ການວິໄຈຈາກມະຫາວິທະຍາໄລ Rockefeller ໄດ້ພັດທະນາວິທີການປິ່ນປົວໂຣກມະເຮັງແບບໃໝ່ທີ່ເອີ້ນວ່າ “ການສີດຢາເພື່ອລົບມະເຮັງ” ໂດຍເປັນການສີດແອນຕິບໍດີ (Antibody) ຫຼື ສານພູມຄຸ້ມກັນ ເຂົ້າໄປໃນກ້ອນເນື້ອງອກພຽງຈຸດດຽວ ແຕ່ກັບສາມາດກະຕຸ້ນລະບົບພູມຄຸ້ມກັນໃຫ້ກຳຈັດເຊວມະເຮັງໄດ້ທົ່ວຮ່າງກາຍ

ແອນຕິບໍດີ 2141-V11 ປິ່ນປົວໂຣກມະເຮັງ

ແອນຕິບໍດີ 2141-V11 ແມ່ນແອນຕິບໍດີທີ່ຖືກອອກແບບມາເພື່ອໃຊ້ໃນການປິ່ນປົວມະເຮັງ ເຊິ່ງແອນຕິບໍດີຊະນິດນີ້ສາມາດຈັບກັບ CD40 ທີ່ກະຕຸ້ນການເຮັດວຽກຂອງລະບົບພູມຄຸ້ມກັນໄດ້ຢ່າງມີປະສິດທິຜົນ ໂດຍໃຊ້ສີດຕົງເຂົ້າສູ່ກ້ອນເນື້ອທີ່ມີເຊວມະເຮັງເພື່ອຍັບຍັ້ງການແຜ່ຂະຫຍາຍຂອງເຊວມະເຮັງໄປຍັງເຊວປົກກະຕິ

ທີມນັກວິໄຈໄດ້ທົດສອບຢາຕົວນີ້ໃນຜູ້ປ່ວຍໂຣກມະເຮັງໄລຍະລຸກລາມກວ່າ 12 ຄົນ ໃນການທົດລອງໄລຍະແຮກ ແລະໄດ້ພົບກັບຜົນຕອບທີ່ອາດເປັນຄວາມຫວັງໃນການຜະລິດຢາຫຼືສ້າງການປິ່ນປົວໃໝ່ສຳລັບຜູ້ປ່ວຍໂຣກມະເຮັງ

ຫຼັງຈາກຜູ້ປ່ວຍໃນການທົດລອງໄດ້ສີດຢາຊະນິດນີ້ເຂົ້າໄປພົບວ່າ:

• ເນື້ອງອກຂອງຜູ້ປ່ວຍກວ່າຄິງມີຂະໜາດນ້ອຍລົງ
• ຜູ້ປ່ວຍ 2 ລາຍທີ່ເປັນຜູ້ປ່ວຍມະເຮັງຜິວໜັງເມລາໂນມາ ແລະມະເຮັງເຕົ້ານົມໄລຍະທີ່ແຜ່ຂະຫຍາຍ ຕອບສະໜອງຕໍ່ໂຣກໄດ້ເປັນຢ່າງດີ ໂດຍບໍ່ພົບຮ່ອງຮອຍໂຣກມະເຮັງຫຼັງການປິ່ນປົວ

ຈຸດທີ່ຫນ້າສົນໃຈຍິ່ງໄປກວ່ານັ້ນ ແມ່ນການສີດຢາໃນກ້ອນເນື້ອງອກພຽງຈຸດດຽວ ກັບກະຕຸ້ນໃຫ້ເນື້ອງອກທີ່ຢູ່ບໍລິເວນອື່ນໃນຮ່າງກາຍຫາຍໄປ ແລະລຸດລົງດ້ວຍ

ການສຶກສານີ້ເລີ່ມຕົ້ນມາຕັ້ງແຕ່ຊ່ວງປີ 2018 ເຊິ່ງພັດທະນາມາຈາກງານວິໄຈຊິ້ນກ່ອນທີ່ເຄີຍທົດສອບໃນລັກສະນະຄືກັນ ຄືການກະຕຸ້ນການເຮັດວຽກຂອງ CD40 ແຕ່ຜົນຕອບທີ່ບໍ່ດີສັກເທົ່າໃດ ແລະຍັງພົບຜົນຂ້າງຄຽງທີ່ຮຸນແຮງເມື່ອນຳໄປທົດລອງກັບມະນຸດ

ສາດສະດາຈານ Jeffrey V. Ravetch ຈາກມະຫາວິທະຍາໄລ Rockefeller ແລະທີມວິໄຈຈິ່ງກັບໄປທົບທວນແນວຄວາມຄິດເກົ່າ ແລະພົບວ່າປັນຫາບໍ່ໄດ້ຢູ່ທີ່ຫຼັກການເຮັດວຽກ ແຕ່ເປັນວິທີການອອກແບບ ແລະສົ່ງຢາເຂົ້າສູ່ຮ່າງກາຍ ທີມວິໄຈໄດ້ລອງທົດສອບດ້ວຍການປ່ຽນວິທີໃຫ້ຢາ ຈາກເກົ່າທີ່ສີດເຂົ້າກະແສເລືອດເພື່ອໃຫ້ຢາໄຫຼເວຍີນທົ່ວຮ່າງກາຍ ມາເປັນການສີດຕົງເຂົ້າສູ່ກ້ອນເນື້ອງອກ ຫຼືບໍລິເວນທີ່ມີເຊວມະເຮັງແທນ ແລະອອກແບບຢາໃໝ່ໃຫ້ຈັບ CD40 ໄດ້ດີຂຶ້ນ

ກົນໄກການເຮັດວຽກຄືການສ້າງ ‘ສູນບັນຊາການ’ ຂອງພູມຄຸ້ມກັນ

ຫຼັງການສີດຢາ ກ້ອນເນື້ອງອກຈະຖືກ “ປ່ຽນສະພາບ” ໃຫ້ກາຍເປັນແຫຼ່ງລວມຕົວຂອງເຊວພູມຄຸ້ມກັນ ຫຼືທີ່ເອີ້ນວ່າ Tertiary Lymphoid Structures (TLS) ເຊິ່ງເຮັດໜ້າທີ່ເປັນ “ສູນບັນຊາການ” ທີ່ຄອຍສັ່ງການ ແລະກະຕຸ້ນໃຫ້ເຊວພູມຄຸ້ມກັນເຮັດວຽກຮ່ວມກັນໄດ້ຢ່າງມີປະສິດທິຜົນ ເຊິ່ງກະຕຸ້ນລະບົບພູມຄຸ້ມກັນຂອງຮ່າງກາຍໂດຍລວມໃຫ້ຕື່ນຕັວ ແລະອອກຕາມລ້າທຳລາຍເຊວມະເຮັງ ບໍ່ພຽງແຕ່ກ້ອນທີ່ຖືກສີດ ແຕ່ລວມເຖິງກ້ອນເຊວມະເຮັງອື່ນໆທົ່ວຮ່າງກາຍດ້ວຍ

ການວິໄຈພົບວ່າຜູ້ປ່ວຍທີ່ມີລະດັບເຊວ T (ເຊວ T ແມ່ນເຊວເມັດເລືອດຂາວຊະນິດນຶ່ງໃນລະບົບພູມຄຸ້ມກັນ ທີ່ມີບົດບາດສຳຄັນໃນການປ້ອງກັນ ແລະກຳຈັດເຊື້ອໂຣກ ລວມເຖິງເຊວຜິດປົກກະຕິ ເຊັ່ນ ເຊວມະເຮັງ) ສູງກ່ອນການປິ່ນປົວຈະຕອບສະໜອງຕໍ່ຢາໄດ້ດີກວ່າ ເຊິ່ງຂໍ້ມູນນີ້ຈະເປັນປະໂຫຍດໃນການຄັດເລືອກຄູ້ປ່ວຍທີ່ເໝາະສົມ ແລະນຳໄປສູ່ການປິ່ນປົວມະເຮັງແບບ Precision Medicine ຫຼືການແພດເສາະສະບຸກຄົນໃນອະນາຄົດ

ໂມເດວການສີດຢາເສາະສະຈຸດນີ້ບໍ່ພຽງລຸດຜົນຂ້າງຄຽງ ແຕ່ຍັງສ້າງການຕອບສະໜອງຂອງພູມຄຸ້ມກັນທົ່ວຮ່າງກາຍທີ່ອາດປ່ຽນໜ້າວິທີການປິ່ນປົວມະເຮັງໃນອະນາຄົດໄດ້ເລີຍທີ່ດຽວ

ຂ່າວຈາກ: thebrighterside

ສະແດງຄຳຄິດເຫັນ