ພິທີເປີດນໍາໃຊ້ເສັ້ນທາງເບຕົງແບບມີສ່ວນຮ່ວມບ້ານໂພນໄຊ ນະຄອນປາກເຊ ແຂວງຈໍາປາສັກຈັດຂຶ້ນ ໃນວັນທີ 29 ສິງຫາຜ່ານມານີ້ ທີ່ນະຄອນປາກເຊ ໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ນາຍົກລັດຖະມົນຕີ, ມີທ່ານ ອາລຸນໄຊ ສູນນະລາດ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈຳປາສັກ ພ້ອມດ້ວຍການນຳຂັ້ນສູງຈາກສູນກາງ, ນະຄອນປາກເຊ, ນັກທຸລະກິດ-ຜູ້ປະກອບການກ່ຽວຂ້ອງເຂົ້າຮ່ວມ.

ທ່ານ ສຸພາບ ທຳມະຮັກສາ ເລຂາພັກນະຄອນປາກເຊ ໄດ້ລາຍງານກ່ຽວກັບການກໍ່ສ້າງ, ປັບປຸງ, ຍົກລະ ດັບເສັ້ນທາງບ້ານໂພນໄຊຈາກເສັ້ນທາງປູຢາງມາເປັນເສັ້ນທາງເບຕົງ ໃນຮູບແບບສົມທົບທຶນລະຫວ່າງພາກລັດສັງຄົມ ແລະ ປະຊາຊົນມີສ່ວນຮ່ວມ. ບ້ານໂພນໄຊຕັ້ງຢູ່ໃຈກາງຂອງນະຄອນປາກເຊໄດ້ຮັບການຢັ້ງຢືນເປັນບ້ານພັດທະນາຕາມຂໍ້ຕົກລົງຂອງທ່ານເຈົ້າແຂວງຈຳປາສັກ ສະບັບເລກທີ 1571/ຈຂ.ຈສ, ລົງວັນທີ 29 ພະຈິກ 2011 ແລະ ໄດ້ປະກາດເປັນບ້ານພັດທະນາ ປະຊາຊົນຢູ່ດີກິນດີ ຕາມຂໍ້ຕົກລົງຂອງທ່ານເຈົ້າແຂວງ ສະບັບເລກທີ 181/ຈຂ.ຈສ ລົງວັນທີ 28 ກຸມພາ 2023 ເປັນບ້ານທໍາອິດຂອງແຂວງຈໍາປາສັກ. ໂດຍກອງປະຊຸມເລຂາ-ຮອງເລຂາພັກແຂວງສະໄໝວິສາມັນ ຄັ້ງວັນທີ 28 ເມສາ 2025 ໄດ້ຄົ້ນຄວ້າ, ປຶກສາຫາລືໃນຫົວຂໍ້ສະເພາະທີ່ຕິດພັນກັບນະຄອນ, ສະເພາະແມ່ນການສ້ອມແປງ-ກໍ່ສ້າງເສັ້ນທາງບ້ານໂພນໄຊ; ຊຶ່ງໄດ້ຊີ້ນຳໃຫ້ນະຄອນປາກເຊ ສົມທົບກັບພາກສ່ວນກ່ຽວຂ້ອງລົງສຳຫຼວດ ເພື່ອປັບປຸງ, ສ້ອມແປງເສັ້ນທາງດັ່ງກ່າວ; ຈາກນັ້ນ, ເຈົ້າແຂວງຈຳປາສັກໄດ້ອອກຂໍ້ຕົກລົງ ສະບັບເລກທີ 542/ຈຂ.ຈສ, ລົງວັນທີ 21 ພຶດສະພາ 2025 ວ່າດ້ວຍການອະນຸມັດໃຫ້ນະຄອນປາກເຊຈັດຕັ້ງປະຕິບັດການປັບປຸງ, ສ້ອມແປງເສັ້ນທາງບ້ານໂພນໄຊ ນະຄອນປາກເຊໃນຮູບແບບສົມທົບທຶນລະຫວ່າງລັດ ແລະ ສັງຄົມມີສ່ວນຮ່ວມຊຶ່ງມີມູນຄ່າການກໍ່ສ້າງທັງໝົດ 10 ຕື້ກີບເພື່ອສ້າງຂະບວນການ ຕ້ອນຮັບກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ແນໃສ່ສ້າງບ້ານໂພນໄຊໃຫ້ກາຍເປັນແຫຼ່ງທ່ອງທ່ຽວໃນຮູບແບບຕະຫຼາດກາງຄືນໃນຕໍ່ໜ້າ. ການກໍ່ສ້າງເສັ້ນທາງໃນຄັ້ງນີ້ມີເສັ້ນທາງເລກທີ 24 (ແຕ່ໂຮງແຮມດາວວຽງ ຫາ ເສັ້ນທາງ 4 ແຍກຮ້ານແຄນນອນ) ມີຄວາມຍາວ 320 ແມັດ, ກວ້າງ 12 ແມັດ, ມີຄວາມໜາ 23 ຊັງຕີແມັດ, ມີຮ່ອງລະບາຍນ້ຳລະບົບທໍ່ແບບໂຕຢູ (U) ແລະ ທາງຄົນຍ່າງກວ້າງເບື້ອງລະ 1,5 ແມັດ; ເສັ້ນທາງເລກທີ 46 (ແຕ່ 4 ແຍກໂພນບົກ ຫາ ຫຼັງໂຮງຮຽນ ມສ ໂພນໄຊ): ເສັ້ນທາງມີຄວາມຍາວ 420 ແມັດ, ກວ້າງ 9 ແມັດ, ຄວາມໜາ 23 ຊັງຕີແມັດ, ມີຮ່ອງລະບາຍນ້ຳລະບົບທໍ່ແບບໂຕຢູ (U) ແລະ ທາງຄົນຍ່າງກວ້າງເບື້ອງລະ 1,5 ແມັດ. ໃນພິທີໄດ້ມີການມອບ-ຮັບທຶນປະກອບສ່ວນເຂົ້າໃນການກໍ່ສ້າງເສັ້ນທາງດັ່ງກ່າວຄື: ທະນາຄານພັດ ທະນາລາວ 7 ຕື້ກີບ, ອົງການປົກຄອງແຂວງ 1,5 ຕື້ກີບ, ອົງການປົກຄອງນະຄອນປາກເຊ, ປະຊາຊົນບ້ານໂພນໄຊ ແລະ 9 ບ້ານໃນເທດສະບານ 1,5 ຕື້ກີບ.

ໂອກາດນີ້, ທ່ານ ສອນໄຊ ສີພັນດອນ ນາຍົກລັກຖະມົນຕີ ພ້ອມການນໍາໄດ້ໃຫ້ກຽດຕັດແຖບຜ້າ, ລັ່ນ ຄ້ອງ 9 ບາດເພື່ອເປັນສິລິມຸງຄຸນໃນການເປີດນໍາໃຊ້ເສັ້ນທາງເບຕົງແບບມີສ່ວນຮ່ວມບ້ານໂພນໄຊຢ່າງເປັນທາງການ, ຈາກນັ້ນຍັງໄດ້ຮ່ວມຊົມການວາງສະແດງສິນຄ້າຜະລິດຕະພັນໂອດັອບ.

ຂ່າວ: ພູວັນ

ສະແດງຄຳຄິດເຫັນ