ພິທີໂຮມຊຸມນຸມ ສະເຫລີມສະຫລອງວັນສ້າງຕັ້ງ ແນວລາວສ້າງຊາດ ຄົບຮອບ 75 ປີ ໄດ້ຈັດຂຶ້ນວັນທີ 13 ສິງຫາ 2025 ໂດຍການເປັນປະທານຂອງ ສະຫາຍ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ໃຫ້ກຽດເຂົ້າຮ່ວມໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ, ມີບັນດາການນຳຂັ້ນສູງຂອງພັກ, ລັດ, ນັກປະຕິວັດອາວຸໂສ, ວິລະຊົນແຫ່ງຊາດ, ຄອບຄົວການນຳ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ສິນລະວົງ ຄຸດໄພທູນ ໄດ້ຫວນຄືນການກຳເນີດເຕີບໃຫຍ່ຂະຫຍາຍຕົວຂອງແນວລາວສ້າງຊາດ ຕະຫລອດໄລຍະ 75 ປີຜ່ານມາ, ຜົນສຳເລັດທີ່ສາມາດຍາດໄດ້ໃນແຕ່ລະໄລຍະ ຂອງແນວລາວອິດສະຫລະ(ໄລຍະ1950-1956), ແນວລາວຮັກຊາດ (1956-1979) ແລະ ແນວລາວສ້າງຊາດ 1979 ມາເຖິງປັດຈຸບັນ ເຊິ່ງເປັນໄລຍະແຫ່ງການປົກປັກຮັກສາ ແລະ ສ້າງສາປະເທດຊາດ ແລະ ພາຍໃຕ້ແນວທາງປ່ຽນແປງໃໝ່ ຮອບດ້ານຂອງພັກ, ແນວລາວສ້າງຊາດ ໄດ້ປັບປຸງປ່ຽນແປງພາລະບົດບາດ ແລະ ວິທີການເຄື່ອນໄຫວຂອງຕົນ ໃຫ້ສອດຄ່ອງກັບສະພາບການ ແລະ ໜ້າທີ່ການເມືອງໃໝ່.

ຕະຫລອດ 46 ປີ ແນວລາວສ້າງຊາດ ໄດ້ສ້າງຜົນງານໃຫຍ່ຫລວງ ສະແດງອອກໃນຜົນງານ ລວມຂອງພັກ-ລັດ ແລະ ປະຊາຊົນ ສາມາດປົກປັກຮັກສາ ໝາກຜົນຂອງການປະຕິວັດ ທີ່ຍາດມາໄດ້, ບູລະນະ ແລະ ສ້າງລະບອບປະຊາທິປະໄຕ ປະຊາຊົນ, ຮັບປະກັນຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍໃນສັງຄົມໂດຍພື້ນຖານ, ການສ້າງສາປະເທດຊາດ ນັບມື້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ. ແນວລາວສ້າງຊາດ ເປັນອົງກອນໜຶ່ງທີ່ເປັນຫລັກແຫລ່ງ ໃນການສຶກສາອົບຮົມພູນສ້າງມູນເຊື້ອປະຕິວັດ, ປຸກລຸກນໍ້າໃຈຮັກຊາດ, ຮັກລະບອບໃໝ່, ເຕົ້າໂຮມຄວາມສາມັກຄີປອງດອງຊົນເຜົ່າ, ສາສະໜາ, ຊັ້ນຄົນ-ເພດໄວ, ພີ່ນ້ອງລາວຢູ່ຕ່າງປະເທດ ແລະ ເຄື່ອນໄຫວການທູດປະຊາຊົນ ຕາມແນວທາງນະໂຍບາຍຂອງພັກ-ລັດ.

ໂອກາດນີ້ດຽວກັນ, ສະຫາຍ ທອງລຸນ ສີສຸລິດ ໄດ້ສະແດງຄວາມຍ້ອງຍໍສັນລະເສີນ ຕໍ່ຜົນງານອັນໃຫຍ່ຫລວງທີ່ແນວລາວສ້າງຊາດຍາດມາໄດ້ ເຖິງຢ່າງໃດກໍຕາມ ອົງການແນວລາວສ້າງຊາດ ຕ້ອງສືບຕໍ່ຍົກສູງຄັນທຸງ ເຕົ້າໂຮມຄວາມສາມັກຄີ, ຄວາມເປັນປຶກແຜ່ນແໜ້ນໝາ ຂອງປວງຊົນທັງຊາດ, ສືບທອດ ແລະ ເສີມຂະຫຍາຍມູນເຊື້ອອັນດີງາມຂອງແນວລາວອິດສະຫລະ, ແນວລາວຮັກຊາດ, ໂດຍສະເພາະມູນເຊື້ອ ໃກ້ຊິດຕິດແທດກັບປະຊາຊົນ ແລະ ເປັນຫລັກແຫລ່ງ ໃນການເຕົ້າໂຮມຄວາມສາມັກຄີປອງດອງທົ່ວປວງຊົນລາວທັງຊາດ ເພື່ອປຸກລະດົມກຳລັງແຮງທົ່ວສັງຄົມ ເຂົ້າຮ່ວມໃນພາລະກິດປົກປັກຮັກສາ ແລະ ພັດທະນາປະເທດຊາດ; ເຊີດຊູສະຕິຊາດ ເອກະພາບເປັນອັນໜຶ່ງອັນດຽວ, ຍົກສູງຈິດໃຈເອກະລາດ ເປັນເຈົ້າຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເພີ່ມທະວີຄວາມຮັບຜິດຊອບ ຂອງຄົນລາວຕໍ່ຊາຕາກໍາ ຂອງປະເທດຊາດ, ບໍ່ໃຫ້ອິດທິກຳລັງໃດໆ ມາມ້າງເພ ແລະ ທຳລາຍໄດ້.

ຂ່າວ: ກິດຕາ
ພາບ: ເກດສະໜາ

ສະແດງຄຳຄິດເຫັນ