ໃນວັນທີ 28 ກໍລະກົດ ນີ້ ທີ່ຫ້ອງວ່າການແຂວງຄໍາມ່ວນ, ທ່ານ ລິນຄຳ ດວງສະຫວັນ ລັດຖະມົນຕີກະຊວງກະສິກໍາ ແລະ ສິ່ງແວດລ້ອມ ພ້ອມຄະນະໄດ້ເຄື່ອນໄຫວຊຸກຍູ້ວຽກງານຮອບດ້ານຢູ່ແຂວງຄຳມ່ວນ ໂດຍມີຫົວໜ້າກົມ, ຮອງກົມ, ຄະນະພະແນກກະສິກຳ ແລະ ປ່າໄມ້, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມເຂົ້າຮ່ວມ.

ທ່ານ ເດດສັກດາ ມະນີຄໍາ ຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ລາຍງານວ່າ: ສະເພາະໃນລະດູ ແລ້ງປີ 2025 ການຜະລິດເຂົ້ານາແຊງປະຕິບັດເນື້ອທີ່ປູກ 11,865 ເຮັກຕາ, ເປັນສະບຽງອາຫານ ປະຕິບັດເນື້ອທີ່ປູກ 3,877 ເຮັກຕາ, ເປັນສິນຄ້າປະຕິບັດເນື້ອທີ່ປູກ 7,988 ເຮັກຕາ; ສຳລັບການປູກເຂົ້ານາປີມາຮອດເດືອນມິຖຸນາປະຕິບັດໄດ້ 54,907 ເຮັກຕາ, ຕົກກ້າໝົດແນວປູກ 4,992 ໂຕນ, ປູກເປັນສະບຽງອາຫານ 33,737 ເຮັກຕາ ແລະ ປູກເປັນສິນຄ້າ 21,170 ເຮັກຕາ, ການຜະລິດເຂົ້າເນີນສູງເນື້ອທີ່ປູກ 288 ເຮັກຕາ, ການຜະລິດພືດສໍາຮອງ-ພືດລະດູແລ້ງປະຕິບັດເນື້ອທີ່ປູກ 10,506 ເຮັກຕາ, ຜົນຜະລິດ 66,957 ໂຕນ, ໃນນີ້. ເປັນສະບຽງອາຫານປະຕິບັດເນື້ອທີ່ປູກ 3,683 ເຮັກຕາ, ຜົນຜະລິດ 18,972 ໂຕນ ແລະ ເປັນສິນຄ້າປະຕິບັດເນື້ອທີ່ປູກ 6,823 ເຮັກຕາ, ຜົນຜະລິດ 47,985 ໂຕນ, ສຳລັບການປູກພືດລະດູຝົນມາຮອດເດືອນມິຖຸນາປະຕິບັດເນື້ອທີ່ປູກ 17,573 ເຮັກຕາ, ປູກເປັນສະບຽງອາຫານ 2,005 ເຮັກຕາ ແລະ ປູກເປັນສິນຄ້າ 15,568 ເຮັກຕາ, ການລ້ຽງສັດເປັນຟາມມີ 132 ຟາມ, ໃນນັ້ນຟາມຂະໜາດໃຫຍ່ 16 ຟາມ, ຂະໜາດກາງ 65 ຟາມ, ຂະໜາດນ້ອຍ 51 ຟາມ. ໃນນີ້, ມີຟາມລ້ຽງງົວ 16 ຟາມ, ຟາມລ້ຽງໝູ 97 ຟາມ, ຟາມລ້ຽງແບ້ 5 ຟາມ, ຟາມໄກ່ພັນໄຂ່ 4 ຟາມ, ຟາມໄກ່ພັນຊີ້ນ 5 ຟາມ, ຟາມນົກກະທາ 1 ຟາມ, ຟາມເປັດໄຂ່ 3 ຟາມ ແລະ ຟາມປາກະຊັງ 1 ຟາມ, ມີ 200 ກະຊັງ ແລະ ສາມາດສົ່ງສັດອອກຕ່າງແຂວງທັງໝົດ 12,663 ໂຕ, ສິນຄ້າກະສິກໍາຕົ້ນຕໍທີ່ໄດ້ສົ່ງອອກຕ່າງປະເທດມີຈໍານວນ 88,228 ໂຕນ ຊຶ່ງປະເພດສິນຄ້າມີເຂົ້າສານໜຽວ, ເຂົ້າເປືອກ, ໝາກມ່ວງ, ມັນຕົ້ນດິບ, ມັນຕົ້ນແຫ້ງ, ແປ້ງມັນຕົ້ນ, ກາກມັນຕົ້ນ.

ໂອກາດນີ້, ທ່ານ ລິນຄຳ ດວງສະຫວັນ ໄດ້ໃຫ້ກຽດໂອ້ລົມ ເນັ້ນໜັກໃຫ້ພະນັກງານຫຼັກແຫຼ່ງ ສືບຕໍ່ຕັ້ງໜ້າເສີມຂະຫຍາຍບົດບາດການນໍາພາຂອງພັກ, ຄະນະນໍາແຕ່ລະຂັ້ນເອົາໃຈໃສ່ສຶກສາອົບຮົມວຽກງານການເມືອງ-ແນວຄິດໃຫ້ສະມາຊິກພັກ-ພະນັກງານລັດຖະກອນກຳແໜ້ນ, ຍົກສູງຄວາມຮັບຜິດຊອບໃນການຊຸກຍູ້ ແລະ ຕິດຕາມການປັບ ປຸງກົງຈັກການຈັດຕັ້ງໃນຂະແໜງການຂັ້ນແຂວງ ແລະ ຂັ້ນເມືອງຕາມທິດກົງຈັກກະທັດຮັດ, ໜັກແໜ້ນ, ເຂັ້ມແຂງ, ປະສານສົມທົບກັບຄະນະຮັບຜິດຊອບປັບປຸງກົງຈັກການຈັດຕັ້ງຂັ້ນແຂວງ ແລະ ສູນກາງ ໃນການສືບຕໍ່ປັບປຸງພາລະບົດບາດຂອງພະແນກໃຫ້ສໍາເລັດ; ພ້ອມທັງກຽມຄວາມພ້ອມດ້ານບຸກຄະລາກອນເພື່ອບັນຈຸ, ສັບຊ້ອນ ແລະ ຈັດວາງໃຫ້ໄປຕາມ 4 ທິດ, ສືບຕໍ່ສົ່ງເສີມການຜະລິດເພື່ອຄໍ້າປະກັນສະບຽງອາຫານ ແລະ ຊຸກຍູ້ສົ່ງເສີມການຜະລິດເປັນສິນຄ້າ ຕິດພັນກັບວຽກງານອື່ນໆ ເພື່ອຈັດຕັ້ງປະຕິບັດບັນດາເປົ້າໝາຍ ແລະ ຄາດໝາຍສູ້ຊົນດ້ານວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ລວມເຖິງການຕິດຕາມ ກວດກາ ປະເມີນຜົນກະທົບສິ່ງແວດລ້ອມຂອງ ບັນດາໂຄງການລົງທຶນ ເພື່ອຮັບປະກັນໃຫ້ດໍາເນີນການຖືກຕ້ອງຕາມເງື່ອນໄຂ ແລະ ລະບຽບການ.

ຂ່າວ: ບຸນອູ້ມ

ສະແດງຄຳຄິດເຫັນ