ອົງການທ່ອງທ່ຽວມາເລເຊຍ ຮ່ວມກັບ ສະຖານທູດມາເລເຊຍ ໄດ້ຈັດງານມະ​ຫະ​ກຳ​ວາງສະ​ແດງ​ການທ່ອງທ່ຽວ​ ແລະ ​ການ​ສຶກສາ​ຂອງ​ມາ​ເລ​ເຊຍປະ​ຈຳ​ປີ 2025 ຂຶ້ນຫວ່າງບໍ່ດົນມານີ້ ທີ່ສູນການຄ້າພາກຊັນ ​ນະຄອນຫຼວງ​ວຽງ​ຈັນ. ໂດຍມີທ່ານ ເອດດີ ອີຣາວານ ມາມຸດ ເອກອັກຄະລັດຖະທູດມາເລເຊຍປະຈຳລາວ, ທ່ານ ນາງ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ ກະຊວງວັດທະນະທໍາ ແລະການທ່ອງທ່ຽວ (ວທ), ທ່ານ ສໍດາລີ ຈັນທະວົງ ຫົວໜ້າການຕະຫຼາດ ຂອງອົງການທ່ອງທ່ຽວ ປະຈຳລາວ ພ້ອມດ້ວຍພະນັກງານ-ວິຊາການອົງການທ່ອງທ່ຽວມາເລເຊຍ, ບໍລິສັດທົວ ແຂກຖືກເຊີນ ແລະ ນັກສະແດງເຂົ້າຮ່ວມ.

ພາຍໃນງານຜູ້ເຂົ້າຮ່ວມ ໄດ້ຮັບຊົມການສະແດງຟ້ອນສິນລະປະ ຂອງນັກເຕັ້ນມາເລເຊຍ, ການຫຼິ້ນເກມຮັບຂອງລາງວັນ ແລະ ຮ່ວມຫຼິ້ນເກມຮັບຂອງລາງວັນທີ່ຮ້ານຂອງອົງການທ່ອງທ່ຽວມາເລເຊຍ, ຖ່າຍຮູບຕາມອັດທະຍາໃສ, ບໍລິສັດທົວຕ່າງໆໃຫ້ຂໍ້ມູນ ແລະ ຂາຍແພັກເກັດທົວໄປມາເລເຊຍ ພ້ອມຮັບສ່ວນຫຼຸດພິເສດ ແລະ ສູນການສຶກສາໃຫ້ຄຳປຶກສາ ແລະ ເປັນຕົວແທນສົ່ງນ້ອງໆນັກຮຽນໄປຮຽນຕໍ່ທີ່ປະເທດມາເລເຊຍ ພ້ອມຮັບສ່ວນຫຼຸດພິເສດເຊັ່ນດຽວກັນ ຖ້າຈອງພາຍໃນງານ.

ງານຄັ້ງນີ້ ໄດ້ຈັດໃຫ້ມີກິດຈະກໍາການຈັບສະຫຼາກລຸ້ນໂຊກ ເພື່ອຕ້ອນຮັບປີທ່ອງທ່ຽວມາເລເຊຍ 2026 ໃຫ້ລູກຄ້າທີ່ຊື້ແພັກເກັດທ່ຽວມາເລເຊຍພາຍໃນງານ ຊຶ່ງຈຳນວນແພັກເກັດທີ່ໄດ້ຈໍາໜ່າຍໃນງານມີ 54 ແພັກເກັດ ໃນນີ້ໄປທ່ຽວມາເລເຊຍ – ສິງກະໂປ – ອິນໂດ (Malaysia-Singapore-Indo) 6 ມື້ 5 ຄືນ; ໄປທ່ຽວມາເລເຊຍ-ສິງກະໂປ (Malaysia-Singapore) 5 ມື້ 4 ຄືນ ແລະ ໄປທ່ຽວ ມາເລເຊຍ (⁠Malaysia) 4 ມື້ 3ຄືນ. ສໍາລັບລາງວັນລຸ້ນໂຊກຄັ້ງນີ້ ປະກອບມີ 3 ລາງວັນໃຫຍ່ ຄື: ລາງວັນທີ 1 ມີ 1 ລາງວັນ ໄອແພັດ (iPad 1 ເຄື່ອງ); ລາງວັນທີ 2 ມີ 3 ລາງວັນ Air fryer 3 ໜ່ວຍ; ລາງວັນທີ 3 ມີ 5 ລາງວັນ ໝໍ້ຫຸງເຂົ້າ 5 ໜ່ວຍ ແລະ ລາງວັນຊົມເຊີຍແມ່ນໄດ້ຮັບຂອງທີ່ລະນຶກຈາກອົງການທ່ອງທ່ຽວມາເລເຊຍ ໃຫ້ກຽດມອບລາງວັນໂດຍທ່ານເອກອັກຄະລັດຖະທູດມາເລເຊຍປະຈຳລາວ.

ງານມະຫະກຳການທ່ອງທ່ຽວ ແລະ ການສຶກສາຂອງມາເລເຊຍປະຈຳປີ 2025 ຄັ້ງນີ້ ມີຮ້ານທັງໝົດ 15 ຮ້ານ ໃນນັ້ນມີຮ້ານວາງສະແດງຂອງອົງການທ່ອງທ່ຽວມາເລເຊຍ, ກົມພັດທະນາການທ່ອງທ່ຽວລາວ ແລະ ບັນດາບໍລິສັດທ່ອງທ່ຽວຊັ້ນນຳ 10 ບໍລິສັດທ່ອງທ່ຽວລາວທີ່ສົ່ງເສີມການຂາຍແພັກເກັດທ່ອງທ່ຽວມາເລເຊຍ.

ຂ່າວ-ພາບ: ຍຸຸພິນທອງ-ບຸນອູ້ມ

ສະແດງຄຳຄິດເຫັນ