ງານເທດສະການຮູບເງົາເອີຣົບຄັ້ງທຳອິດ ທີ່ແຂວງສະຫວັນນະເຂດ ໄດ້ຈັດຂຶ້ນໃນຕອນແລງວັນທີ 14 ສິງຫາຜ່ານມາ ທີ່ໂຮງຮູບເງົາລາວຈະເລີນ ນະຄອນໄກສອນພົມວິຫານ ໂດຍການເປັນກຽດເຂົ້າຮ່ວມຂອງທ່ານ ມາກ ກາລາເຮີ ເອກອັກຄະລັດຖະທູດສະຫະພາບເອີຣົບ ປະຈຳ ສປປ ລາວ, ທ່ານ ພັອ ລຳຄູນ ວໍລະວົງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສະຫວັນນະເຂດ, ມີທ່ານ ປັດ ປັດທະມະຈິດ ກົງສຸນໃຫຍ່ແຫ່ງຣາຊະອານາຈັກໄທປະຈໍາແຂວງ, ພະແນກການອ້ອມຂ້າງຂ້າງ, ບັນດາແຂກທີ່ຖືກເຊີນ, ຕະຫຼອດເຖິງມວນຊົນພາຍໃນແຂວງເຂົ້າຮ່ວມຊົມຢ່າງຫຼວງຫຼາຍ.

ໂອກາດນີ້, ທ່ານ ມາກ ກາລາເຮີ ໄດ້ກ່າວເປີດງານ ພ້ອມທັງມີຄຳເຫັນຕໍ່ພິທີວ່າ: ຂ້າພະເຈົ້າຮູ້ສຶກຍິນດີເປັນຢ່າງຍິ່ງທີ່ໄດ້ຕ້ອນຮັບທຸກທ່ານເຂົ້າຮ່ວມເທດສະການຮູບເງົາເອີຣົບຄັ້ງທຳອິດທີ່ແຂວງສະຫວັນນະເຂດ. ຊຶ່ງງານດັ່ງກ່າວນີ້, ເກີດຂຶ້ນໄດ້ຍ້ອນການຮ່ວມມືອັນໃກ້ຊິດກັບກົມຮູບເງົາ ກະຊວງວັດທະນະທຳ ແລະ ທ່ອງທ່ຽວ ແລະ ພະແນກຖະແຫຼ່ງຂ່າວ, ວັດທະນະທຳ ແລະທ່ອງທ່ຽວແຂວງສະຫວັນນະເຂດ.

ເທດສະການຄັ້ງນີ້, ເປັນການສະເຫຼີມສະຫຼອງສິລະປະຂອງຮູບເງົາ-ການເລົ່າເລື່ອງ, ຄວາມຄິດສ້າງສັນ ແລະ ປະສົບການຊີວິດ ທີ່ເຊື່ອມໂຍງພວກເຮົາເຂົ້າຫາກັນ, ເທດສະການນີ້ ບໍ່ພຽງແຕ່ເປັນການສາຍຮູບເງົາເທົ່ານັ້ນ, ມັນຍັງເປັນໂອກາດສຳຄັນໃນການສະເຫຼີມສະຫຼອງການພົວພັນຮ່ວມມືທາງການທູດລະຫວ່າງສະຫະພາບເອີຣົບ ແລະ ສປປ ລາວ ຄົບຮອບ 50 ປີ. 50 ປີແຫ່ງມິດຕະພາບ, ການຮ່ວມມື ແລະ ຄວາມເລົາລົບເຊິ່ງກັນ ແລະ ກັນ.

ສຳລັບງານເທດສະການຮູບເງົາເອີຣົບ ໄດ້ຈັດຂຶ້ນ 2 ວັນ (14-15 ສິງຫາ), ຊຶ່ງມີຮູບເງົາເຂົ້າສາຍທັງໝົດ 5 ເລື່ອງຄື: ວິກກີ້ ແລະ ມິດສະແຕລີ, ເຈົ້າຍິງຕົວນ້ອຍ, ຄວາມງຽບທີ່ງົດງາມ, ພອນສາມຂໍ້ສຳລັບຊິນເດີເລ ແລະ ສາທຸ ປີກະຕ່າຍ. ຮູບເງົາທີ່ນຳມາສາຍຄັ້ງນີ້, ແມ່ນໄດ້ຖ່າຍທອດເລື່ອງລາວວັດທະນະທຳ ແລະ ປະຫວັດສາດອັນຊົງພະລັງຈາກທົ່ວທະວີບເອີຣົບ, ຊຶ່ງຜູ້ເຂົ້າເບິ່ງເຂົ້າຊົມ ແມ່ນບໍ່ໄດ້ເສຍຄ່າ ທີ່ໂຮງຮູບເງົາລາວຈະເລີນ, ໂດຍຮູບເງົາທັງໝົດ ແມ່ນຈະຖືກບັນຍາຍເປັນພາສາອັງກິດ ແລະພາສາລາວ.

(ແຫຼ່ງຂ່າວ: ແຂວງສະຫວັນນະເຂດ)

ສະແດງຄຳຄິດເຫັນ