ເວລາເວົ້າເຖິງພະລັງງານແສງຕາເວັນ ພວກເຮົາຈະນຶກເຖິງແຜງໂຊລາເຊວສີຟ້າທີ່ຕິດຕັ້ງຢູ່ໃສ່ຫລັງຄາບ້ານ ເຊິ່ງໄດ້ຮັບຄວາມນິຍົມຫຼາຍຂຶ້ນຈາກກະແສດ້ານສິ່ງແວດລ້ອມແລະການປະຢັດພະລັງງານ. ແຕ່ຂໍ້ຈຳກັດແມ່ນມັນເຮັດວຽກໄດ້ດີເມື່ອມີແດດແຮງເທົ່ານັ້ນ.

ແຕ່ຫຼ້າສຸດ ນັກວິທະຍາສາດຈາກມະຫາວິທະຍາໄລ Rochester ໄດ້ທັບທຽມຂໍ້ຈຳກັດນັ້ນລົງ ດ້ວຍການພັດທະນາ ເຄື່ອງຜະລິດໄຟຟ້າເທີໂມອີເລັກຕິກພະລັງງານແສງຕາເວັນ (STEG: Solar Thermoelectric Generators) – ແຜງໂຊລາແບບໃໝ່ທີ່ອ້າງວ່າມີປະສິດທິຜົນສູງກວ່າແຜງໂຊລາໃນປະຈຸບັນເຖິງ 15 ເທົ່າ. ມັນສາມາດສ້າງໄຟຟ້າໄດ້ຈາກ “ຄວາມຮ້ອນ” ທຸກຮູບແບບ ບໍ່ແມ່ນພຽງແຕ່ແສງແດດ.

ລູ້ຈັກ STEG – ໂຮງໄຟຟ້ານ້ອຍທີ່ປ່ຽນ ‘ຄວາມຮ້ອນ’ ເປັນ ‘ໄຟຟ້າ’

STEG ບໍ່ແມ່ນເທັກໂນໂລຊີໃໝ່ ມັນເຮັດວຽກດ້ວຍຫຼັກການທີ່ເອີ້ນວ່າປະກົດການ Seebeck effect. ລອງຈິນຕະນາການເຖິງວັດສະດຸແຜ່ນໜຶ່ງທີ່ມີດ້ານຮ້ອນແລະດ້ານເຢັນ. ເມື່ອມີຄວາມແຕກຕ່າງຂອງອຸນຫະພູມລະຫວ່າງສອງດ້ານນີ້ ກະແສໄຟຟ້າຈະໄຫຼຜ່ານສານກຶ່ງຕົວນຳທີ່ແຊກຢູ່ກາງທັນທີ.

ຂໍ້ດີທີ່ສຸດຂອງ STEG ແມ່ນມັນສາມາດໃຊ້ແຫຼ່ງຄວາມຮ້ອນຫຍັງກໍໄດ້ ບໍ່ວ່າຈະເປັນຄວາມຮ້ອນຈາກແສງແດດ ຄວາມຮ້ອນຈາກເຄື່ອງຈັກໃນໂຮງງານ ຫຼືເຖິງແມ່ນຄວາມຮ້ອນຈາກຮ່າງກາຍມະນຸດ. ແຕ່ບັນຫາທີ່ເຮັດໃຫ້ມັນບໍ່ເຄີຍຖືກນຳມາໃຊ້ຢ່າງກວ້າງຂວາງ ເນື່ອງຈາກປະສິດທິຜົນຕ່ຳ. STEG ທົ່ວໄປສາມາດປ່ຽນພະລັງງານແສງຕາເວັນເປັນໄຟຟ້າໄດ້ບໍ່ເຖິງ 1% ເມື່ອສົມທຽບກັບແຜງໂຊລາທົ່ວໄປທີ່ທຳໄດ້ປະມານ 20%.

ວິທີແກ້ໄຂໃໝ່: ສ້າງຄວາມແຕກຕ່າງອຸນຫະພູມສູງສຸດ

ແທນທີ່ຈະໄປຍຸ້ງກັບສານກຶ່ງຕົວນຳ ທີມວິໄຈຈາກ Rochester ເລືອກວິທີການດັ່ງນີ້:

1. ສ້າງ ‘ໂລຫະດຳ’ ດູດກືນແສງ: ທີມວິໄຈໃຊ້ເທັກໂນໂລຊີເລເຊີຄວາມໄວສູງຍິງພື້ນຜິວຂອງໂລຫະທັງສະເຕນໃນລະດັບນາໂນ ເຮັດໃຫ້ມັນກາຍເປັນ “ໂລຫະດຳ” ທີ່ມີຄຸນສົມບັດດູດກືນພະລັງງານຈາກແສງຕາເວັນໄດ້ດີ ແລະຄາຍຄວາມຮ້ອນໄດ້ຊ້າ.

2. ສ້າງ ‘ເຮືອນກະຈົກນ້ອຍ’: ເຂົາເຈົ້າເອົາພຼາສຕິກໃສມາຄອບທັບໂລຫະດຳນັ້ນອີກຊັ້ນໜຶ່ງ ເພື່ອສ້າງສະພາບແວດລ້ອມຄື “ເຮືອນກະຈົກ” ຂະໜາດນ້ອຍ ຊ່ວຍກັກເກັບຄວາມຮ້ອນ ເຮັດໃຫ້ດ້ານຮ້ອນມີອຸນຫະພູມສູງຂຶ້ນ.

3. ອັບເກຣດແຜງລະບາຍຄວາມຮ້ອນ: ໃນດ້ານເຢັນ ເຂົາເຈົ້າໃຊ້ເທັກໂນໂລຊີເລເຊີແບບດຽວກັນຍິງລົງບົນແຜ່ນອາລູມີນຽມທຳມະດາ ເພື່ອສ້າງໂຄງສ້າງລະດັບນາໂນທີ່ຊ່ວຍເພີ່ມຄວາມສາມາດໃນການແຜ່ລັງສີແລະພາຄວາມຮ້ອນ ເຮັດໃຫ້ປະສິດທິຜົນການລະບາຍຄວາມຮ້ອນດີຂຶ້ນເຖິງສອງເທົ່າ.

ການນຳໄປໃຊ້ຢ່າງໃກ້ຕົວ

ທີມນັກວິໄຈເວົ້າວ່າຄວາມສຳເລັດໃນການເພີ່ມປະສິດທິຜົນຂຶ້ນ 15 ເທົ່ານີ້ ສາມາດນຳມາໃຊ້ຢ່າງໃກ້ຕົວກວ່າທີ່ຄິດ:

• ອຸປະກອນເຊນເຊີໄຮ້ສາຍ ຈຳນວນຫຼວງຫຼາຍໃນບ້ານຫຼືເມືອງ ຈະເຮັດວຽກໄດ້ດ້ວຍຕົວເອງໂດຍບໍ່ຕ້ອງມີແບດເຕີຣີ
• ອຸປະກອນສວມໃສ່ ເຊັ່ນ: ໂມງອັດສະລິຍະ ຫຼື ສາຍຮັດຂໍ້ມືເພື່ອສຸຂະພາບທີ່ສາມາດຊາດໄຟໄດ້ຈາກຄວາມຮ້ອນໃນຜິວໜັງຕະຫຼອດເວລາ
• ພະລັງງານສຳລັບພື້ນທີ່ຫ່າງໄກ ທີ່ໄຟຟ້າເຂົ້າບໍ່ເຖິງ

ບາງຄັ້ງນະວັດກຳທີ່ປ່ຽນໂລກອາດມາຈາກການເບິ່ງບັນຫາເກົ່າດ້ວຍມຸມມອງໃໝ່. ການປ່ຽນຈຸດສຸມຈາກສິ່ງທີ່ສະລັບສັບຊ້ອນໄປສູ່ພື້ນຖານທີ່ຖືກເບິ່ງຂ້າມ ຈົນນຳມາສູ່ແຜງຜະລິດພະລັງງານໄຟຟ້າທີ່ເຮັດວຽກໄດ້ທຸກທີ່ ທຸກເວລາ ບໍ່ວ່າວັນນັ້ນແດດຈະອອກຫຼືບໍ່ກໍຕາມ.

ຢ່າງໄກໃດກໍຕາມ ການທົດສອບນີ້ຍັງຢູ່ໃນຂັ້ນທົດລອງເທົ່ານັ້ນ.

ຂ່າວຈາກ: Rochester University

ສະແດງຄຳຄິດເຫັນ