກ, ຫຼຸດຜ່ອນການເກີດອຸປະຕິເຫດ, ຮັບປະກັນຄວາມປອດໄພໄລຍະການກໍ່ສ້າງ ແລະ ສຸມໃສ່ຫຼຸດຜ່ອນຫາງສຽງຂອງສັງຄົມ, ເພື່ອເປັນການກະກຽມ ການສະເຫຼີມສະຫຼອງ ຄົບຮອບ 50 ປີ ວັນຊາດທີ 2 ທັນວາ ແລະ ສ້າງຂະບວນການຕ້ອນຮັບກອງປະຊຸມໃຫຍ່ ຂອງອົງຄະນະພັກກະຊວງ ຍທຂ ຄັ້ງທີ VI.

ບໍລິສັດຮັບເໝົາກໍ່ສ້າງ ໄດ້ໃຫ້ຄໍາໝັ້ນສັນຍາ ພ້ອມທີ່ຈະໃຫ້ຄວາມຮ່ວມມື ແລະ ດໍາເນີນການສ້ອມແປງເສັ້ນທາງເພື່ອໃຫ້ຜູ້ຊົມໃຊ້ຖະໜົນສາມາດສັນຈອນໄປມາໄດ້ຢ່າງສະດວກ, ຫຼຸດຜ່ອນຫາງສຽງຂອງສັງຄົມຕໍ່ການນໍາໃຊ້ເສັ້ນທາງດັ່ງກ່າວໃຫ້ໜ້ອຍທີ່ສຸດ; ເຖິງແມ່ນວ່າ ການເຊັນສັນຍາຮັບເໝົາກໍ່ສ້າງ ຖືກໄລຍະລະດູຝົນ ກໍຈະສຸມໃສ່ກະກຽມຄວາມພ້ອມດ້ານຕ່າງໆເປັນຕົ້ນດ້ານເອກະສານ, ກະກຽມອອກແບບ, ຮັບຮອງແບບ, ວັດສະດຸ ໃຫ້ຄົບຖ້ວນ ແລະ ໃຫ້ສາມາດລົງມືການກໍ່ສ້າງຫຼັງຈາກລະດູຝົນ ໃນເດືອນຕຸລາ ຫຼື ກ່ອນເດືອນຕຸລາ 2025 ນີ້.

ທ່ານ ບຸນຍະວັດ ນິລະໄຊຍ໌ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ລາຍງານໃນກອງປະຊຸມສະໄໝສາມັນ ເທື່ອທີ 9 ຂອງສະພາປະຊາຊົນ ນະຄອນຫລວງວຽງຈັນ ເຖິງຄວາມຄືບໜ້າໃນການຈັດຕັ້ງປະຕິບັດໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ໃຕ້ ຍາວ 50 ກິໂລແມັດ (ກມ 21 ຫາ ກມ 71) ວ່າ: ບໍລິສັດ ລັດວິສາຫະກິດ ກໍ່ສ້າງຂົວທາງເລກ 8 ຮ່ວມກັບ ບໍລິສັດ ສົມໄຊ ຈະເລີນກໍ່ສ້າງ ເປັນຜູ້ມີເງື່ອນໄຂຄົບຖ້ວນຊະນະການປະມູນສາກົນເປີດກວ້າງ ເປັນຜູ້ຮັບເໝົາກໍ່ສ້າງ ແລະ ໄດ້ເຊັນສັນຍາ ໃນວັນທີ 12/6/2025. ຈະໄດ້ເລີ່ມການກໍ່ສ້າງ ໃນຕົ້ນເດືອນ 10 ຫຼື ພາຍຫຼັງລະດູຝົນ ປີ 2025. ການກໍ່ສ້າງ ຫຼື ຟື້ນຟູ ຈະໃຫ້ສໍາເລັດ ພາຍໃນ 3 ປີ (ປີ 2028) ຫຼັງຈາກນັ້ນ ແມ່ນບູລະນະຮັກສາສ້ອມແປງອີກ 7 ປີ.

ຂ່າວ:ເສດຖະກິດການຄ້າ

ສະແດງຄຳຄິດເຫັນ