ການປະກອບອາຊີບຫັດຖະກຳຕໍ່າຫູກ ເປັນທຸລະກິດໜຶ່ງທີ່ປະຊາຊົນເຜົ່າລື້ ບ້ານນາຍາງເໜືອເມືອງນໍ້າບາກ ແຂວງຫຼວງພະບາງ ໄດ້ພ້ອມກັນສືບທອດກັນມາຫຼາຍເຊັ່ນຄົນ ຈົນກາຍເປັນກິດຈະກຳໜຶ່ງທີ່ຕິດພັນກັບການດືງດູດນັກທ່ອງທ່ຽວ ເຂົ້າມາທ່ອງທ່ຽວພາຍໃນບ້ານ ສ້າງລາຍຮັບທີ່ໝັ້ນຄົງໃຫ້ກັບປະຊາຊົນ. ທ່ານ ນາງ ຄຳໄພ ຕາງໜ້າກຸ່ມຜະລິດ ເຄື່ອງຫັດຖະກຳຕໍ່າຫູກບ້ານນາຍາງເໜືອເມືອງນໍ້າບາກ ໄດ້ໃຫ້ສຳພາດກັບສື່ມວນຊົນແຂວງວ່າ: ການຜະລິດສີນຄ້າຫັດຖະກຳຕໍ່າຫູກ ຂອງປະຊາຊົນເຜົ່າລື້ບ້ານນາຍາງເໜືອເມືອງນໍ້າບາກ ໄດ້ເປັນທີ່ນິຍົມໃຫ້ກັບນັກທ່ອງທ່ຽວເປັນຢ່າງດີ, ຊຶ່ງໃນແຕ່ລະປີໄດ້ມີນັກທ່ອງທ່ຽວຕ່າງປະເທດ ໃຫ້ຄວາມສົນໃຈເຂົ້າໄປທ່ອງທ່ຽວ ຮຽນຮູ້ດ້ານວິຖີການດຳລົງຊີວິດຂອງປະຊາຊົນເຜົ່າລື້, ທັງຮຽນຮູ້ກ່ຽວກັບຫັດຖະກຳຕໍ່າແຜ່ນ ດ້ວຍວິທີດັ່ງເດີມ. ປັດຈຸບັນກຸ່ມການຜະລິດໄດ້ຕັ້ງໃຫ້ມີສູນສາທິດການຜະລິດ ຕິດພັນກັບການບໍລິການທີ່ພັກແຮມ ໃຫ້ກັບນັກທ່ອງທ່ຽວ.

ສຳລັບການຜະະລິດສີນຄ້າພາຍໃນກຸ່ມການຜະລິດ ໄດ້ລິເລີ່ມກູ້ຢືມເງິນຈາກທະນາຄານນະໂຍບາຍໃນປີ 2012 ເພື່ອມາໝູນໃຊ້ເຂົ້າໃນການຈັດຊື້ວັດຖຸດີບ ແລະ ບໍລິຫານວຽກງານພາຍໃນກຸ່ມ ທັງປະຕິບັດລະບຽບການຊຳລະຕົ້ນທືນ ແລະ ດອກເບ້ຍໃຫ້ທະນາຄານຕາມກຳນົດເວລາ, ມາຮອດປີ 2023 ໄດ້ຮັບການອານຸມັດເງິນກູ້ ງວດທີ່ 4 ຈຳນວນ 600 ລ້ານກີບ ເພື່ອມານຳໃຊ້ເຂົາໃນການສ້າງຕັ້ງກຸ່ມການຜະລິດຈຳນວນ 2 ກຸ່ມ ລວມມີສະມາຊິກທັງໝົດ 12 ຄົນ, ເພື່ອໃຫ້ການຜະລິດສີນຄ້າມີຄວາມຫຼາກຫຼາຍ ແລະພ້ອມຈຳໜ່າຍທັງພາຍໃນ ແລະ ຕ່າງປະເທດ, ຜ່ານມາໄດ້ຮັບການຊຸກຍູ້ຈາກຫຼາຍພາກສ່ວນ ເພື່ອນຳເອົາສີນຄ້າໄປວາງຂາຍໃນງານສຳຄັນ ເຮັດໃຫ້ການຜະລິດສີນຄ້າ ຫັດຖະກຳຕໍ່າຫູກຂອງບ້ານນາຍາງເໜືອເມືອງນໍ້າບາກ ໄດ້ຮັບຄວາມສົນໃຈຈາກແຂກທັງພາຍໃນ ແລະ ຕ່າງປະເທດເປັນຈຳນວນຫຼາຍ, ສາມາດສ້າງລາຍຮັບໄດ້ປະມານ 300 ລ້ານກີບຕໍ່ປີ ເມື່ອຫັກຄ່າໃຊ້ຈ່າຍຈະມີກຳໄລປະມານ 20-30% ຂອງລາຍຮັບທັງໝົດ ໂດຍມີການແບ່ງປັນໃຫ້ກັບສະມາຊິກກຸ່ມ ຕາມຜົນງານຂອງແຕ່ລະຄົນ. ປັດຈຸບັນຍັງມີສີນຄ້າໄວ້ຂາຍໃຫ້ກັບລູກຄ້າທີ່ສົນໃຈເປັນຈຳນວນຫຼາຍ ເຊັ່ນ: ຜ້າບຽງ, ຜ້າປູໂຕະ, ແຜຕັດເສື້ອ, ເຄື່ອງປະດັບ ແລະ ອື່ນໆ.

(ແຫຼ່ງຂ່າວ: ແຂວງຫຼວງພະບາງ)

ສະແດງຄຳຄິດເຫັນ