ວັນທີ 25 ສິງຫາ 2025 ນີ້, ທີ່ຫ້ອງປະຊຸມບ້ານວຽງສະຫວັນ ນະຄອນ ຫຼວງພະບາງ ໄດ້ຈັດພິທີ ປິດໂຄງການ ການສ້າງຄວາມສາມາດ ແລະ ຈັດການ ຊັບພະຍາກອນປະມົງແບບຍືນຍົງ ພາຍໃຕ້ຜົນກະທົບຈາກການປ່ຽນແປງສະພາບດິນຟ້າອາກາດ ໂດຍການມີສ່ວນຮ່ວມຂອງຊຸມຊົນໃນ ສປປ ລາວ, ມີ ທ່ານ ອຳໄພວັນ ສຸກສັນຕິ ຮອງອຳນວຍການວິທະຍາໄລກະສິກຳ ແລະ ປ່າໄມ້ພາກເໜືອ, ທ່ານ ຈົງກົນ ພົມຍະ ຄະນະບໍດີ ຄະນະເທັກໂນໂລຊີທາງການປະມົງ ແລະ ຊັບພະຍາກອນທາງນ້ຳ ມະຫາວິທະຍາໄລເມໂຈ ປະເທດໄທ, ມີພາກລັດທີ່ກ່ຽວຂ້ອງທັງພາຍໃນ ແລະຕ່າງປະເທດ, ກະຊວງການຕ່າງປະເທດ ແລະການຄ້າຂອງອົດສະຕາລີ ແລະ ສະຖາບັນສິ່ງແວດລ້ອມໂລກ ປະຈໍາ ອາຊຽນ, ຜູ້ໃຫ້ການສະໜັບສະໜູນທຶນ ແລະປະຊາຊົນບ້ານວຽງສະຫວັນ ເຂົ້າຮ່ວມ.

ຕະຫຼອດໜຶ່ງປີທີ່ຜ່ານມາ ໂຄງການການສ້າງຄວາມສາມາດ ແລະ ຈັດການຊັບພະຍາກອນປະມົງແບບຍືນຍົງ ພາຍໃຕ້ຜົນກະທົບຈາກການປ່ຽນແປງສະພາບດິນຟ້າອາກາດ ໂດຍການມີສ່ວນຮ່ວມຂອງຊຸມຊົນໃນ ສປປ ລາວ ໄດ້ຮ່ວມກັນສ້າງ “ ເຂດອະນຸລັກ ວັງສະຫງວນຜາຕ້ອງ ” ເພື່ອປົກປັກຮັກສາ ສະຖານທີ່ຂະຫຍາຍແນວພັນປາ, ການສ້າງຊຸມຊົນ ໃນການຈັດການປະມົງຢ່າງຍືນຍົງ, ພ້ອມທັງພັດທະນາອາຊີບທາງເລືອກເຊັ່ນ ການແປຮູບຜະລິດຕະພັນຈາກປາ ແລະ ໜໍ່ໄມ້ ເພື່ອຫຼຸດຜ່ອນການຫາປາໂດຍກົງ, ໄດ້ເສີມສ້າງບົດບາດຂອງແມ່ຍິງ ແລະ ກຸ່ມຊົນເຜົ່າ ໃຫ້ໄດ້ມີສ່ວນຮ່ວມຢ່າງແທ້ຈິງ ໃນການຕັດສິນໃຈ ແລະ ການຈັດການຊັບພະຍາກອນ. ນອກຈາກນັ້ນ ເດັກນ້ອຍ ແລະ ນັກຮຽນໃນຊຸມຊົນ ໄດ້ຮັບການປູກຝັງຄວາມຮັບຜິດຊອບ ຕໍ່ການອະນຸລັກຊັບພະຍາກອນ ເພື່ອສືບຕໍ່ຄວາມຍືນຍົງໃນອະນາຄົດ.

ໃນພິທີ ໄດ້ຮັບຟັງການນໍາສະເໜີຄວາມຄິດເຫັນ ການຮ່ວມມືກ່ຽວກັບການຄຸ້ມຄອງການປະມົງ, ນຳສະເໜີ ສິ່ງທ້າທາຍ ແລະຜົນສຳເລັດຂອງໂຄງການ, ບົດບາດເທົ່າທຽບທາງເພດ, ຄວາມພິການ ແລະ ການມີສ່ວນຮ່ວມທາງສັງຄົມ ແລະຮັບຊົມວີດີໂອ ເລື່ອງການປ່ຽນແປງການດຳລົງຊີວິດ ແບບດັ່ງເດີມສູ່ແບບໃຫມ່ຂອງບ້ານວຽງສະຫວັນ, ການປະກອບຄໍາເຫັນເພື່ອສືບຕໍ່ໂຄງການໃນຕໍ່ໜ້າ ແລະ ບັນດາຜູ້ເຂົ້າຮ່ວມຍັງໄດ້ຢ້ຽມຊົມສະຖານທີ່ໃຫ້ອາຫານປາ, ເຂດວັງສະຫງວນ, ສະຖານທີຜະລິດຕະພັນຂອງໂຄງການ ແລະ ຕະຫຼາດບ້ານວຽງສະຫວັນ.

ຂ່າວ-ພາບ : ອາພຸດເດດ ບຸບຜາ

ສະແດງຄຳຄິດເຫັນ