ງານມະຫາກຳການແຂ່ງຂັນສີມືແຮງງານອາຊຽນ ຄັ້ງທີ 14 ໄດ້ໄຂຂຶ້ນຢ່າງເປັນທາງການ ທີ່ໂຮງແຮມມາຮີອອດ, ນະຄອນຫຼວງມານີລາ, ປະເທດຟີລິບປິນ ໃນວັນທີ 25 ສິງຫາ 2025 ຕາມເວລາທ້ອງຖິ່ນ, ເຊິ່ງການແຂ່ງຂັນສີມືແຮງງານອາຊຽນໃນຄັ້ງນີ້ ມີສາຂາວິຊາຊີບແຂ່ງຂັນທັງໝົດ 32 ສາຂາ ໃນ 6 ຂະແໜງການ ແລະ ມີປະເທດສະມາຊິກອາຊຽນເຂົ້າຮ່ວມທັງໝົດ 11 ປະເທດ, ພິເສດແມ່ນປະເທດ ຕີມໍເລດເຕ ໄດ້ເຂົ້າຮ່ວມເປັນຄັ້ງທຳອິດ. ມີຄະນະຜູ້ແທນ, ຊ່ຽວຊານ, ນັກແຂ່ງຂັນ, ຜູ້ສັງເກດການ ແລະ ນັກຂ່າວຈາກປະເທດສະມາຊິກອາຊຽນເຂົ້າຮ່ວມທັງໝົດປະມານ 1000 ກວ່າຄົນ. ການແຂ່ງຂັນສີມືແຮງງານອາຊຽນ ຄັ້ງທີ 14 ຈະໄດ້ຈັດຂຶ້ນທີ່ສູນການຄ້າໂລກ (World Trade Center) ຈະດໍາເນີນໄປ ເປັນເວລາ 3 ວັນ, ເລີ່ມແຕ່ ວັນທີ 26-28/8/2025.

ສປປ ລາວ ພວກເຮົາ ລັດຖະບານ ກໍຄືກະຊວງແຮງງານ ແລະ ສະຫວັດດີການສັງຄົມ ໄດ້ຄົ້ນຄວ້າ ແລະ ຄັດເລືອກເອົາສາຂາອາຊີບທີ່ ສປປ ລາວ ມີທ່າແຮງ ແລະ ມີສີມືແຮງງານດີເດັ່ນເຂົ້າຮ່ວມ ເຊິ່ງໄດ້ ສົ່ງຄະນະຜູ້ແທນ ນໍາໂດຍ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຄະນະຊ່ຽວຊານ ແລະ ນັກແຂ່ງຂັນສີມືແຮງງານທີມຊາດລາວ ເຂົ້າຮ່ວມທັງໝົດ 32 ທ່ານ ໃນ 5 ສາຂາອາຊີບໄດ້ແກ່: ສາຂາ ຊ່າງຕິດຕັ້ງໄຟຟ້າອາຄານ, ຊ່າງໄມ້ເຄື່ອງເຮືອນ, ຊ່າງປຸງແຕ່ງອາຫານ, ຊ່າງເວບເທັກໂນໂລຊີ ແລະ ຊ່າງອອກແບບກຼາບຟິກ.

ກ່ອນການເຂົ້າຮ່ວມແຂ່ງຂັນສີມືແຮງງານອາຊຽນໃນຄັ້ງນີ້ ຄະນະຮັບຜິດຊອບ, ຜູ້ຊ່ຽວຊານ, ຄູຝຶກ ກໍໄດ້ກະກຽມ ແລະ ເອົາໃຈໃສ່ ຈັດຕັ້ງການຝຶກຊ້ອມນັກແຂ່ງຂັນທີມຊາດຂອງພວກເຮົາຢ່າງເປັນປົກກະຕິ ເພື່ອໃຫ້ເກີດຄວາມຊຳນິຊໍານານ ແລະ ມີຄວາມຄ່ອງຕົວສູງ ໃນປະຕິບັດໜ້າວຽກຕາມໂຈດການແຂ່ງຂັນ ແລະ ໃຫ້ສຳເລັດຕາມກຳນົດເວລາທີ່ວາງໄວ້.

ຕໍ່ກັບການແຂ່ງຂັນຄັ້ງນີ້, ລາວເຮົາກໍຫວັງຢ່າງຍິ່ງວ່າການເຂົ້າຮ່ວມແຂ່ງຂັນສີມືແຮງງານອາຊຽນ ຄັ້ງທີ 14 ທີ່ປະເທດຟີລິບປິນເປັນເຈົ້າພາບ ທີມຊາດລາວ ຈະສາມາດຍາດໄດ້ລາງວັນໃດໜຶ່ງ ມາໃຫ້ປະເທດເຮົາ.

ທີ່ມາ: ຂ່າວສານກະຊວງແຮງງານ ແລະ ສະຫວັດດີການສັງຄົມ

ສະແດງຄຳຄິດເຫັນ