ຫຼ້າສຸດ NASA ອົງການອາວະກາດສະຫະລັດອາເມລິກາ ໄດ້ປະກາດເລັ່ງແຜນການສ້າງເຕົາປະຕິກອນນິວເຄລຍເທິງໜ້າດາວຈັນໃຫ້ສຳເລັດພາຍໃນປີ 2030 ເບື້ອງຫຼັງຄວາມທະເຍີທະຍານນີ້ອາດບໍ່ແມ່ນພຽງແຕ່ເປົ້າຫມາຍທາງວິທະຍາສາດ ແຕ່ອາດຈະເປັນການແຂ່ງຂັນທາງພູມິລັດຖະສາດທີ່ເຂັ້ມແຂງລະຫວ່າງມະຫາອຳນາດຂອງໂລກ ເພາະວ່າແຜນການນີ້ຂອງ NASA ໄດ້ປະກົດຂຶ້ນໃນຊ່ວງຫຼັງຈາກການປະກາດການຮ່ວມມື ລະຫວ່າງຈີນແລະຣັດເຊຍທີ່ຈະສ້າງສະຖານີພະລັງງານນິວເຄລຍແບບອັດຕະໂນມັດເທິງດາວຈັນພາຍໃນປີ 2035

ການສ້າງຖານໃນດາວຈັນຕ້ອງເຜີ່ນກັບສິ່ງທ້າທາຍດ້ານພະລັງງານຢ່າງໃຫຍ່ຫຼວງ ເພາະວ່າໜື່ງມື້ເທິງດາວຈັນຍາວນານເທົ່າກັບສີ່ອາທິດເທິງໂລກ ປະກອບມີຊ່ວງເວລາທີ່ມີແສງຕາເວັນຕໍ່ເນື່ອງສອງອາທິດ ແລະຊ່ວງເວລາຂອງຄວາມມືດທີ່ເຢັນສົງມາຢູ່ອີກສອງອາທິດ ການອີງໃສ່ພະລັງງານແສງຕາເວັນແຕ່ດຽວຈຶ່ງເກືອບເປັນໄປບໍ່ໄດ້

NASA ຈື່ງໄດ້ຮ້ອງຂໍ ຂໍ້ສະເໜີຈາກບໍລິສັດເອກະຊົນ ເພື່ອສ້າງເຕົາປະຕິກອນຂະໜາດເລີ້ມຕົ້ນທີ່ສາມາດຜະລິດໄຟຟ້າໄດ້ຢ່າງໜ້ອຍ 100 ກິໂລວັດ ຊື່ງເປັນຂັ້ນຕອນທຳອິດທີ່ສຳຄັນ

ຕາມລາຍງານຂອງສື່ມວນຊົນສະຫະລັດ ທ່ານ Sean Duffy ລັກສະການຫົວໜ້າ NASA ໃນເວລານັ້ນ ເຄີຍໄດ້ສະແດງຄວາມກັງວົນຕໍ່ການຮ່ວມມືຂອງສອງຊາດມະຫາອຳນາດ ຈີນ-ຣັດເຊຍ ວ່າ “ອາດປະກາດເຂດຫ້າມເຂົ້າ (Keep-out zone)” ເທິງດາວຈັນ ຊື່ງອາດຕີຄວາມໄດ້ວ່າເປັນການອ້າງສິດຄອບຄອງໃນພື້ນທີ່ດັ່ງກ່າວໂດຍອີງໃສ່ຂໍ້ຕົກລົງອາທີມິສ (Artemis Accords) ທີ່ອະນຸຍາດໃຫ້ມີການຕັ້ງ “ເຂດປອດໄພ” ອ້ອມສະຖານທີ່ປະຕິບັດງານຂອງຕົນ

ເຖິງແມ່ນວ່າແຜນການຂອງ NASA ຈະເບິ່ງທະເຍີທະຍານແລະສ້າງຄວາມຕື່ນເຕັ້ນໃຫ້ກັບຜູ້ທີ່ໄດ້ຍິນຢ່າງຫຼາຍ ແຕ່ໃນ NASA ເອງກໍຕ້ອງເຜີ່ນກັບຄວາມຈິງທີ່ໂຫດຮ້າຍຫຼາຍຢ່າງໃນການຂັບເຄື່ອນຄວາມຝັນນີ້

ຄວາມຂັດແຍ້ງດ້ານງົບປະມານ: ການປະກາດເລັ່ງໂຄງການນີ້ເກີດຂຶ້ນຢ່າງແປກປະຫຼາດ ຫຼັງຈາກລັດຖະບານສະຫະລັດປະກາດຕັດງົບປະມານຂອງ NASA ໃນປີ 2026 ລົງເຖິງ 24% ຊື່ງສົ່ງຜົນກະທົບຕໍ່ໂຄງການວິທະຍາສາດທີ່ສຳຄັນຫຼາຍໆອັນ ລວມທັງໂຄງການເອົາຕົວຢ່າງຈາກດາວອັງຄານກັບສູ່ໂລກ (Mars Sample Return) ເຮັດໃຫ້ນັກວິທະຍາສາດເຫັນວ່າແຜນການຕ່າງໆ ດູບໍ່ສອດຄ່ອງກັນ

ສິ່ງທ້າທາຍດ້ານຄວາມປອດໄພ: ການຍິງວັດຖຸກັມມັນຕະລັງສີຜ່ານຊັ້ນບັນຍາກາດໂລກເປັນປະເດັນທີ່ຫ່ວງໄຍແລະຕ້ອງມີໃບອະນຸຍາດພິເສດ ໂດຍຜູ້ຊ່ຽວຊານດ້ານດາວເຄາະເຫັນວ່າມີຄວາມເປັນໄປໄດ້ ແຕ່ກໍ່ຍັງເປັນຂໍ້ຈຳກັດສຳຄັນສຳລັບພາລະກິດນີ້

ການອີງໃສ່ໂຄງການອາທີມິສ: ເຫນືອສິ່ງອື່ນໃດ ແຜນການທັງໝົດຂື້ນກັບຄວາມສຳເລັດຂອງໂຄງການອາທີມິສ (Artemis) ໃນການສົ່ງມະນຸດແລະອຸປະກອນກັບໄປເຍຍບດາວຈັນ ຊື່ງພາລະກິດ Artemis 3 ກຳນົດການໃນປີ 2027 ແຕ່ກໍ່ປະສົບກັບການຊັກຊ້າແລະຄວາມບໍ່ແນ່ນອນດ້ານງົບປະມານມາໂດຍຕະຫຼອດ

ເພາະສະນັ້ນ ບົດສະຫຼຸບຂອງພາລະກິດພະລັງງານເທິງດາວຈັນຈື່ງຍັງຄົງເປັນທີ່ຄຸມເຄື່ອ ລະຫວ່າງຄວາມຝັນທີ່ຈະຂະຫຍາຍຂອບເຂດຂອງມະນຸດຊາດ ກັບການແຂ່ງຂັນເພື່ອປັກທຸງຊາດເທິງສະໜາມແຫ່ງຊັບພະຍາກອນໃໝ່ທີ່ຢູ່ນອກໂລກ

ຂ່າວຈາກ BBC

ສະແດງຄຳຄິດເຫັນ