ຊາຍໜຸ່ມຊື່ທ້າວ ພອນທິບ ອາຍຸ 32 ປີ ອາຊີບ ເຮັດນາ ຢູ່ບ້ານ ບໍ່ທືນ ເມືອງ ປາກກະດິງແຂວງບໍລິຄໍາໄຊໄດ້ໃຊ້ມີດແທງແຟນສາວຊື່ ນາງ ແຕ໋ວ ອາຍຸ 31 ປີ ຢູ່ບ້ານ ສອງຄອນ ເມືອງ ປາກຊັນ ແຂວງ ບໍລິຄຳໄຊ ເສຍຊີວິດຄາທີ່ຍ້ອນຜິດຖຽງກັນ ແລະ ນໍາສົບໄປຝັງດິນອໍາພາງຄະດີ ຊຶ່ງເຫດການດັ່ງກ່າວເກີດຂຶ້ນ ໃນວັນທີ 8 ສິງຫາ 2025 ທີ່ຜ່ານມາ ຢູ່ບໍລິເວນບ້ານສົມສະນຸກ ເມືອງປາກກະດິງ.

ວັນທີ 11 ກັນຍາ 2025 ທີ່ຜ່ານມາ, ເຈົ້າໜ້າທີ່ວິຊາສະເພາະ ປກສ ແຂວງບໍລິຄຳໄຊ ໄດ້ນຳຕົວທ້າວ ພອນທິບ ມາທົດສະກຳທົດສອບຂໍ້ມູນຄືນໃໝ່ ເປັນການພິສູດ, ທົດສອບວິເຄາະຂໍ້ມູນ ໃຫ້ມີຄວາມຖືກຕ້ອງຄົບຖ້ວນ, ລະອຽດຈະແຈ້ງພາວະວິໄສ.

ທ້າວ ພອນທິບໄດ້ສາລະພາບຕໍ່ເຈົ້າໜ້າທີ່ວ່າ: ຕົນ ແລະ ນາງ ແຕ໋ວ ແມ່ນຮູ້ຈັກກັນໃນປີ 2024 ແລະ ມີການພົວພັນສົນທະນາຜ່ານເຟສບຸກ ແລະ ພົບພໍ້ກັນ, ໃນມື້ເກີດເຫດເວລາປະມານ 22 ໂມງ ຂອງວັນທີ 8 ສິງຫາ 2025 ທ້າວ ພອນທິບ ໄດ້ຂີ່ລົດຈັກໄປຮັບ ນາງ ແຕ໋ວ ຢູ່ ບ້ານ ສອງຄອນ, ແລ້ວຂີ່ລົດຈັກມຸ້ງໜ້າອອກໄປ ທາງເຮືອນ ທ້າວ ພອນທີບ ທີ່ບ້ານ ບໍ່ທືນ ເມືອງ ປາກກະດິງ, ໃນລະຫວ່າງທາງທັງສອງໄດ້ຜິດຖຽງກັນເຮັດໃຫ້ຜູ້ກໍ່ເຫດ ເກີດຄວາມໂມໂຫ ແລະ ມີແນວຄິດຄາດຕະກຳເກີດຂື້ນ.

ທ້າວ ພອນທິບສາລະພາບຕື່ມອີກວ່າ: ເປັນຄົນລົງມືກໍ່ເຫດຄາດຕະກຳ ນາງ ແຕ໋ວ ແທ້, ໂດຍການໃຊ້ມີດປາຍແຫຼມ ຍາວປະມານ 40 ຊັງຕີແມັດ ທີ່ກະກຽມມາແຕ່ເຮືອນ ຕົວະຍົວະຜູ້ເສຍຊີວິດໄປຮອດສະຖານທີ່ດັ່ງກ່າວແລ້ວໃຊ້ມີດແທງເຂົ້າໃສ່ໜ້າເອີກ 2-3 ບາດຈົນເຮັດໃຫ້ເສຍຊີວິດ, ຈາກນັ້ນກໍໄດ້ເອົາເຄື່ອງຕິດຕົວ, ຊັບສີນໄປຖິ້ມ ເພື່ອທຳລາຍ ຫຼັກຖານ ໂດຍຖິ້ມມີດ ລົງນໍ້າກະດິງ ຢູ່ທາງໂຄ້ງເລກທີ 13 ໃຕ້ ເມືອງ ປາກກະດິງ, ຖິ້ມໂທລະສັບ, ເສື້ອແຂນຍາວ, ກະເປົ໋າເງິນ ແລະ ກະຕ່າລົດຈັກຢູ່ ແຄມທາງເລກທີ 13 ໃຕ້ ບໍລິເວນ ບ້ານ ໂພນຈະເລີນ, ຖິ້ມໝວກກັນນ໋ອກ ຢູ່ເຮືອນພັກ (ບໍລິເວນ ບ້ານ ໂພນຈະເລີນ), ຖິ້ມສາຍແຂນຜູ້ເສຍຊີວິດ ລົງນ້ຳກະດິງ ແລະ ນຳເຄື່ອງນຸ່ງໃນຕອນກໍ່ເຫດໄປເຜົາເພື່ອທຳລາຍຫຼັກຖານ.

ແຫຼ່ງຂໍ້ມູນຂ່າວ: ປກສ ແຂວງບໍລິຄຳໄຊ

ສະແດງຄຳຄິດເຫັນ