ວິທະຍຸກະຈາຍສຽງຫວຽດນາມລາຍງານ ໃນວັນທີ 28 ສິງຫາ ຜ່ານມາວ່າ: ໂດຍຕອບຮັບຄຳເຊີນຂອງທ່ານ ເຈິ່ນແທັງເໝີ້ນ ປະທານສະພາແຫ່ງຊາດ ຫວຽດນາມ, ທ່ານ ເຈີຣີ່ ບຣາວລີ ປະທານສະພາແຫ່ງຊາດນູແວນເຊລັງ ໄດ້ມາຢ້ຽມຢາມ ຫວຽດນາມ ຢ່າງເປັນທາງການ, ແຕ່ວັນທີ 27 – 31 ສິງຫານີ້. ໃນຕອນເຊົ້າຂອງວັນທີ 28 ສິງຫາ ຜ່ານມາ, ຢູ່ຫໍສະພາແຫ່ງຊາດ, ທ່ານ ເຈິ່ນແທັງເໝີ້ນ ປະທານສະພາແຫ່ງຊາດ ຫວຽດນາມ ໄດ້ເປັນປະທານພິທີຕ້ອນຮັບທ່ານ ເຈີຣີ່ ບຣາວລີ ປະທານສະພາແຫ່ງຊາດນູແວນເຊລັງ. ພາຍຫຼັງພິທີຕ້ອນຮັບ, ການນຳ 2 ທ່ານໄດ້ດຳເນີນການພົບປະເຈລະຈາ.

ໃນການໂອ້ລົມເຈລະຈາ, ທ່ານ ເຈິ່ນແທັງເໝີ້ນ ສະເໜີໃຫ້ 2 ຝ່າຍສືບຕໍ່ປັບປຸງ ແລະ ຮັດແໜ້ນການພົວພັນດ້ານການເມືອງ ຜ່ານບັນດາການຢ້ຽມຢາມ ແລະ ພົບປະຂັ້ນສູງ, ເພີ່ມທະວີການພົບປະແລກປ່ຽນລະຫວ່າງບັນດາຄະນະ, ກຸ່ມສະມາຊິກລັດຖະສະພາມິດຕະພາບ, ກຸ່ມສະມາຊິກລັດຖະສະພາໜຸ່ມຂອງ 2 ປະເທດ; ທ່ານສະເໜີໃຫ້ 2 ກະຊວງການຕ່າງປະເທດຂອງ 2 ປະເທດ ຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານໃຫ້ສົມບູນແບບໂດຍໄວ; ທ່ານສະເໜີໃຫ້ ນູແວນເຊລັງ ຊ່ວຍເຫຼືອບຳລຸງສ້າງ, ຍົກສູງກຳລັງຄວາມສາມາດໃຫ້ແກ່ ຫວຽດນາມ ໃນການເຂົ້າຮ່ວມການເຄືຶ່ອນໄຫວຮັກສາສັນຕິພາບຂອງສະຫະປະຊາຊາດ, 2 ຝ່າຍມີບັນດາມາດຕະການບຸກທະລຸເພື່ອນຳວົງເງິນການຄ້າໃຫ້ບັນລຸ 3 ຕື້ໂດລາ ໃນປີ 2026 ໂດຍໄວ; ພ້ອມກັນນັ້ນ, ກໍໝູນໃຊ້ໂອກາດຈາກບັນດາສັນຍາການຄ້າເສລີ ຊຶ່ງທັງ 2 ປະເທດລ້ວນແຕ່ເປັນສະມາຊິກ.

ສ່ວນທ່ານ ເຈີຣີ່ ບຣາວລີ ຢືນຢັນວ່າ: ນູແວນເຊລັງ ພ້ອມແລ້ວທີ່ຈະພິຈາລະນາເພີ່ມການນຳເຂົ້າບັນດາຜະລິດຕະພັນທີ່ມີທ່າແຮງຂອງ ຫວຽດນາມ ເຂົ້າຕະຫຼາດ ນູແວນເຊລັງ, ເພື່ອຊ່ວຍໃຫ້ການຄ້າ 2 ປະເທດເຕີບໂຕ ບັນລຸລະດັບ 3 ຕື້ໂດລາໂດຍໄວ. ການນຳສະພາແຫ່ງຊາດ 2 ທ່ານກໍເຫັນດີຕ້ອງສືບຕໍ່ສົມທົບກັນ ແລະ ສະໜັບສະໜູນຊຶ່ງກັນ ແລະ ກັນຢູ່ບັນດາເວທີປາໄສພາກພື້ນ ແລະ ສາກົນ, ໂດຍສະເພາະແມ່ນສະຫະປະຊາຊາດ, ອາຊຽນ ແລະ ບັນດາເວທີປາໄສໂດຍ ອາຊຽນ ນຳພາ.

ຂ່າວ: ປະຊາຊົນ

ສະແດງຄຳຄິດເຫັນ