ທ່ານ ບຸນທອງ ຈິດມະນີ ຮອງປະທານປະເທດ ແຫ່ງ ສປປ ລາວ, ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ ພ້ອມດ້ວຍບັນດາທ່ານລັດຖະມົນຕີ, ຮອງລັດຖະມົນຕີ, ຮອງເຈົ້າແຂວງ, ຄະນະຜູ້ແທນຈາກກະຊວງກ່ຽວຂ້ອງ ແລະ ທ້ອງຖິ່ນ ຊຶ່ງມີການນໍາຂັ້ນສູງ, ຄະນະຜູ້ແທນຈາກ ສປ ຈີນ ໄດ້ເຂົ້າຮ່ວມພິທີເປີດຫ້ອງວາງສະແດງເມືອງແຫ່ງສະເໜ່ ຂອງ ສປປ ລາວ ຂຶ້ນຢ່າງເປັນທາງການໃນວັນທີ 16 ກັນຍາ ນີ້ ໃນງານມະຫະກໍາວາງສະແດງ ຈີນ-ອາຊຽນ ຄັ້ງທີ 22 (CAEXPO 2025) ທີ່ນະຄອນໜານໜິ່ງ ເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ.

ພາຍໃນງານປະທານຄະນະປະທານໄດ້ຮ່ວມຕັດລິບບິນ ຊຶ່ງເປັນສັນຍາລັກໃນການເປີດຫ້ອງວາງສະແດງເມືອງແຫ່ງສະເໜ່ ຂອງ ສປປ ລາວ ກໍຄືພາບຈໍາລອງທ່າແຮງ ທີ່ອອກແບບສະທ້ອນໃຫ້ເຫັນເຖິງເອກະລັກສະເພາະ ແລະ ຈຸດແຂງຂອງແຂວງຫຼວງນໍ້າທາໄດ້ຢ່າງຈະແຈ້ງ ແລະ ຊັດເຈນ ຮ່ວມຊົມການສະແດງສິລະປະຂອງນ້ອງນ້ອຍຈາກແຂວງຫຼວງນໍ້າທາ. ຈາກນັ້ນ, ທ່ານ ອ່ອນຈັນ ຄໍາພາວົງ ຮອງເຈົ້າແຂວງຫຼວງນໍ້າທາ ກໍໄດ້ນໍາພາຢ້ຽມຊົມ ພ້ອມທັງອະທິບາຍບັນດາຮູບພາບ ແລະ ສິ່ງຂອງຕ່າງໆທີ່ນໍາມາວາງສະແດງ ແຕ່ລະຢ່າງສະແດງໃຫ້ເຫັນເຖິງຄວາມອຸດົມສົມບູນທາງດ້ານທໍາມະຊາດ, ວັດທະນະທໍາ, ທ່າແຮງໃນການດຶງດູດການລົງທຶນດ້ານກະສິກໍາ, ອຸດສາຫະກໍາ, ພະລັງງານສີຂຽວ, ໂລຈີສຕິກ, ການຄ້າ, ການບໍລິການ ແລະ ການທ່ອງທ່ຽວ.

ໂອກາດດັ່ງກ່າວ, ການນໍາຂັ້ນສູງ ແລະ ຜູ້ແທນຈາກ ສປປ ລາວ ໄດ້ລົງຢ້ຽມຍາມຫ້ອງວາງສະແດງສິນຄ້າຂອງຜູ້ປະກອບການ ຈາກແຂວງຫຼວງນໍ້າທາ, ພາຍໃນປະເທດ ແລະ ກະຊວງອຸດສາຫະກໍາ ແລະ ການຄ້າ. ໄດ້ພົບປະໂອ້ລົມນັກທຸລະກິດ ແລະ ໃຫ້ກໍາລັງໃຈ ໃນການນໍາເອົາສິນຄ້າ, ການບໍລິການ ແລະ ການທ່ອງທ່ຽວ ເຂົ້າສູ່ຕະຫຼາດຕ່າງປະເທດ ໂດຍສະເພາະຕະຫຼາດ ສປ ຈີນ ແລະ ບັນດາປະເທດອາຊຽນ. ງານໃນຄັ້ງນີ້ ສະທ້ອນໃຫ້ເຫັນເຖິງຄວາມຕັ້ງໃຈຂອງ ສປປ ລາວ ທີ່ຈະເສີມສ້າງຄວາມຮ່ວມມືທາງເສດຖະກິດ, ການຄ້າ, ການບໍລິການ, ການທ່ອງທ່ຽວ ແລະ ການລົງທຶນ ກັບ ສປ ຈີນ ແລະ ບັນດາປະເທດອາຊຽນ ພ້ອມທັງເປັນເວທີປະຊາສໍາພັນພາບລັກຂອງ ສປປ ລາວ ໃນເວທີລະດັບສາກົນ.

ຂ່າວ: ສົມສະຫວາດ ນາມອິນທາ

ສະແດງຄຳຄິດເຫັນ