ນັກສຶກສາລາວຢູ່ນະຄອນຫຼວງປັກກິ່ງຂອງຈີນ ນໍາເອົາອາຫານ, ເຄື່ອງດື່ມ, ສຽງແຄນ ແລະ ສິລະປະວັດທະນະທໍາລາວ ໄປສະແດງຜ່ານສາຍຕາຜູ້ຊົມໃນງານແລກປ່ຽນວັດທະນະທໍາສາກົນ ທີ່ຈັດຂຶ້ນຢູ່ມະຫາວິທະຍາໄລວິທະຍາສາດ ແລະ ເຕັກໂນໂລຊີປັກກິ່ງ ໃນວັນທີ 21 ກັນຍານີ້. ງານຄັ້ງນີ້ ມີນັກສຶກສາຈາກຈີນ, ອາຊຽນ, ຢູເຣເຊຍ, ອາຟຣິກາ, ເອີຣົບ ແລະ ອື່ນໆ ເຂົ້າຮ່ວມຢ່າງຫຼວງຫຼາຍ.

ຈຸດປະສົງເພື່ອເປີດໂອກາດໃຫ້ນັກສຶກສາຕ່າງປະເທດ ໄດ້ເຜີຍແຜ່ວັດທະນະທໍາອັນດີງາມທີ່ເປັນເອກະລັກຂອງຊາດ ອອກສູ່ສາຍຕາສາກົນໄດ້ຮັບຮູ້ ແລະ ເຂົ້າໃຈໂດຍຜ່ານກິດຈະກໍາຕ່າງໆ ເຊັ່ນ: ງານວາງສະແດງອາຫານ-ເຄື່ອງດື່ມ, ການສະແດງສິລະປະວັດທະນະທໍາ, ວິທີປຸງແຕ່ງອາຫານ ແລະອື່ນໆ. ພ້ອມທັງເປີດໂອກາດໃຫ້ບັນດານັກສຶກສາໄດ້ໃຊ້ເວລາໃກ້ຊິດຕິດແທດກັນຫຼາຍຂຶ້ນເພື່ອສົ່ງເສີມຄວາມສາມັກຄີຮັກແພງເຊິ່ງກັນແລະກັນ.

ສໍາລັບນັກສຶກສາລາວ ໄດ້ນໍາເອົາອາຫານທີ່ເປັນເອກະລັກຂອງຊາດ ເຊັ່ນ: ເຂົ້າໜຽວ, ລາບ, ຕໍາໝາກຫຸ່ງ ເຄື່ອງດື່ມປະເພດກາເຟລາວ, ເບຍລາວ ແລະ ອື່ນໆ ໄປວາງສະແດງ ແລະ ເປີດໂອກາດໃຫ້ນັກທ່ອງທ່ຽວໄດ້ຊີມລົດຊາດ. ນອກຈາກນີ້ຍັງໄດ້ຂຶ້ນເວທີສະແດງສິລະປະເປົ່າແຄນ, ຟ້ອນ ແລະ ຮ້ອງເພັງລາວ ພ້ອມໆກັບການນຸ່ງເສື້ອຜ້າໄໝທີ່ເປັນວັດທະນະທໍາ ໜ້າອອນຊອນ ສາມາດດຶງດູດສາຍຕານັກສຶກສາສາກົນ ແລະ ນັກທ່ອງທ່ຽວເປັນພິເສດ.

ອີງຕາມຂໍ້ມູນຈາກເວັບໄຊຟູນຄຣາມ (https://fulcrum.sg/tag/asean-china-relations/) ໃຫ້ຮູ້ວ່າ: ນັບຕັ້ງແຕ່ປີ 2016 ເປັນຕົ້ນມາ, ນັກສຶກສາຈາກອາຊີຕາເວັນອອກສຽງໃຕ້ ຫຼື ອາຊຽນ ໄດ້ກາຍເປັນກຸ່ມນັກສຶກສາຕ່າງຊາດຫຼາຍທີ່ສຸດໃນຈີນ. ໃນສົກສຶກສາ 2021-2022, ນັກສຶກສາຈາກອາຊຽນ ມີປະມານ 30% ຂອງຈໍານວນນັກສຶກສາຕ່າງປະເທດ 100,000 ກວ່າຄົນທີ່ສຶກສາຢູ່ ຈີນ, ຂະນະທີ່ນັກສຶກສາຈີນ ປະມານ 62.000 ຄົນ ໄປສຶກສາຢູ່ໃນປະເທດສະມາຊິກອາຊຽນ. ຄາດວ່າໃນສົກສຶກສາ 2025-206 ນີ້, ຈີນ ຈະບັນລຸຈຳນວນການແລກປ່ຽນນັກສຶກສາສອງສົ້ນລະຫວ່າງຈີນ ແລະ ອາຊຽນທັງໝົດ 300,000 ຄົນ, ໃນນັ້ນ, ຄາດວ່ານັກສຶກສາລາວທີ່ມາສຶກສາຢູ່ປະເທດຈີນ ອາດມີສູງເຖິງ 30,000 ຄົນ, ເພີ່ມຂຶ້ນປະມານ 10%-15% ເມື່ອທຽບໃສ່ສົກສຶກສາ 2024-2025.

ທີ່ມາ: ວສລ

ສະແດງຄຳຄິດເຫັນ