OpenAI ກຳລັງເພີ່ມເຄື່ອງມືຄວບຄຸມສຳລັບຜູ້ປົກຄອງ (Parental Control) ເພື່ອໃຫ້ສາມາດຈັດການການໃຊ້ງານ ChatGPT ສຳລັບເດັກນ້ອຍ ຫຼືຜູ້ໃຊ້ງານທີ່ຍັງບໍ່ບັນລຸນິຕິພາບ ຫຼັງຈາກເກີດເຫດການເດັກໜຸ່ມອາຍຸ 16 ປີເສຍຊີວິດ ເນື່ອງຈາກຖືກລ່ວງລະເມີດທາງເພດ ແລະ ໄດ້ສົນທະນາປຶກສາກັບ ChatGPT

ຕັ້ງແຕ່ທີ່ມີນະວັດຕະກຳ AI ເກີດຂຶ້ນ ພວກເຮົາຕ່າງໄດ້ພົບປັນຫາຫຼາຍຢ່າງກ່ຽວກັບການໃຊ້ງານແລະແນວຄິດຂອງການເຮັດວຽກຂອງ AI ແຕ່ປັນຫາຫຼ້າສຸດທີ່ພວກເຮົາກຳລັງປະເຊີນໜ້າ ແມ່ນປັນຫາຂອງ ‘ຜົນໄດ້ຮັບ’ ທີ່ໄດ້ຈາກ AI ເຫຼົ່ານີ້ ຊຶ່ງຜົນໄດ້ຮັບທີ່ວ່ານັ້ນບໍ່ໃຊ່ເລື່ອງຂອງຄຳຕອບທີ່ຜິດ ຫຼືບິດເບືອນຄວາມຈິງເໝືອນແຕ່ກ່ອນ ແຕ່ຍັງໝາຍເຖິງຜົນກະທົບຕໍ່ພຶດຕິກຳຂອງຜູ້ໃຊ້ງານ ໂດຍສະເພາະກຸ່ມຜູ້ໃຊ້ງານທີ່ຍັງບໍ່ບັນລຸນິຕິພາບ ແລະ ກຸ່ມທີ່ອ່ອນແອ ຊຶ່ງຫຼາຍໆເຄັສຂອງຜູ້ໃຊ້ງານກຸ່ມເຫຼົ່ານີ້ ມັກຈະປຶກສາ ChatGPT ແລະ ເລືອກທີ່ຈະຢຸດຊີວິດຕົນເອງ ແລະ ນີ້ກໍເປັນຈຸດເລີ່ມຕົ້ນທີ່ OpenAI ຕ້ອງເພີ່ມຟີເຈີຄວບຄຸມການດູແລຈາກປົກຄອງຢ່າງແທ້ຈິງ

ປັນຫາຈາກເຄັສເດັກອາຍຸ 16 ປີ

ເກື່ອນກ່ອນວ່ານີ້ບໍ່ແມ່ນຄັ້ງທຳອິດທີ່ ChatGPT ຖືກຟ້ອງເລື່ອງການໃຊ້ງານ ແຕ່ຄັ້ງນີ້ແມ່ນການຟ້ອງທີ່ຮ້າຍແຮງກວ່າເຄັສກ່ອນໆທີ່ຜ່ານມາ ເພາະແມ່ນເລື່ອງຂອງການສູນເສີຍຊີວິດຂອງຜູ້ໃຊ້ງານ ຈາກຮູບແບບການຕອບຄຳຖາມທີ່ມີແນວໂນ້ມລຳອຽງ ແລະ ເຫັນດີເຫັນງາມກັບຜູ້ໃຊ້ງານ ໂດຍບໍ່ແຍກແຍະວ່າສິ່ງທີ່ຜູ້ໃຊ້ງານພິມເຂົ້າມາມີຮູບແບບຂອງການເປັນ ຊຶມເສຍປະປົນຢູ່ ແລະ ບໍ່ຮູ້ວ່າຄວນຫຼີກລ່ຽງຄຳຕອບແບບໃດ ຢ່າງເຄັສເດັກອາຍຸ 16 ທີ່ເລືອກປຶກສາດ້ານອາລົມໂດຍການເລີ່ມຕົ້ນປະໂຫຍກວ່າ ‘ຊີວິດມັນບໍ່ມີຄວາມໝາຍ’ (Life is meaningless) ແລະ ChatGPT ກໍຕອບກັບຄືນວ່າ ‘ແນວຄິດນີ້ກໍບໍ່ຜິດ ໃນເຊິງມືດມົວ’ (That mindset makes sense in its own dark way)

ນອກເໜືອຈາກເນື້ອໃນເຫຼົ່ານີ້ ຍັງມີຄຳທີ່ນ່າວິຕົກຈາກ ChatGPT ຢ່າງຄຳວ່າ ‘Beautiful suicide’ ຫຼື ‘ການຂ້າຕົວຕາຍທີ່ງາມ’ ສຳລັບພວກເຮົາເອງກໍເບິ່ງວ່າແປກດີທີ່ເມື່ອເວົ້າເຖິງເລື່ອງເນື້ອຫາກ່ຽວກັບສິ່ງຜິດກົດໝາຍໃນເຊິງວິເຄາະ ChatGPT ມັກຈະບອກວ່າ ‘ບໍ່ສາມາດໃຫ້ຄຳຕອບໄດ້’ ແຕ່ພໍເປັນເລື່ອງຄວາມຕາຍຂອງຊີວິດ ທີ່ເຫັນໄດ້ຊັດວ່າຜູ້ໃຊ້ກຳລັງມີອາການຊຶມເສຍ ChatGPT ກັບຕອບກັບໄດ້ທັນທີ ແຖມຍັງເຮັດໃຫ້ການຂ້າຕົວຕາຍເປັນເລື່ອງປົກກະຕິ ແລະ ເປັນໄປໃນເຊິງ Romanticize ອີກດ້ວຍ

OpenAI ຈະເຮັດຫຍັງແດ່?

ຈາກຂໍ້ມູນໃນເວັບໄຊ The Verge ໄດ້ລະບຸວ່າ ChatGPT ກຳລັງຈະເພີ່ມຟີເຈີຄວບຄຸມສຳລັບຜູ້ປົກຄອງ OpenAI ແລະ Microsoft ຊຶ່ງເປັນຄູ່ຮ່ວມງານກັນໃນການພັດທະນາ AI ໄດ້ປະກາດຄວາມຮ່ວມມືໃນການສ້າງແນວທາງແລະນະໂຍບາຍດ້ານຄວາມປອດໄພທີ່ສຸມໃສ່ການປົກປ້ອງເດັກແລະເຍົາວຊົນໂດຍສະເພາະ ເພື່ອຮັບມືກັບຄວາມສ່ຽງທີ່ອາດເກີດຂຶ້ນຈາກການໃຊ້ແພລດຟອມ AI

ຟີເຈີໃໝ່ນີ້ຈະຊ່ວຍໃຫ້ຜູ້ປົກຄອງສາມາດຈັດການການໃຊ້ງານ ChatGPT ຂອງຜູ້ໃຊ້ງານທີ່ຍັງບໍ່ບັນລຸນິຕິພາບໄດ້ຢ່າງຄອບຄຸມຫຼາຍຂຶ້ນ ບໍ່ວ່າຈະເປັນການເບິ່ງປະຫວັດການສົນທະນາ ເພື່ອຕິດຕາມວ່າສົນທະນາກັບ AI ຢ່າງໃດ ຫຼື ແມ້ກະທັ້ງການບລັອກການເຂົ້າເຖິງເນື້ອຫາທີ່ບໍ່ເໝາະສົມ ນອກຈາກນີ້ຍັງສາມາດຕັ້ງຄ່າຈຳກັດການໃຊ້ງານໃນຮູບແບບຕ່າງໆໄດ້ອີກດ້ວຍ

ທັງສອງບໍລິສັດຕະຫນັກເຖິງຄວາມຈຳເປັນໃນການປ້ອງກັນບໍ່ໃຫ້ AI ສ້າງ ຫຼື ເຜີຍແຜ່ເນື້ອຫາທີ່ເປັນອັນຕະລາຍ ເຊັ່ນການລ່ວງລະເມີດເດັກ ດັ່ງນັ້ນຈຶ່ງໄດ້ມີການປັບປຸງອັລກໍຣິທຶມຢ່າງຕໍ່ເນື່ອງ ເພື່ອເພີ່ມປະສິດທິພາບໃນການຄັດກອງເນື້ອຫາທີ່ເປັນໄພຂົ່ມຂູ່ ໂດຍຟີເຈີເຫຼົ່ານີ້ຈະເລີ່ມເປີດໃຫ້ທົດລອງໃຊ້ງານໃນວົງຈຳກັດກ່ອນຈະຄ່ອຍໆເປີດຕົວຢ່າງເປັນທາງການໃນອະນາຄົດ

ນອກຈາກນີ້ OpenAI ຍັງໄດ້ຢືນຢັນວ່າຈະເຮັດວຽກຮ່ວມກັບພາກລັດແລະຜູ້ຊ່ຽວຊານດ້ານຄວາມປອດໄພສຳລັບເດັກແລະເຍົາວຊົນ ເພື່ອໃຫ້ແນ່ໃຈວ່າເຄື່ອງມືຄວບຄຸມເຫຼົ່ານີ້ຈະສາມາດໃຊ້ງານໄດ້ຢ່າງມີປະສິດທິພາບແລະສ້າງຄວາມປອດໄພສູງສຸດໃຫ້ກັບຜູ້ໃຊ້ທີ່ເປັນເດັກທຸກຄົນ

ຂ່າວຈາກ:The Verge

ສະແດງຄຳຄິດເຫັນ