ຖ້າໃຜມີເລື່ອງທຸກທໍລະໃຈ, ກໍຄົງຈະໄປລະບາຍກັບຄົນໃກ້ຊິດ, ຄອບຄົວ, ສື່ອບັນເທີງ, ຫຼືໃນໂຊເຊຍລມີເດຍ. ແຕ່ສໍາລັບເດັກໄວຮຸ່ນໃນສະຫະລັດອາເມລິກາ – ປະເທດທີ່ມີປະຊາກອນຈໍານວນຫລາຍ ແລະໃກ້ຊິດກັບເທັກໂນໂລຊີຫຼາຍຢ່າງ – ກໍພົບວ່າເຂົາເຈົ້າໃຊ້ AI ເປັນເພື່ອນສົນທະນາຫຼາຍຂຶ້ນ, ເບິ່ງເປັນເພື່ອນຮັກ ແລະທີ່ປຶກສາທີ່ດີທີ່ສຸດ.

Michael Robb ຫົວໜ້າທີມຄົ້ນຄວ້າ Common Sense Media ເປີດເຜີຍວ່າຄົນຮຸ່ນ Gen Z ຫຼືເດັກໄວຮຸ່ນໃນສະຫະລັດເຄີຍມີການໂຕ້ຕອບກັບແຊດບໍອດ AI ແລະມັກຈະໄປຫາ AI ເພື່ອຂໍຄໍາແນະນໍາ, ສົນທະນາເປັນເພື່ອນ, ຫຼືແມ້ແຕ່ການສະໜັບສະໜູນທາງດ້ານອາລົມ ຫຼືສົນທະນາກ່ຽວກັບບັນຫາຊີວິດແບບຈິງຈັງ.

ກວ່າ 70% ຂອງເດັກໄວຮຸ່ນໃນສະຫະລັດພົບວ່າເຄີຍມີການໂຕ້ຕອບກັບ AI ຄື່ກັບມະນຸດ, ເຊັ່ນ Character.AI, Replika ແລະ ChatGPT. ໂດຍກວ່າຄຶ່ງນຶ່ງກໍມີການນໍາໃຊ້ເປັນປະຈໍາ, ເຊິ່ງເຮັດໃຫ້ເກີດຄວາມກັງວົນໃນໝູ່ຜູ້ປົກຄອງ ທີ່ເບິ່ງວ່າເດັກເຫຼົ່ານີ້ອາດຈະຂາດທັກສະດ້ານສັງຄົມໃນອະນາຄົດ.

“ເມື່ອເຈົ້າສົນທະນາກັບ AI, ເຈົ້າຈະຖືກເສີມ”

Ganesh Nair ອາຍຸ 18 ປີ ເປີດເຜີຍວ່າ AI ມີເວລາວ່າງຕະລອດ, ບໍ່ເຄີຍເບື່ອເຮົາ, ແລະບໍ່ເຄີຍຕັດສິນເຮົາ, ທັງຍັງເບິ່ງວ່າເຮົາຖືກເສີມ, ນ່າສົນໃຈເສີມ, ສົນທະນາໄດ້ທຸກເລື່ອງ.

ເຖິງຢ່າງໃດກໍຕາມ, Ganesh Nair ເປີດເຜີຍວ່າມີເພື່ອນຄົນນຶ່ງ ທີ່ຫາກໍໃຫ້ AI ຊ່ວຍຮ່າງຂໍ້ຄວາມບອກເລີກກັບແຟນສາວໄປ. ເຊິ່ງເຮັດໃຫ້ມີຄໍາຖາມວ່າການປຶກສາເລື່ອງຄວາມສໍາພັນກັບ AI ນັ້ນ, ມັນເໝາະສົມບໍ? ຫຼືເຮົາກໍາລັງປ່ອຍໃຫ້ມັນເຂົ້າມາແທນທີ່ຄວາມສໍາພັນຂອງເຮົາກັບມະນຸດ?

ທາງດ້ານ Michael Robb ກໍໄດ້ກ່າວເຕືອນເຖິງການໃຊ້ AI, ເບິ່ງວ່າມັນເປັນພຽງ “ເພື່ອນດິຈິທອລ” ທີ່ບໍ່ສາມາດແທນທີ່ຄວາມສໍາພັນຂອງມະນຸດໄດ້ຢ່າງສົມບູນ. ແລະຖ້າໃຊ້ຫຼາຍໄປ, ກໍອາດສົ່ງຜົນຕໍ່ການພັດທະນາທັກສະທາງສັງຄົມ, ເຊິ່ງຈະບໍ່ໄດ້ຮັບການກະກຽມຄວາມພ້ອມຢ່າງພຽງພໍສໍາລັບໂລກແຫ່ງຄວາມເປັນຈິງ.

Eva Telzer ນັກຈິດຕະວິທະຍາຈາກມະຫາວິທະຍາໄລ North Carolina ເປີດເຜີຍງານຄົ້ນຄວ້າກ່ຽວກັບ AI ຂອງຕົນເອງ, ພົບວ່າເດັກອາຍຸພຽງ 8 ຂວບກໍເລີ່ມສຶກສາກ່ຽວກັບ Generative AI ແລ້ວ, ໂດຍຖືກນໍາໃຊ້ເປັນເພື່ອນສົນທະນາເຊັ່ນດຽວກັນ. ແມ້ແຕ່ແອັບ SpicyChat AI ທີ່ອອກແບບມາສໍາລັບຜູ້ໃຊ້ທີ່ເປັນຜູ້ໃຫຍ່, ກໍໄດ້ຮັບຄວາມນິຍົມໃນໝູ່ໄວຮຸ່ນສໍາລັບການຫຼີ້ນບົດບາດສົມມຸດ.

“ພວກເຂົາຕ້ອງການຄໍາຕອບຈາກ AI ກ່ອນ, ຈຶ່ງສາມາດຕັດສິນໃຈໄດ້ວ່າແນວຄິດນັ້ນໂອເຄຫຼືບໍ່”

Eva Telzer ສະແດງຄວາມກັງວົນຕໍ່ການໃຊ້ AI ຂອງວັຍຮຸ່ນ ແລະເບິ່ງວ່າເດັກເຫຼົ່ານີ້ເລີ່ມບໍ່ມີຄວາມໝັ້ນໃຈໃນຕົວເອງອີກຕໍ່ໄປແລ້ວ.

ການສຶກສາຂອງ Common Sense ພົບວ່າໄວຮຸ່ນສ່ວນໃຫຍ່ຍັງຄົງມັກຄວາມສໍາພັນໃນຊີວິດຈິງກວ່າ AI. ແຕ່ການອີງອາໄສເພື່ອນດິຈິທອລເພື່ອຂໍຄໍາແນະນໍາແລະຄວາມເຊື່ອມໂຍງທາງອາລົມທີ່ເພີ່ມຂຶ້ນ, ໄດ້ກາຍເປັນສ່ວນນຶ່ງທີ່ກໍານົດຄວາມເປັນໄວຮຸ່ນແບບໃໝ່. ເຊິ່ງເປັນການປ່ຽນແປງທີ່ຜູ້ຊ່ຽວຊານແລະຄອບຄົວຫາກໍຈະເລີ່ມເຂົ້າໃຈ.

ສະແດງຄຳຄິດເຫັນ