ໃນໂອກາດກະກຽມແກ່ການດຳເນີນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຈຳປາສັກ. ໃນວັນທີ 6 ກັນຍາຜ່ານາມາ, ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ, ປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ແຂວງຈຳປາສັກ ພ້ອມດ້ວຍການນຳຂອງແຂວງ ແລະ ເມືອງໂພນທອງ ໄດ້ເຄື່ອນໄຫວຢ້ຽມຢາມອ້າຍນ້ອງກຳລັງທະຫານ ປະຈຳການ ທີ່ປ້ອມຈຸດກວດກາ, ກອງຮ້ອຍທະຫານຊາຍແດນ 522 ແລະ ພົບປະພໍ່ແມ່ປະຊາຊົນ ບ້ານຄັນຍາງ ເມືອງໂພນທອງ ແຂວງຈໍາປາສັກ ແລະ ໄດ້ມອບເຄື່ອງອຸປະໂພກ-ບໍລິໂພກ, ອຸປະກອນການຫຼິ້ນກິລາ, ດົນຕຼິພື້ນເມືອງອີກຈຳນວນໜຶ່ງ ລວມມູນຄ່າ 131 ລ້ານກວ່າກີບ ໃຫ້ອ້າຍນ້ອງກຳລັງທະຫານ ແລະ ປະຊາຊົນ ເຂດດັ່ງກ່າວ.

ການລົງເຄື່ອນໄຫວຄັ້ງນີ້, ແມ່ນເປັນການລົງຕິດຕາມກວດກາ, ໃກ້ຊິດຕິດແທດ ກັບອ້າຍນ້ອງກຳລັງທະຫານ ທີ່ປະຈຳການເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ, ຕິດຕາມສະພາບ ແລະ ຮັບຮູ້ເຖິງການດຳລົງຊີວິດ, ຈຸດພິເສດ ໃນເຂດດັ່ງກ່າວ, ພ້ອມນັ້ນ ທ່ານປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ແຂວງ ໄດ້ເນັ້ນໃຫ້ທຸກຄົນຈົ່ງເພີ່ມທະວີປະຕິບັດໜ້າທີ່ຂອງຕົນ, ຮັກສາຄວາມສາມັກຄີພາຍໃນ, ສ້າງຄວາມຮ່ວມມືອັນແໜ້ນແຟ້ນກັບປະຊາຊົນທ້ອງຖິ່ນ ເພື່ອຮ່ວມກັນປົກປ້ອງຄວາມສະຫງົບ ແລະ ຄວາມໝັ້ນຄົງໃນເຂດຊາຍແດນ ປະຕິບັດໜ້າທີ່ດ້ວຍຄວາມສຳເລັດ ເພື່ອຮັບປະກັນ ໃຫ້ການດຳເນີນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຈຳປາສັກ ໃຫ້ມີຄວາມສະຫງົບ ຮ້ອຍສ່ວນຮ້ອຍ.

ຈາກນັ້ນ, ກໍໄດ້ພົບປະ ພໍ່ແມ່ປະຊາຊົນບ້ານຄັນຍາງ ເມືອງໂພນທອງ, ຊຶ່ງຈຸດພິເສດບ້ານດັ່ງກ່າວ ເປັນບ້ານທີ່ບໍ່ມີເສັ້ນທາງເຊື່ອມຈອດ ກັບບ້ານໃກ້ຄຽງ, ພາຍໃນບ້ານມີ 110 ຫຼັງຄາເຮືອນ, ມີ100 ຄອບຄົວ, ມີ 499 ຄົນ; ລະດູຝົນແມ່ນໃຊ້ເຮືອເປັນພາຫະນະຕົ້ນຕໍໃນການເດິນທາງໄປມາ, ອາຊີບຕົ້ນຕໍຂອງປະຊາຊົນແມ່ນ ເຮັດນາປູກເຂົ້າ, ຫັດຖະກຳຈັກສານ, ລ້ຽງສັດ-ການປະມົງ, ຊື້ຂາຍ ແລະ ບໍລິການຂົນສົ່ງ.

(ຂ່າວ: ທັດຊະນະ)

ສະແດງຄຳຄິດເຫັນ