ໂຄງການປັບປຸງ-ຍົກລະດັບເສັ້ນທາງຫຼວງແຫ່ງຊາດ 2W ຢູ່ເຂດເມືອງໄຊ, ເມືອງແບງ ແລະ ເມືອງຮຸນ ແຂວອຸດົມໄຊ ພາຍຫຼັງໄດ້ລົງນາມເຊັນສັນຍາ ແລະ ຈັດຕັ້ງປະຕິບັດມາແຕ່ທ້າຍເດືອນ ກໍລະກົດ 2024 ຈົນເຖິງປັດຈຸບັນ ຊຶ່ງມີສອງສັນຍາ. ໃນນີ້, ສັນຍາທີ 2 ແຕ່ກິໂລແມັດ 68 ເມືອງແບງ ຫາ ກິໂລແມັດ 121 ເມືອງຮຸນ ໂດຍແມ່ນບໍລິສັດ ກວາງຕຸງວິສະວະກຳກໍ່ສ້າງໄຟຟ້ານໍ້າຕົກເລກ 2 ຈຳກັດ ແຫ່ງ ສປ ຈີນ ຮັບ ເໝົາກໍ່ສ້າງ ໃນມູນຄ່າ 22,675,496.42 ໂດລາສະຫະລັດ ຄາດວ່າທ້າຍປີ 2025 ຈະໃຫ້ສຳເລັດ 2 ຫຼັກໝາຍ ເທົ່າກັບ 7 ກິໂລແມັດ. ໃນສັນຍານີ້, ຈະໃຫ້ສໍາເລັດການກໍ່ສ້າງທັງໝົດພາຍໃນ 3 ປີ ແລະ ບູລະນະຮັກສາ 7 ປີ ຕາມສັນຍາ ໂດຍແມ່ນທຶນກູ້ຢືມຈາກທະນາຄານໂລກ (WB). ບໍລິສັດ ກວາຕຸງວິສະວະກຳກໍ່ສ້າງໄຟຟ້ານ່ຳຕົກເລກ 2 ຈຳກັດ ແມ່ນລັດວິສາຫະກິດ 100% ທີ່ຂຶ້ນກັບ ກຸ່ມບໍລິສັດວິສະວະກຳກໍ່ສ້າງ ແຂວງກວາງຕຸງ ສປ ຈີນ ທີ່ເຂົ້າມາດຳເນີນກິດຈະການຢູ່ ສປປ ລາວ ໃນປີ 1995.

ໂຄງການນີ້, ພາຍຫຼັງສຳເລັດຈະເປັນເສັ້ນທາງໜຶງໃນການພັດທະນາການເຊື່ອມຈອດ-ເຊື່ອມໂຍງການຂົນສົ່ງ ເປັນຕົ້ນການຂົນສົ່ງທາງບົກ, ການບໍລິການໂລຈິສະຕິກ, ທ່າບົກ ແລະ ບັນດາສູນກະຈາຍ ແລະ ເຕົ້າໂຮມສິນຄ້າ, ການຄ້າ ແລະ ການຂົນສົ່ງໃຫ້ມີຄວາມທົນທານຕໍ່ການປ່ຽນແປງຂອງສະພາບດິນຟ້າອາກາດ ທັງພາຍໃນ ແລະ ພາກພື້ນ ຕາມແລວທາງເສດຖະກິດຢູ່ໃນພາກພື້ນຕາເວັນອອກ-ຕາເວັນຕົກໃນຂົງເຂດອາຊີຕາເວັນອອກສ່ຽງໃຕ້ ແລະ ເພື່ອສະ ໜອງ ວິທີການຮອງຮັບໃຫ້ທັນການ ແລະ ມີປະສິດທິພາບ ໃນກໍລະນີທີ່ເກີດວິກິດການ ຫຼື ສະຖານະການສຸກເສີນທີ່ເກີດຂຶ້ນໄດ້ ເພື່ອເຮັດໃຫ້ການດຳເນີນງານໃນໂຄງການດັ່ງກ່າວຢູ່ຂອບເຂດພາຍໃນແຂວງອຸດົມໄຊໄດ້ດຳເນີນບັນລຸໄປຕາມແຜນການໃນສັນຍາທີ່ໄດ້ລະບຸໄວ້.

(ຂ່າວ: ສຸວັນທອງ ປັນຍາຂັນ)

ສະແດງຄຳຄິດເຫັນ