ໄລຍະຜ່ານມານີ້, ມີບັນດາກຸ່ມບໍລິສັດເອກະຊົນ, ບຸກຄົນ, ແລະ ນິຕິບຸກຄົນຈຳນວນໜຶ່ງໄດ້ເຄື່ອນໄຫວໂຄສະນາຜ່ານທາງ ເຟສບຸກ(facebook)ຂອງກຸ່ມບໍລິສັດທີ່ປຶກສາດ້ານການສຶກສາຮຽນຕໍ່ຢູ່ຕ່າງປະເທດດ້ວຍຖ້ອຍທຳນອງຕ່າງໆນານາໃຫ້ຫຼົງເຊື່ອວ່າເປັນທຶນຂອງລັດຖະບານປະເທດນັ້ນໆໂດຍສະເພາະ ລັດຖະບານ ສປ ຈີນ ແລະ ສສ ວຽດນາມ ເຮັດໃຫ້ປະຊາເກີດຄວາມເຂົ້າໃຈຜິດຕໍ່ແນວທາງນະໂຍບາຍຂອງພັກ-ລັດ ກໍຄືກະຊວງສຶກສາທິການ ແລະ ກິລາ.

ເພື່ອຄວາມເຂົ້າໃຈທີ່ຖືກຕ້ອງ, ຫ້ອງການກະຊວງສສຶກສາທິການ ແລະ ກິລາໄດ້ອອກແຈ້ງການສະບັບເລກທີ 2239/ຫກ ລົງວັນທີ 19 ພຶດສະພາ 2023ນີ້ ເຖິງບັນດາຜູ້ປົກຄອງນັກຮຽນ-ນັກສຶກສາແລະປະຊາຊົນທົ່ວປະເທດເລື່ອງ: ການໂຄສະນາທຶນການສຶກສາຂອງບັນດາບໍລິສັດ, ບຸກຄົນ, ນິຕິບຸກຄົນທີ່ບໍ່ເປັນທາງການ. ຊຶ່ງເນື້ອໃນຂອງແຈ້ງການເນັ້ນວ່າ: ຫ້ອງການກະຊວງສຶກສາທິການແລະກິລາແຈ້ງມາຍັງນັກຮຽນ-ນັກສຶກສາ, ພໍ່ແມ່ປະຊາຊົນຊາບວ່າ: ປັດຈຸບັນສັງເກດເຫັນວ່າມີບັນດາກຸ່ມບໍລິສັດເອກະຊົນ, ບຸກຄົນ ແລະ ນິຕິບຸກຄົນ ທີ່ບໍ່ຫວັງດີໄດ້ເຄື່ອນໄຫວໂດຍສະເພາະການໂຄສະນາ

ຜ່ານທາງເຟສບຸກ(facebook)ຂອງກຸ່ມບໍລິສັດທີ່ປຶກສາດ້ານການສຶກສາຮຽນຕໍ່ຕ່າງປະເທດ, ເຮັດໃຫ້ພໍ່ແມ່ປະຊາຊົນເກີດຄວາມເຂົ້າໃຈຜິດຕໍ່ແນວທາງນະໂຍບາຍຂອງພັກ-ລັດ ກໍຄືກະຊວງສຶກສາທິການແລະກິລາ ກ່ຽວກັບການໂຄສະນາລະດົມຂົນຂວາຍເອົານັກສຶກສາລາວໄປຮຽນຕໍ່ຢູ່ຕ່າງປະເທດຄື: ປະເທດ ສປ ຈີນ ແລະ ສສ ວຽດນາມ ໂດຍແອບອ້າງວ່າເປັນທຶນຂອງລັດຖະບານຈີນ CSC ແລະລັດຖະບານ ວຽດານາມ ຕໍ່ສະພາບການດັ່ງກ່າວນີ້ ຈຶ່ງແຈ້ງເຕືອນມາຍັງ ນັກຮຽນນັກສຶກສາ ແລະ ພໍ່ແມ່ປະຊາຊົນໃຫ້ມີສະຕິລະວັງຕົວ ບໍ່ໃຫ້ຫຼົງເຊື່ອຕໍ່ການໂຄສະນາຈາກກຸ່ມຄົນດັ່ງກ່າວຢ່າງ

ເດັດຂາດ ເພາະວ່າບໍລິສັດທີ່ປຶກສາດ້ານການສຶກສາຮຽນຕໍ່ຕ່າງປະເທດທຸກໆບໍລິສັດແມ່ນກະຊວງສຶກສາທິການແລະກິລາ ບໍ່ໄດ້ອອກໜັງສືໃຫ້ດຳເນີນທຸລະກິດໃນດ້າານການສຶກສາແຕ່ຢ່າງໃດກໍລະນີຫາກພົບເຫັນກນໂຄສະນາ ຫຼື ມີບັນຫາບໍ່ເຂົ້າໃຈໃນການໄປຮຽນຕໍ່ຢູ່ຕ່າງປະເທດຂໍໃຫ້ປະສານແລະຕິດຕໍ່ໄປຍັງກົມກິດຈະການນັກສຶກສາ ກະຊວງສຶກສາທິການແລະກິລາໂດຍດ່ວຍ ຊຶ່ງກົມກິດຈະການນັກສຶກສາພ້ອມໃຫ້ຄວາມຮ່ວມມື ແລະ ໃຫ້ຄວາມກະຈ່າງແຈ້ງໃຫ້ທ່ານໄດ້.

ຕ້ອງຍອມຮັບວ່າ ປະຈຸບັນນີ້ສັງຄົມໂລກອອນລ່າຍພວມກ້າວໄກເຂົ້າໄປເຖິງທຸກທີ່ທຸກບ່ອນ ທັງໃນຕົວເມືອງແລະຊົນນະບົດ ເຮັດໃຫ້ສັງຄົມຮັບຮູ້ເຂົ້າໃຈຂໍ້ມູນຂ່າວສານວ່ອງໄວຂຶ້ນ ລວມທັງຂໍ້ມູນຂ່າວສານທີ່ມີຄວາມຈິງ ແລະ ຂ່າວປອມ ສັບປົນຄົນເລກັນໄປມາ ຖ້າຜູ້ບໍລິໂພກສື່ບໍ່ຄົ້ນຄິດພິຈາລະນາຢ່າງອະອຽດຖິ່ຖ້ວນວ່າ ອັນໃດແທ້, ອັນໃດປອມສຸດທ້າຍກໍ່ຕົກເປັນເຫຍື່ອຂອງພວກມິດສາຊີບໄດ້ໂດຍງ່າຍພາໃຫ້ສູນເສຍວັດຖຸເງິນຄຳຂອງມີຄ່າມາແລ້ວຫຼາຍໆຄົນ, ການຍັກຍອກສໍ້ໂກງນີ້ມັນມີຫຼາຍຮູບແບບ,ຫຼາຍວິທີການແລະເກີດຂຶ້ນໃນຫຼາຍຂົງເຂດ ລວມທັງຂົງເຂດການສຶກສາ.

ດັ່ງນັ້ນກ່ອນຈະຕັດສິນໃຈໄປສຶກສາຮໍ່າຮຽນຢູ່ຕ່າງປະເທດ ໂດຍສະເພາະ ແມ່ນ ສປ ຈີນ ຫຼື ສສ ຫວຽດນາມໂດຍຜ່ານການລະດົມຈາກພາກສ່ວນບັນດາບໍລິສັດເອກະຊົນ, ບຸກຄົນ ແລະນິຕິບຸກຄົນ ທີ່ເວົ້າວ່າເປັນທຶນການສຶກສາຂອງລັດຖະບານປະເທດນັ້ນໆຜ່ານທາງສື່ສັງຄົມອອນລາຍ ພໍ່ແມ່ຜູ່ປົກຄອງ ກໍຄືນັກຮຽນນັກສຶກສາເອງຕ້ອງໄດ້ສຶກສາຄົ້ນ ຄ້ວາໃຫ້ລະອຽດຖີ່ຖ້ວນເສຍກ່ອນ ວ່າມີມູນຄວາມຈິງຫຼືບໍ ເພື່ອບໍ່ໃຫ້ຕົກເປັນເຫຍື່ອຂອງພວກມິດສາຊີບ ແລ້ວຈຶ່ງຈະບໍ່ເສຍໃຈຕາມພາຍຫຼັງ.

ສະແດງຄຳຄິດເຫັນ