ໃນຕອນບ່າຍວັນທີ 12 ກັນຍາ 2025 ທີ່ໂຮງແຮມເມືອງແທ່ງ, ນະຄອນຫຼວງວຽງຈັນ ເປັນກຽດເຂົ້າຮ່ວມໂດຍທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ, ທ່ານ ນາງ ວຽງສະໄໝ ສິດທິລາດ ຮັກສາການຫົວໜ້າຫ້ອງການ ທະນາຄານໂລກ ປະຈໍາລາວ ມີຫົວໜ້າກົມ-ຮອງກົມ, ຜູ້ຕາງໜ້າຈາກອົງການຈັດຕັ້ງສາກົນປະຈໍາລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດນີ້ ທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ ໄດ້ມີຄໍາເຫັນວ່າ: ການເປີດງານ ຊຸກຍູ້ ແລະ ສົ່ງເສີມການທ່ອງທ່ຽວໃນເຂດປ່າໄມ້ ຖືເປັນຂີດໝາຍສໍາຄັນ ແລະ ສັນຍາລັກແຫ່ງການເສີມຂະຫຍາຍໃນຖານະທີ່ລາວແມ່ນຈຸດໝາຍປາຍທາງຂອງພາກພື້ນ ແລະ ສາກົນ ທີ່ກໍາລັງໄດ້ຮັບຄວາມນິຍົມໃນການທ່ອງທ່ຽວ ທາງນິເວດວິທະຍາການທ່ອງທ່ຽວພະຈົນໄພ ແລະ ການທ່ອງທ່ຽວວັດທະນະທໍາ ທີ່ມີທ່າແຮງເປັນແຫຼ່ງລາຍຮັບ ທາງດ້ານເສດຖະກິດ ໂດຍສະເພາະການທ່ອງທ່ຽວໃນເຂດປ່າໄມ້ ຊຶ່ງເປັນການຊຸກຍູ້ ການເຕີບໂຕຂອງເສດຖະກິດແບບຍືນຍົງ ການສ້າງວຽກເຮັດງານທໍາ ໃນທ້ອງຖິ່ນ ແລະ ການສະໜອງທຶນການອະນຸລັກແບບຍືນຍົງ.

ການສົ່ງການທ່ອງທ່ຽວໃນເຂດປ່າໄມ້ ໃຫ້ມີການເຕີບໂຕຢ່າງແຂງແຮງ. ສະນັ້ນ, ກະຊວງກະສິກໍາ ແລະ ສິ່ງແວດລ້ອມໄດ້ພັດທະນານິຕິກໍາ ແລະ ຄູ່ມືທີ່ສໍາຄັນ ທີ່ຕິດພັນກັບການສົ່ງເສີມ ການທ່ອງທ່ຽວໃນເຂດປ່າໄມ້ເປັນຕົ້ນ: ຂໍ້ຕົກລົງວ່າດ້ວຍການທ່ອງທ່ຽວປ່າໄມ້, ຄູ່ມືຊວນເຊີນການລົງທຶນ ການທ່ອງທ່ຽວໃນເຂດປ່າໄມ້ 8 ເຂດ ຂອງໂຄງການ, ຄູ່ມືການຄຸ້ມຄອງທຶນພັດທະນາ ແລະ ສົ່ງເສີມທຸລະກິດທ່ອງທ່ຽວ ຈຸລະພາກຂະໜາດນ້ອຍ ແລະ ກາງ ບັນດານິຕິກໍາດັ່ງກ່າວຈະເປັນເຄື່ອງມືທີ່ສໍາຄັນ ເພື່ອອໍານວຍຄວາມສະດວກໃຫ້ແກ່ການພັດທະນາວຽກງານການທ່ອງທ່ຽວໃນເຂດປ່າໄມ້ ໃຫ້ມີຄວາມເຂັ້ມແຂງ, ມີປະສິດທິພາບ ເຮັດໃຫ້ສັງຄົມຮັບຮູ້ ແລະ ເຂົ້າໃຈ ທັງເປັນການດຶງດູດ ແລະ ລະດົມບຸກຄົນ, ນິຕິບຸກຄົນ ແລະ ການຈັດຕັ້ງທີ່ມີຄວາມສົນໃຈ ເພື່ອລົງທຶນການທ່ອງທ່ຽວໃນເຂດປ່າໄມ້ໃນລາວ ໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ.

ຂ່າວ: ວສລ

ສະແດງຄຳຄິດເຫັນ