ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ອະນຸຂະບວນການຮັບໃຊ້ກອງປະຊຸມໃຫຍ່ ຄັ້ງທີ Xl ຂອງອົງຄະນະພັກ ແຂວງເຊກອງ ຈັດຝຶກອົບຮົມດົນຕີພື້ນເມືອງລາວ ໃຫ້ແກ່ເດັກອາສາສະໝັກ ຂອງສູນວັດທະນະທໍາເດັກ ໃນວັນທີ 30 ກໍລະກົດ 2025 ທີ່ຫໍພິພິທະພັນມູນເຊື້ອ ແຂວງເຊກອງ ໂດຍມີທ່ານ ນາງ ວິໄລວັນ ດາລາສິນ ວ່າການປະທານແນວລາວສ້າງຊາດ ແຂວງເຊກອງ ພ້ອມດ້ວຍຂະແໜງການກ່ຽວຂ້ອງ, ຄູຝຶກ ແລະ ເດັກອາສາສະໝັກ ເຂົ້າຮ່ວມ.

ທ່ານ ນາງ ວິໄລວັນ ດາລາສິນ ກ່າວວ່າ: ດົນຕີພື້ນເມືອງລາວ ແມ່ນໄດ້ກຳເນີດເກີດຂຶ້ນມາກັບຄົນລາວເປັນເວລາຫລາຍຮ້ອຍປີ, ເປັນພູມປັນຍາຂອງບັນພະບູລຸດ ເປັນຜູ້ປະດິດສ້າງຂຶ້ນ ຊຶ່ງແມ່ນເຄື່ອງເສບ ທີ່ເປັນເອກະລັກຂອງຄົນລາວ, ຊາດລາວ ດັ່ງຄຳສອນ ຂອງປະທານ ໄກສອນ ພົມວິຫານ ເວົ້າວ່າ: ເສຍວັດທະນະທຳ ຄືເສຍຊາດ, ເຊິ່ງການຈັດຝຶກອົບຮົມຄັ້ງນີ້ ກໍເພື່ອໃຫ້ໄວໜຸ່ມ-ເຍົາວະຊົນ ໂດຍສະເພາະ ເດັກອາສາສະໝັກ ຂອງສູນວັດທະນະທຳເດັກ ໄດ້ຮຽນຮູ້ ມີຄວາມສາມາດຫລິ້ນ, ນໍາໃຊ້ດົນຕີພື້ນເມືອງລາວ ທັງເປັນການກະກຽມຄວາມພ້ອມ ໃນການສະແດງຮັບໃຊ້ງານສໍາຄັນຕ່າງໆຂອງແຂວງ ທີ່ຈະຈັດຂຶ້ນໃນຕໍ່ໜ້ານີ້ ເປັນຕົ້ນ ຮັບໃຊ້ກອງປະຊຸມໃຫຍ່ ຄັ້ງທີ Xl ຂອງອົງຄະນະພັກແຂວງເຊກອງ. ການຝຶກອົບຮົມຄັ້ງນີ້ ໄດ້ເຊີນເອົາວິທະຍາກອນ ທີ່ຊໍານານດ້ານດົນຕີ ຈາກສູນກາງ (ສະໂມສອນດ່ານຊ້າງ) ມາສິດສອນ ລວມມີ 11 ປະເພດດົນຕີ ຄື: ແຄນ, ລະນາດ, ຄ້ອງວົງ, ສີຊໍອີ້, ຂິມ, ພິນ, ເລກ, ກອງ, ຂຸ່ຍ, ໂວດ ແລະ ໝາກກະແຊ່ງ ທັງນີ້ກໍເພື່ອເປັນການສືບສານ ແລະ ປົກປັກຮັກສາມໍລະດົກ ທາງດ້ານສິລະປະ-ວັດທະນະທຳອັນດີງາມຂອງຊາດ ໄວ້ໃຫ້ຍືນຍົງ.

ໂອກາດນີ້, ທ່ານ ນາງ ວິໄລວັນ ດາລາສິນ ຍັງໄດ້ຮຽກຮ້ອງໃຫ້ຜູ້ທີ່ເຂົ້າຮ່ວມຝຶກອົບຮົມ ກໍຄື ລູກ-ຫລານທຸກຄົນ ຈົ່ງພ້ອມກັນຕັ້ງໃຈຮຽນຮູ້ ຝຶກຊ້ອມໃຫ້ດີ ມີວິໄນ ເກັບກໍາໃຫ້ໄດ້ຄວາມຮູ້ ນຳບັນດາຄູຝຶກ ເພື່ອນຳໄປຈັດຕັ້ງຜັນຂະຫຍາຍ ໃຫ້ກາຍເປັນນັກເສບດົນຕີ ທີ່ເກັ່ງ, ມີຄວາມສາມາດ, ກ້າສະແດງອອກ ໃນການຮັບໃຊ້ງານສໍາຄັນຕ່າງໆ ຂອງພັກ-ຂອງລັດ.

ຂ່າວ: ອັດສະວິນ

ສະແດງຄຳຄິດເຫັນ