ກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມ​ (ຮສສ) ໄດ້ສົ່ງແຮງງານຈາກ ສອງ ເມືອງ ຄື: ໄຊທານີ ແລະ ເມືອງຫາດຊາຍຟອງ ນະຄອນຫຼວງວຽງຈັນ ຈຳນວນ 114 ຄົນ ໄປເຮັດວຽກລະດູການຂະແໜງກະສິກຳ ຢູ່ເມືອງຈອງຊອນ ແຂວງ ກັງວອນ ປະເທດ ສ.ເກົາຫຼີ, ໃນວັນທີ 23 ພຶກສະພາ 2023​ ນີ້, ນຳພາຄະນະໂດຍວີຊາການຈາກ ພະແນກຈັດຫາງານຕ່າງປະເທດ ກົມການຈັດຫາງານ ກຊ ຮສສ ແລະ ໄດ້ຮັບການຕ້ອນຮັບຈາກເມືອງ ຈອງວອນ ດວ້ຍຄວາມອົບອຸ່ນ

ການຈັດສົ່ງແຮງງານໄປເຮັດວຽກລະດູການຂະແໜງກະສິກຳ 5 ເດືອນໃນຄັ້ງນີ້ ແມ່ນການຮ່ວມມື MOU ກັນລະຫວ່າງ ກົມການຈັດຫາງານ ແລະ ເມືອງຈອງຊອນ ສ.ເກົາຫລີ ໃນການຈັດສົ່ງແຮງງານລາວໄປເຮັດວຽກຕາມລະດູການທີ່ເມືອງດັ່ງກ່າວນີ້ ໂດຍໄດ້ເນັ້ນໃສ່ສະເພາະປະຊາຊົນ ສອງເມືອງຄື: ເມືອງໄຊທານີ ແລະ ເມືອງຫາດຊາຍຟອງ ນະຄອນຫຼວງວຽງຈັນ. ການຈັດສົ່ງຈະເປັນບາດກ້າວສໍາຄັນ

ແລະ ສ້າງຜົນປະໂຫຍດໃຫ້ແກ່ສອງຝ່າຍ. ສໍາລັບ ແຮງງານຂອງ ສປປ ລາວ ກໍ່ຈະໄດ້ຮັບການພັດທະນາສີມືແຮງງານ ແລະ ມ່ີລາຍຮັບໃຫ້ແກ່ຕົນແຮງງານເອງ ແລະ ຄອບຄົວ ພ້ອມທັງຈະຊ່ວຍຊຸກຍູ້ການຂະຫຍາຍຕົວຂອງເສດຖະກິດ ຂອງ ສປປ ລາວ. ຊາວກະສິກອນ, ເຈົ້າຂອງຟາມ ພາຍໃນເມືອງ ຈອງຊອນ ກໍ່ຈະມີແຮງງານເຂົ້າຮັບໃຊ້ການຜະລິດກະສິກໍາຕະຫຼອດລະດູການ.

ເຖິງຢ່າງໃດກໍຕາມ ກົມການຈັດຫາງານ ກະຊວງຮສສ ຂໍຝາກເຖິງແຮງງານລາວບັນດາເຜົ່າ ທີ່ມີຄວາມສົນໃຈໄປເຮັດວຽກຢູ່ຕາ່ງປະເທດ, ໂດຍສະເພາະປະເທດ ສ.ເກົາຫລີ ທີ່ສັງຄົມໃຫ້ຄວາມສົນໃຈເປັນຢ່າງຫລາຍ ໃຫ້ມີສະຕິລະວັງຕົວ ຢ່າຫຼົງເຊື່ອບຸກຄົນ ຫຼື ນິຕິບຸກຄົນ ບໍ່ຫວັງດີຄົນແອບອ້າງໃນການຈັດສົ່ງແຮງງານໄປຢູ່ປະເທດດັ່ງກ່າວ ດວ້ຍຫລາຍຮູບແບບຮຽກເກັບເງິນລວ່ງໜ້າກ່ອນຢ່າງເດັດຂາດ.

ແຮງງານລາວມີຄວາມສົນໃຈຢາກເຮັດວຽກຢູ່ພາຍໃນປະເທດ ແມ່ນໃຫ້ພົວພັນກັບ ພະແນກແຮງງານ ແລ ສະຫວັດດີການສັງຄົມ ແຂວງ ແລະ ນະຄອນຫຼວງ ໄດ້ຈັດຕັ້ງການຂຶ້ນທະບຽນແຮງງານ ດ້ວຍລະບົບອອນລາຍ, ອັອຟລາຍ ແລະ ຂຶ້ນທະບຽນຊຶ່ງໜ້າໃນ 3 ເປົ້າໝາຍຄື: ຜູ້ຊອກຫາວຽກເຮັດງານທຳພາຍໃນ ແລະ ໄປຕ່າງປະເທດ, ຜູ້ຕ້ອງການຝຶກສີມືແຮງງານ ແລະ ຄວາມຕ້ອງການແຮງງານພາຍໃນປະເທດ (ຕຳແໜ່ງງານວ່າງ). ຊຶ່ງຜູ້ຊອກຫາວຽກເຮັດງານທຳ ແລະ ຫົວໜ່ວຍແຮງງານສາມາດພົວພັນກັບຈຸດບໍລິການຈັດຫາງານທີ່ທ່ານຢູ່ໃກ້ ຫຼື ເຂົ້າໃຊ້ບໍລິການຜ່ານຕາມເວບໄຊຂໍ້ມູນຂ່າວສານຕະຫຼາດແຮງງານ (www.lmis.gov.la).

(ຂ່າວສານສສ)

ສະແດງຄຳຄິດເຫັນ