ປະກົດວ່າ: ມາກ ມາເກັຊ ແຊ້ມໂລກ 6 ສະໄໝ ຊາວສະເປນ (ແອັສປາຍ) ຈາກທີມດູຄາຕິ ຜົນງານດີຕໍ່ເນື່ອງ ອອກໂຕເປັນຄົນທຳອິດ ແລະ ພາລົດຄູ່ໃຈເຂົ້າເສັ້ນໄຊເປັນຄົນທຳອິດ ດ້ວຍເວລາ 42 ນາທີ 37.681 ວິນາທີ ເອົາຊະນະ ເປໂດຣ ອາຄັອສຕ້າ ເພື່ອນຮ່ວມຊາດ ຈາກທີມ ເຄທີເອັມ 4.314 ວິນາທີ, ໄດ້ແຊ້ມ 7 ສະໜາມຕິດຕໍ່ກັນ ເຮັດໄດ້ເປັນຄັ້ງທີສອງ ຕໍ່ຈາກປີ 2014 ແລະ ເປັນແຊ້ມສະໜາມທີ 10 ຈາກ 14 ສະໜາມໃນປີນີ້.

ທີ 3 ເປັນຂອງ ມາຣໂກ້ ເບັຊເຊັກຊີ້ ນັກຂັບຊາວອີຕາລີ ຈາກທີມ ອາພີເລຍ ຕາມຫລັງ 7.488 ວິນາທີ.

ຂະນະທີ່ ຟຣານເຊັສໂກ້ ແບັກໄນອາ (ບານາຢ້າ) ແຊ້ມໂລກ 2 ສະໄໝ ຊາວອີຕາລີ ຈາກທີມດູຄາຕິ ຈົບທີ 9.

ທາງດ້ານ ຈໍເກ້ ມາຣຕິນ ແຊ້ມເກົ່າ ຊາວແອັສປາຍ ຈາກທີມ ອາພີເລຍ ກັບມາແຂ່ງຂັນເປັນສະໜາມທີສອງໃນປີນີ້ ພາຍຫລັງຫາຍດີຈາກການເກີດອຸບັດເຫດ ຜົນງານດີ ອອກໂຕຄົນທີ 16 ແຕ່ຈົບອັນດັບທີ 4.

ສ່ວນ ຟາບີໂອ ກົວຕາຣາໂຣ້ ຊາວຝຣັ່ງ ແຊ້ມໂລກປີ 2021 ຈາກຄ້າຍ Monster Yamaha ຈົບອັນດັບທີ 10, ສ່ວນ ອາເລັກ ມາເກັຊ ນ້ອງຊາຍ ມາກ ມາເກັຊ ຈົບທີ 14.

ສຳລັບ ການ Sprint ໄລຍະສັ້ນ 13 ຮອບ ມາກ ມາເກັຊ ກໍໄດ້ອັນດັບໜຶ່ງ ເກັບເພີ່ມອີກ 12 ຄະແນນ, ທີ 2 ຟາບີໂອ ດີ ຈານນານໂຕນີໂອ, ທີ 3 ຟຣັງໂກ້ ມໍຣບີເດວລີ້.

ສະຫລຸບຄະແນນນັກຂັບຜ່ານໄປ 14 ສະໜາມ ສອງອ້າຍນ້ອງ ມາກ ແລະ ອາເລັກ ມາເກັຊ ຢູ່ແຖວໜ້າ, ມາກ ເປັນຜູ້ນຳ ມີ 455 ຄະແນນ, ນຳນ້ອງຊາຍ ອາເລັກ ເຖິງ 175 ຄະແນນ ໂອກາດເປັນແຊ້ມໂລກສົດໃສ, ທີ 3 ບານາຢ້າ ມີ 228 ຄະແນນ.

ທີມຜູ້ສ້າງ ທີມນຳແມ່ນຄ້າຍ ດູຄາຕິ ມີ 504 ຄະແນນ, ທີສອງ ອາພີເລຍ ມີ 228 ຄະແນນ, ທີ 3 ເຄທີເອັມ ມີ 215 ຄະແນນ.

ສະໜາມຕໍ່ໄປ ສະໜາມທີ 15 ລາຍການ Catalan Grand Prix ທີ່ສະໜາມ Circuit de Barcelona-Catalunya, ປະເທດສະເປນ (ແອັສປາຍ) ຈະແຂ່ງຂັນວັນທີ 7 ກັນຍາ ທີ່ຈະມາເຖິງນີ້.