ພິທີມອບ-ຮັບເຂົ້າສານ ຈຳນວນ 1,050 ໂຕນ ຈາກຄັງແຮເຂົ້າສຸກເສີນອາຊຽນ+3 ປະຈຳປີ 2024 ແຜນປະຕິບັດປີ 2025, ໂດຍໄດ້ຮັບການປະກອບສ່ວນຈາກປະເທດ ສ ເກົາຫຼີ, ສປ ຈີນ ແລະ ປະເທດຍີ່ປຸ່ນ ເພື່ອຊ່ວຍເຫຼືອຜູ້ປະສົບໄພພິບັດ ຢູ່ ສປປ ລາວ ໄດ້ຈັດຂຶ້ນໃນວັນທີ 16 ກັນຍານີ້ ທີ່ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ໂພໄຊ ໄຊຍະສອນ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ມີຕາງໜ້າສະຖານທູດ ສ ເກົາຫຼີ ປະຈໍາ ສປປ ລາວ, ສະຖານທູດຍີ່ປຸ່ນ ປະຈໍາ ລາວ ແລະ ມີຕາງໜ້າສະຖານທູດ ສປ ຈີນ ປະຈໍາ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ໂພໄຊ ໄຊຍະສອນ ກ່າວວ່າ: ກະຊວງ ຮສສ ໃນນາມເປັນຜູ້ຈັດຕັ້ງປະຕິບັດແຈກຢາຍເຂົ້າສານຈາກຄັງແຮເຂົ້າສຸກເສີນອາຊຽນ+3 ເພື່ອແຈກຢາຍໃຫ້ແກ່ຜູ້ປະສົບໄພພິບັດ ຢູ່ ສປປ ລາວ ທີ່ໄດ້ຮັບຈາກລັດຖະບານ ກໍຄືປະຊາຊົນຂອງປະເທດ ສ ເກົາຫຼີ, ສປ ຈີນ ແລະ ຍີ່ປຸ່ນ ໃຫ້ການສະໜັບສະໜູນຊ່ວຍເຫຼືອຜ່ານໂຄງການຄັງແຮເຂົ້າສຸກເສີນອາຊຽນ+3 ປະຈໍາປີ 2024 ທີ່ ສປປ ລາວ ເປັນເຈົ້າພາບຄຸ້ມຄອງຮັກສາເຂົ້າຈໍານວນທັງໝົດ 3,800 ໂຕນ, ຈາກລັດຖະບານ ສ ເກົາຫຼີ ຈຳນວນ 3,000 ໂຕນ, ສປ ຈີນ 500 ໂຕນ ແລະ ຍີ່ປຸ່ນ 300 ໂຕນ. ໂຄງການຄັງແຮເຂົ້າສຸກເສີນອາຊຽນ+3, ເປັນໂຄງການໜຶ່ງທີ່ມີຄວາມສໍາຄັນຫຼາຍທີ່ສຸດຕໍ່ກັບບັນດາປະເທດສະມາຊິກອາຊຽນ ທີ່ໄດ້ນໍາໃຊ້ເຂົ້າສານດັ່ງກ່າວເພື່ອຮັບມືກັບໄພພິບັດສຸກເສີນລວມໄປເຖິງການແກ້ໄຂຊີວິດການເປັນຢູ່ຂອງຜູ້ດ້ອຍໂອກາດທີ່ທຸກຍາກໃຫ້ໄດ້ຮັບການພັດທະນາຊີວິດການເປັນຢູ່ດີຂຶ້ນ.

ທ່ານ ໂພໄຊ ໄຊຍະສອນ ໄດ້ກ່າວຕື່ມວ່າ: ໃນໄລຍະເດືອນກໍລະກົດ – ເດືອນສິງຫາ 2025 ສປປ ລາວ ກໍເປັນປະເທດໜຶ່ງ ທີ່ໄດ້ຜົນກະທົບຈາກພາຍຸໃຕ້ຝຸ່ນວຸດທິບ ແລະ ວິພາ ຊຶ່ງເຮັດໃຫ້ບັນດາແຂວງພາກເໜືອ, ພາກກາງ ແລະ ພາກໃຕ້ ຂອງ ສປປ ລາວ ໄດ້ຜົນກະທົບໜັກທາງດ້ານພື້ນຖານໂຄ່ງລ່າງຄົມມະນາຄົມ, ເນື້ອທີ່ທຳການຜະລິດ, ໂຮງຮຽນ, ເຮືອນຊານ, ຊັບສິນ ແລະ ຊີວິດການເປັນຢູ່ຂອງປະຊາຊົນ. ອີງຕາມການປະເມີນຂອງຄະນະກຳມະການຄຸ້ມຄອງໄພພິບັດຮ່ວມກັບເຄືອຂ່າຍອົງການຊ່ວຍເຫຼືອດ້ານມະນຸດ IASC, ຄາດຄະເນຄວາມຕ້ອງການຟື້ນຟູສຸກເສີນ ແລະ ໄລຍະຍາວປະມານທັງໝົດ 1,012 ກວ່າຕື້ກີບ, ສໍາລັບການຕອບໂຕ້ສຸກເສີນ ລັດຖະບານ ສປປ ລາວ ໄດ້ຮັບການສະໜັບສະໜູນການຊ່ວຍເຫຼືອຈາກພາກສ່ວນຕ່າງໆ ທັງພາຍໃນ ແລະ ຕ່າງປະເທດ ເວົ້າລວມ, ເວົ້າສະເພາະ ດ້ານເຂົ້າສານ ໄດ້ຮັບການອະນຸມັດຈາກໂຄງການຄັງແຮເຂົ້າສຸກເສີນອາຊຽນ+3 (APTEER) ຈໍານວນ 1,050 ໂຕນ, ໂດຍໄດ້ເລີ່ມຈັດສົ່ງໄປຊ່ວຍເຫຼືອໃຫ້ແກ່ປະຊາຊົນທີ່ປະສົບໄພພິບັດນໍ້າຖ້ວມ ຢູ່ 12 ແຂວງຄື: ຜົ້ງສາລີ, ບໍ່ແກ້ວ, ຫຼວງພະບາງ, ໄຊຍະບູລີ, ຊຽງຂວາງ, ຫົວພັນ, ວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ ແລະ ແຂວງສາລະວັນ. ສໍາລັບການຟື້ນຟູ ກະຊວງ ຮສສ ແລະ ກະຊວງກະສິກໍາ ແລະ ສິ່ງແວດລ້ອມ ຈະໄດ້ສືບຕໍ່ສະເໜີຂໍນໍາໃຊ້ເຂົ້າທີ່ຍັງເຫຼືອ 2,750 ໂຕນ, ຊຶ່ງເຂົ້າຊ່ວຍເຫຼືອທັງໝົດນີ້ ຈະສາມາດຕອບສະໜອງໃຫ້ຜູ້ປະສົບໄພພິບັດ ແລະ ຜູ້ດ້ອຍໂອກາດທີ່ທຸກຍາກ ປະມານ 316,667 ກວ່າຄົນ.

ກະຊວງ ຮສສ ໃຫ້ຄໍາໝັ້ນສັນຍາວ່າ: ຈະສົມທົບກັບຄະນະຮັບຜິດຊອບໂຄງການນຳເຂົ້າຊ່ວຍເຫຼືອດັ່ງກ່າວໄປແຈກຢາຍໃຫ້ຜູ້ປະສົບໄພພິບັດລວມທັງຜູ້ທີ່ທຸກຍາກດ້ອຍໂອກາດທີ່ບໍ່ສາມາດເຂົ້າເຖິງການຄໍ້າປະກັນສະບຽງອາຫານ ໃຫ້ຮັບການຊ່ວຍເຫຼືອຢ່າງມີປະສິດທິພາບ, ພ້ອມທັງເຜີຍແຜ່ຊຸກຍູ້ໃຫ້ເຂົາເຈົ້າ ເຫັນໄດ້ຄວາມເປັນຫວ່ງເປັນໃຍຂອງລັດຖະບານ ແລະ ປະຊາຊົນຂອງ ສ ເກົາຫຼີ, ສປ ຈີນ ແລະ ຍີ່ປຸ່ນ ທີ່ຍາມໃດກໍໄດ້ໃຫ້ຄວາມເປັນຫວ່ງເປັນໃຍຕໍ່ປະຊາຊົນລາວ ຊຶ່ງການຊ່ວຍເຫຼືອເຫຼົ່ານີ້ ສະແດງໃຫ້ເຖິງຄວາມສາມັກຄີຂອງປະຊາຊົນ ສ ເກົາຫຼີ, ສປ ຈີນ ແລະ ຍີ່ປຸ່ນ ທີ່ໄດ້ແບ່ງເບົາຄວາມຫຍຸ້ງຍາກລໍາບາກຂອງປະຊາຊົນລາວມາຕະຫຼອດ.

ສະນັ້ນ, ຕາງໜ້າໃຫ້ລັດຖະບານ ສປປ ລາວ ກໍຄືປະຊາຊົນລາວ ຂໍສະແດງຄວາມຮູ້ບຸນຄຸນ ມາຍັງ 3 ປະເທດທີ່ໃຫ້ການຊ່ວຍເຫຼືອເຂົ້າສານແກ່ລັດຖະບານ ສປປ ລາວ. ສະແດງຄວາມຂອບໃຈເປັນຢ່າງສຸງ ຕໍ່ຄະນະຮັບຜິດຊອບໂຄງການຄັງແຮເຂົ້າ, ກອງເລຂາຄັງແຮເຂົ້າ (APTEER) ແລະ ອົງການອາຫານໂລກ ທີ່ຍາມໃດກໍໄດ້ໃຫ້ການຮ່ວມມືຊ່ວຍເຫຼືອດ້ານຕ່າງໆແກ່ກະຊວງ ຮສສ ເຮັດໃຫ້ໂຄງການຄັງແຮເຂົ້າສານດຳເນີນໄປຢ່າງຖືກຕ້ອງ ແລະ ມີປະໂຫຍດສູງສຸດຕໍ່ກັບ ສປປ ລາວ.

(ຂ່າວ-ພາບ: ບຸນອູ້ມ + ບູນຕອມ)

ສະແດງຄຳຄິດເຫັນ