ກະຊວງເຕັກໂນໂລຊີ ແລະ ການສື່ສານ ຮ່ວມກັບ ບໍລິສັດ ບິດຄິກ ຈຳກັດຜູ້ດຽວ ຈະຈັດງານມະຫະກຳເຕັກໂນໂລຊີ ກຸ່ມຂໍ້ມູນຜູກພັນ2025 (Laos Blockchain Fest 2025) ໃນລະຫວ່າງວັນທີ 21-22 ພະຈິກ 2025 ຢູ່ຫໍປະຊຸມແຫ່ງຊາດ ນະຄອນຫຼວງວຽງຈັນ, ພາຍໃຕ້ຄຳຂວັນ “ສ້າງອະນາຄົດທີ່ຍືນຍົງ ດ້ວຍເຕັກໂນໂລຊີ Building Resilient Future-Chain”.

ງານ Laos Blockchain Fest 2025 ດັ່ງກ່າວນີ້ ຈະເປັນພື້ນທີ່ວາງສະແດງນະວັດຕະກຳຍຸກໃໝ່, ແລກປ່ຽນຄວາມຮູ້, ເວທີປຶກສາຫາລື, ເພີ່ມໂອກາດທາງທຸລະກິດ ເຊິ່ງຈະເປີດກວ້າງຕ້ອນຮັບນັກລົງທຶນ, ນັກພັດ ທະນາດ້ານເຕັກໂນໂລຊີ, ພາກລັດຖະບານ, ພາກທຸລະກິດ ແລະ ຜູ້ສົນໃຈ ຈາກທັງພາຍໃນ ແລະ ຕ່າງປະເທດ ເພື່ອການຫັນເປັນເສດຖະກິດດີຈິຕອນແບບຍືນຍົງ.

ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງ ເຕັກໂນໂລຊີ ແລະ ການສື່ສານ ໄດ້ຖະແຫຼງຂ່າວງານຄັ້ງນີ້ ເມື່ອບໍ່ດົນມານີ້ ທີ່ນະຄອນຫຼວງວຽງຈັນ: ງານ Laos Blockchain Fest 2025 ນີ້ ເປັນງານໜຶ່ງທີ່ສຳຄັນ ເພື່ອປະກອບສ່ວນການຫັນເປັນ ເສດຖະກິດດີຈິຕອນຂອງ ສປປ ລາວ, ທັງຊຸກຍູ້ສົ່ງເສີມການນຳໃຊ້ເຕັກໂນໂລຊີດີຈິຕອນ ໃນທົ່ວສັງຄົມ ໂດຍເນັ້ນໃສ່ການສົ່ງເສີມການນຳໃຊ້ ເຕັກໂນໂລຊີກຸ່ມຂໍ້ມູນຜູກພັນ ເພື່ອຍົກລະດັບເວທີດີຈິຕອນ ແລະ ສົ່ງເສີມການສ້າງພື້ນຖານໂຄງລ່າງ ໃນ ສປປ ລາວ.

ພາຍໃນງານນີ້ ຈະໄດ້ຮັບຊົມການວາງສະແດງ, ໄດ້ຮັບຄວາມຮູ້ຈາກຜູ້ຊ່ຽວຊານ ແລະ ສ້າງຄວາມຕື່ນຕົວກ່ຽວກັບ Blockchain ແລະ ເຕັກໂນໂລຊີຍຸກໃໝ່ຫຼາຍຫົວຂໍ້ເຊັ່ນ: Blockchain, ການເງິນ-ການລົງທຶນ, AI, ທຸລະກິດ Tech Start-Up, Cyber Security, Web 3.0, ຊັບສິນດີຈິຕອນ ແລະ ຍັງເປັນເວທີໃນການແລກປ່ຽນ ປຶກສາຫາລື ລະຫວ່າງ ພາກລັດ ແລະ ພາກເອກະຊົນ, ພ້ອມນັ້ນ ຍັງຈະມີການສຳມະນາວິຊາການໃນການເປີດໂອກາດໃຫ້ສະຕາດອັບ ທຸລະກິດລະດັບພາກພື້ນທັງພາຍໃນ ແລະ ຕ່າງປະເທດໃນການສ້າງສັກກະຍະພາບ ຂອງ ສປປ ລາວໃຫ້ມີຄວາມພ້ອມໃນການເປັນສູນກາງດ້ານເຕັກໂນໂລຊີ Blockchain ແລະ ການເງິນໃນອະນາຄົດ.

ທີ່ມາ: vientiane time

ສະແດງຄຳຄິດເຫັນ