ວັນທີ 12 ສິງຫາ 2025 ທີ່ຫ້ອງປະຊຸມໂຮງແຮມ ດອກຈຳປາ ແຂວງຫຼວງນ້ຳທາ ໄດ້ຈັດກອງປະຊຸມແນະນຳ ໂຄງການສ້າງຄວາມເຂັ້ມແຂງໃນການຮັບມືກັບໄພພິບັດ ຈຸດປະສົງໂຄງການເພື່ອສ້າງຄວາມທົນທານໃຫ້ແກ່ຊຸມຊົນ ແລະ ເສີມຄວາມພ້ອມໃຫ້ກັບອົງການກາແດງແຫ່ງຊາດລາວ ໃນການຮັບມືກັບໄພພິບັດ ໃນ 3 ແຂວງ 11 ບ້ານ ເປົ້າໝາຍ ຂອງແຂວງ ຫຼວງນ້ຳທາ ບໍ່ແກ້ວ ແລະ ຜົ້ງສາລີ ໃນນັ້ນປະກອບດ້ວຍບັນດາກິດຈະກຳຄື ການຈັດກອງປະຊຸມແນະນຳການຈັດຕັ້ງປະຕິບັດໂຄງການພັດທະນາ ປັບປຸງ ແລະ ແຈກຢາຍຄູ່ມືສໍາລັບວຽກງານ ການຫຼຸດຜ່ອນຄວາມສຽ່ງໄພພິບັດໃນຊຸມຊົນ (CBDRR) ແລະ ສຸຂະພາບຊຸມຊົນ ການດຳເນີນງານແຜບປະຕິຕິບັດການລ່ວງໜ້າ (Early Action Protocol) ອົບຮົມການປະເມີນຄວາມອ່ອນແອ ຄວາມສາມາດຢູ່ໃນຊຸມຊົນ (VCA) ໃຫ້ອາສາສະໝັກບ້ານ ອົບຮົມການກຽມພ້ອມໄພພິບັດໃນຊຸມຊົນ ອົບຮົມວິທີການຕອບໂຕ້ໄພພິບັດ ແລະ ການເຝິກຊ້ອມຈໍາລອງເຫດການ ເຊິ່ງບັນດາກິດຈະກຳເຫຼົ່ານີ້ ຈະຊ່ວຍໃຫ້ຊຸມຊົນທີ່ມີຄວາມສ່ຽງ ໄດ້ຫຼຸດຜ່ອນຜົນກະທົບຂອງໄພພິບັດໃນຊຸມຊົນທີ່ເກີດຈາກການປ່ຽນແປງດິນຟ້າອາກາດ ແລະ ເສີມຂະຫຍາຍຂີດຄວາມສາມາດໃຫ້ແກ່ພະນັກງານອົງການກາແດງໃນການກຽມຄວາມພ້ອມຕອບໂຕ້ໄພພິບັດ ລວມມູນຄ່າທັງໝົດຂອງກິດຈະກຳ 2.600 ກວ່າລ້ານກີບ ໄລຍະປະຕິບັດໂຄງການ 2 ປີ ເຊິ່ງໄດ້ຮັບການສະໜັບສະໜູນງົບປະມານຈາກສະພາກາແດງຮົງກົງ ໂດຍຜ່ານສະຫະພັນກາແດງ ແລະ ຊີກວົງເດືອນແດງສາກົນ (IFRC).

ເປັນປະທານກອງປະຊຸມຄັ້ງນີ້ໂດຍທ່ານ ຄຳລາວັນ ຈັນທະລາວັນ ປະທານອົງການກາແດງແຫ່ງຊາດລາວ ມີບັນດາທ່ານແຂກທີ່ກ່ຽວຂ້ອງທີ່ມາຈາກອົງການກາແດງແຫ່ງຊາດລາວ ອົງການກາແດງແຂວງ ຄະນະກຳມະການຄຸ້ມຄອງໄພພິບັດຈາກພະແນກແຮງງານ ແລະ ສະຫວັດດີການສັງຄົມທັງສາມແຂວງ ພ້ອມພະນັກງານຈາກກະຊວງການຕ່າງປະເທດ ແລະ ຄະນະຮັບຜິດຊອບໂຄງການເຂົ້າຮ່ວມ.

ໂອກາດນີ້ ທ່ານປະທານກອງປະຊຸມໄດ້ກ່າວເນັ້ນໜັກຄວາມສຳຄັນຂອງໂຄງການ ໃນການເສີມຂີດຄວາມສາມາດຂອງຊຸມຊົນ ແລະ ພາກສ່ວນທີ່ກ່ຽວຂ້ອງໃຫ້ມີຄວາມພ້ອມໃນການຮັບມືກັບສະຖານະການໄພພິບັດໃນອະນາຄົດ ເພື່ອເສີມສ້າງຊຸມຊົນທີ່ມີຄວາມສ່ຽງໃຫ້ມີຄວາມພ້ອມໃນການຮັບມືກັບໄພພິບັດທັງເປັນການຫຼຸດຜ່ອນຄວາມຮຸນແຮງຂອງໄພພິບັດ.

ພາບ,ຂ່າວ: ອົງການກາແດງແຫ່ງຊາດລາວ

ສະແດງຄຳຄິດເຫັນ