ແຂວງ​ຈໍາປາສັກ ສັ່ງປິດກິດຈະການ ຮ້ານອາຫານ​ 10 ແຫ່ງ ທີ່ບໍ່ຖຶກ​ຕ້ອງ​ຕາມ ​ລະ​ບຽບ​ການ

ແຂວງຈໍາປາສັກ ສັ່ງປິດກິດຈະການ ຮ້ານອາຫານ 10 ແຫ່ງ ທີ່ບໍ່ຖຶກຕ້ອງຕາມ ລະບຽບການ

ຮຽບຮຽງໂດຍ:Pele

ເຜີຍແຜ່: 3 September, 2025

ອໍານາດການປົກຄອງແຂວງຈໍາປາສັກ ສັ່ງປິດກິດຈະການຮ້ານອາຫານ 10 ແຫ່ງ ທີ່ບໍ່ຖຶກຕ້ອງຕາມລະບຽບການ ຍ້ອນຂໍອະນຸຍາດດຳເນີນທຸລະກິດໃນຮູບແບບຂອງຮ້ານອາຫານ ແຕ່ບໍລິການໃນຮູບແບບຮ້ານບັນເທີງ, ເລີ່ມຈັດຕັ້ງປະຕິບັດນັບແຕ່ວັນທີ 1 ກັນຍາ 2025 ເປັນຕົ້ນໄປ ຈົນກວ່າຈະໄດ້ຮັບເອກະສານຂໍອະນຸຍາດດຳເນີນທຸລະກິດບັນເທີງໃຫ້ຖຶກຕ້ອງຕາມລະບຽບການ, ຖ້າມີກໍລະນີຮ້ານໃດບໍ່ປະຕິບັດ ແລະ ຍັງຝ່າຝືນເປີດບໍລິການລູກຄ້າ, ຄະນະກຳມະການສະເພາະກິດບັນເທີງຂັ້ນແຂວງຈໍາປາສັກ ແລະ ນະຄອນປາກເຊ ຈະປະຕິບັດຕາມລະບຽບການຄຸ້ມຄອງທີ່ໄດ້ກຳນົດໄວ້.

ໃນຄໍ່າຄືນວັນທີ 1 ກັນຍາ 2025, ຄະນະກຳມະການສະເພາະກິດຄຸ້ມຄອງການເຄື່ອນໄຫວທຸລະກິດບັນເທີງ ແຂວງຈໍາປາສັກ ແລະ ນະຄອນປາກເຊ ໄດ້ຮ່ວມກັນເຄື່ອນໄຫວຕິດຕາມກວດກາຮ້ານອາຫານ 10 ແຫ່ງ ໃນນະຄອນປາກເຊ ຄື: ຮ້ານໂຊບາຣ, ຮ້ານເຢັດ 99, ຮ້ານຟູຊິໂອ, ຮ້ານອີນດີບາຣ, ຮ້ານຄໍເບຍ, ຮ້ານຮາເວີ (ຊ້ອກເວບ), ຮ້ານຟູນມູນ, ຮ້ານຊິນຈັງ, ຮ້ານທັດດາວັນ 2 ແລະ ຮ້ານໃຈສັ່ງມາ ທີ່ດຳເນີນທຸລະກິດບໍ່ຖືກຕ້ອງ ແລະ ບໍ່ສອດຄ່ອງຕາມລະບຽບກົດໝາຍທີ່ກຳນົດໄວ້ ໝາຍຄວາມວ່າ ຂໍອະນຸຍາດດຳເນີນທຸລະກິດໃນຮູບແບບຂອງຮ້ານອາຫານ ແຕ່ບໍລິການໃນຮູບແບບຮ້ານບັນເທີງ; ບໍ່ປະຕິບັດຕາມຄຳແນະນຳ ແລະ ບົດບັນທຶກຂອງຄະນະກຳມະການທີ່ລົງກວດກາໃນໄລຍະຜ່ານມາ, ຍ້ອນແນວນັ້ນ ຈິ່ງຖືກສັ່ງປິດກິດຈະການຮ້ານອາຫານ 10 ແຫ່ງ ດັ່ງກ່າວ.

ການສັ່ງປິດກິດຈະການຮ້ານອາຫານ 10 ແຫ່ງດັ່ງກ່າວ ແມ່ນອີງຕາມ ດຳລັດຂອງນາຍົກລັດຖະມົນຕີ ເລກທີ 315/ລບ, ລົງວັນທີ 2 ຕຸລາ 2017 ວ່າດ້ວຍການບັນເທີງ; ອີງຕາມ ບົດລາຍງງານການລົງກວດກາຂອງຄະນະກຳມະການ ຄັ້ງວັນທີ 23 ມິຖຸນາ 2025; ອີງຕາມຂໍ້ຕົກລົງເຈົ້າແຂວງໆຈຳປາສັກ ເລກທີ 700/ຈຂ.ຈສ, ລົງວັນທີ 13 ມິຖຸນາ 2023 ວ່າດ້ວຍການແຕ່ງຕັ້ງຄະນະກຳມະການສະເພາະກິດຄຸ້ມຄອງການເຄື່ອນໄຫວຂອງສະຖານບັນເທີງ ແລະ ອີງຕາມ ບົດບັນທຶກກອງປະຊຸມຮ່ວມກັບຄະນະກຳມະການຄຸ້ມຄອງການເຄື່ອນໄຫວທຸລະກິດບັນເທີງແຂວງ ແລະ ນະຄອນປາກເຊ ຄັ້ງວັນທີ 26 ສິງຫາ 2025.

ພ້ອມນັ້ນ, ຄະນະກຳມະການສະເພາະກິດດັ່ງກ່າວ ຍັງໄດ້ເຄື່ອນໄຫວຕິດຕາມກວດກາ ແລະ ອອກແຈ້ງການເຖິງບັນດາຮ້ານບັນເທີງທີ່ໄດ້ຮັບອະນຸຍາດຢ່າງຖືກຕ້ອງ ໃຫ້ເພີ່ມຄວາມເອົາໃຈໃສ່ໃນການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປະຕິບັດໂມງເວລາ ເປິດ-ປິດ (ປິດບໍ່ໃຫ້ກາຍ 12:00 ໂມງທ່ຽງຄືນ) ຕາມລະບຽບການທີ່ໄດ້ກຳນົດໄວ້ຢ່າງເຂັ້ມງວດ, ຫາກຝ່າຝຶນແມ່ນໃຫ້ປະຕິບັດມາດຕະການເຊັ່ນດຽວກັນ.

ທີ່ມາ: ຈໍາປາໃໝ່